ខេត្តសៀមរាប ៖ ដោយសារខឹងស្តីបន្ទោសរឿងដើរផឹកស្រា ពេលត្រឡប់មកផ្ទះវិញ កូនប្រុសអប្រិយបានស្ទុះទៅទាញកំបិតផ្គាក់កាប់ឪពុកបង្កើតចំគល់ដោះខាងស្តាំ បណ្តាលឱ្យស្លាប់ភ្លាមមួយរំពេចក្នុងថ្លុកឈាមក្រោយផ្ទះ រួចរត់គេចខ្លួនបាត់ ។ ហេតុការណ៍នេះ បង្កឱ្យមានការភ្ញាក់ផ្អើលពេញភូមិ កាលពីវេលាម៉ោង៦និង១០នាទីល្ងាចថ្ងៃទី២៥ ខែឧសភា នៅភូមិចាន់ហៀរ ឃុំបឹងមាលា ស្រុកស្វាយលើ ។
ប្រភពពីសមត្ថកិច្ចឲ្យដឹងថា បុរសជាឪពុកដែលត្រូវកូនប្រុសកាប់ស្លាប់នេះឈ្មោះ សុខ ប៉ក់អាយុ៥៩ឆ្នាំ ជាកសិករ ឯកូនអប្រិយជាជនដៃដល់ឈ្មោះ ប៉ក់ ផាន់ អាយុ១៧ឆ្នាំ ។នៅព្រឹកថ្ងៃទី២៥ ខែឧសភា បុរសជាឪពុកមានជម្លោះពាក្យសម្តីជាមួយកូនប្រុសរូបនេះអំពីរឿងមិនជួយធ្វើការងារផ្ទះ គិតតែពីដើរលេងផឹកស៊ី ហើយពេលចូលផ្ទះម្តងៗសុំតែលុយ ។ ក្រោយពីត្រូវឪពុកស្តីបន្ទោស កូនប្រុសម្នាក់នេះបានចេញពីផ្ទះបាត់ លុះដល់វេលាល្ងាចទើបឃើញត្រឡប់ចូលផ្ទះវិញដោយមានសភាពស្រវឹងផង ។ ពេលនោះក៏មានការឈ្លោះប្រកែកគ្នាម្តងទៀត ដោយបុរសជាឪពុកនិយាយដដែលៗអំពីរឿងដើរផឹកសុី ទើបធ្វើឱ្យកូនអប្រិយនេះខឹងក៏យកកាំបិតផ្គាក់មកកាប់ឪពុកត្រូវចំគល់ដោះខាងស្តាំបណ្តាលឱ្យស្លាប់តែម្តង ។
បើតាមស្ត្រីឈ្មោះ សួន លាំ អាយុ៥៧ឆ្នាំត្រូវជាប្រពន្ធនិងជាម្តាយ និយាយប្រាប់សមត្ថកិច្ចថា ប្តីគាត់និងកូនពិតជាមានជម្លោះនឹងគ្នាមែនអំពីរឿងកូនដើរផឹកសុី និងសុំលុយទៅធ្វើលិខិតឆ្លងដែនទៅប្រទេសថៃ ប៉ុន្តែប្តីគាត់មិនឱ្យ ។នៅល្ងាចថ្ងៃនោះ ខណៈគាត់កំពុងដាំបាយនៅក្នុងផ្ទះក៏ឮសំឡេងកូននិងប្តីទាស់គ្នានៅខាងលិចផ្ទះ ។ លុះមួយសន្ទុះក្រោយមក ស្រាប់តែឃើញប្តីដេកដួលដោយមានឈាមប្រឡាក់ពេញខ្លួន ចំណែកកូនប្រុសជិះម៉ូតូចេញទៅបាត់ ទើបគាត់ស្រែកប្រាប់អ្នកភូមិឱ្យជួយ ប៉ុន្តែប្តីបានស្លាប់់ទៅហើយ ៕
ចែករំលែកព័តមាននេះ