ខេត្តកំពង់ស្ពឺ ៖ បុរសជាជនពិការជើងស្តាំម្ខាងក្នុងសម័យសង្គ្រាមម្នាក់ត្រូវបានប្អូនស្រីបង្កើត និងប្អូនថ្លៃជាប្តី ព្រមទាំងក្មួយប្រុសពេញកម្លាំងទាំង៣នាក់ ព្រួតគ្នាវាយសម្រាតខោអាវអូសចាប់ពីមុខផ្ទះរបស់បុរសពិការរហូតដល់ផ្ទះក្រុមជនសង្ស័យប្រហែល៥០ម៉ែត្របណ្តាលឱ្យរងរបួសធ្ងន់ធ្ងរ ហើយក៏មានការភ្ញាក់ផ្អើលដល់ប្រជាពលរដ្ឋនៅក្នុងភូមិនាំគ្នាទៅចោមរោមមើល និងជួយបុរសដែលជាជនពិការនោះថែមទៀតផងទើបរួចពីការវាយធ្វើបាបពីសំណាក់ក្រុមជនសង្ស័យទាំង៣នាក់ខាងលើនោះបាន ។
លោក ហង់ គន្ធា អាយុ៤៩ឆ្នាំ ជាយោធិនពិការធ្លាប់បំរើការងារនៅវរសេនាតូចលេខ៨៦ចំណុះឱ្យ(ACO)រស់នៅក្នុងភូមិអូរក្រោម ឃុំព្នាយ ស្រុកសំរោងទង ខេត្តកំពង់ស្ពឺ ។ លោកបន្តទៀតថា កាលពីវេលាម៉ោង០៧និង៤០នាទីយប់ថ្ងៃទី៣០ ខែវិច្ឆិកា ឆ្នាំ២០១៧ កន្លងទៅលោកបានចេញពីក្នុងផ្ទះមកបិតទ្វាររបងដោយសារតែយប់ហើយ ពេលនោះលោកក៏បានស្រែកសួរអ្នកជិតខាង(ផ្ទះជាប់គ្នា)ថា «បូរី បានអីហូបបាយ?» ស្រាប់តែមិនទាន់ឮឆ្លើយផង ក៏លេចមុខស្ត្រីឈ្មោះ ហង់ ចាន់ថុល អាយុ៤៤ឆ្នាំ ជាប្អូនបង្កើតរបស់លោក និងឈ្មោះ បូ អាន អាយុ៤៩ឆ្នាំ ព្រមទាំងឈ្មោះ អឿ រតនៈ ហៅ អឿ ឋានៈ អាយុ២៥ឆ្នាំ ធ្វើការងារជាបុគ្គលិកអង្គការ រស់នៅក្នុងភូមិ-ឃុំជាមួយគ្នារំលងផ្ទះមួយបាននាំគ្នាព្រួតវាយរូបគាត់ដែលជាជនពិការជើងស្តាំម្ខាងចាប់សម្រាតខោអាវ វាយអូស ដាល់មុខគាត់ បណ្តាលឱ្យរលាត់ដៃជើងអូសរហូតដល់ក្នុងរបងផ្ទះរបស់ក្រុមជនដៃដល់តែម្តងនៅសល់តែខោលីអូរប៉ុណ្ណោះ ។
លោកបានបន្តទៀតថា ដោយសារតែលោកត្រូវគេវាយបណ្តាលឱ្យងងឹតមុខហើយណាខ្លួនពិការជើងម្ខាងទៀតផងនោះគ្មានកម្លាំងកំហែងតតាំងជាមួយមនុស្សរហូតដល់ទៅ៣នាក់ទៀតនោះ ស្រាប់តែមានប្រជាពលរដ្ឋឈ្មោះជេត សុភាព ភេទប្រុស អាយុ៣៨ឆ្នាំ មុខរបរធ្វើស្រែ រស់នៅក្នុងភូមិជាមួយគ្នាបានឃើញក៏នាំគ្នាទៅហៅអ្នកស្រុកឱ្យមកជួយឃាត់ក្រុមជនដៃដល់ទាំង៣នាក់ឱ្យឈប់វាយតប់បុរសពិការខាងលើទៀតទៅ ដោយឃើញមានក្រុមប្រជាពលរដ្ឋ និងក្រុមប្រជាការពារមកព្រោងព្រាតទើបក្រុមជនសង្ស័យទាំង៣នាក់ឪពុកម្តាយ និងកូនឈប់ធ្វើសកម្មភាពព្រួតវាយលើបុរសពិការជាយោធិននោះ ប៉ុន្តែនៅលើដងខ្លួនមានស្នាមរបួស និងនៅសល់តែខោលីអូរប៉ុណ្ណោះទេ ។
លោកបន្តទៀតថា ក្រោយមកលោកក៏បានដាក់ពាក្យបណ្តឹងនៅប៉ុស្តិ៍នគរបាលឃុំព្នាយគាត់ជាជនរងគ្រោះស្រាប់តែបញ្ជូនទៅកាន់ការិយាល័យនគរបាលព្រហ្មទណ្ឌកំរិតស្រាលខេត្ត និងទៅតុលាការខេត្តឃាត់បានតែបុរសឈ្មោះ បូ អាន តែប៉ុណ្ណោះហើយឈ្មោះ ហង់ ចាន់ថុល និងឈ្មោះ អឿ រតនៈ កម្លាំងមានសមត្ថកិច្ចមិនបានឃាត់ខ្លួននោះទេ ហើយឥឡូវឈ្មោះ បូ អាន ក៏រស់នៅមានសេរីភាពវិញដែល ខណៈដែលជនរងគ្រោះជាជនពិការជើងស្តាំម្ខាង និងជាយោធិនពិការមិនទាន់បានសំណងជំងឺចិត្តនៅឡើយនោះទេ ។
លោក ហង់ គន្ធា បានបញ្ជាក់បន្ថែមទៀតថា ប្រសិនបើតុលាការខេត្តកំពង់ស្ពឺកាត់ក្តីឱ្យលោកចាញ់ហើយក្លាយទៅជាជនសង្ស័យមានទោសពិតប្រាកដមែននោះលោកមិនសុខចិត្តឡើយ លោកនឹងគ្រោងដាក់ពាក្យបណ្តឹងទៅសាលាឧទ្ធរណ៍បន្តទៀតដោយទាមទារសំណងពីក្រុមជនសង្ស័យដែលព្រួតគ្នាវាយរូបលោកប្រុងសម្លាប់លោកចំនួនទឹកប្រាក់៦ម៉ឺនដុល្លារ ដើម្បីធ្វើការប៉ះប៉ូវនូវការខាតបង់កិត្តិយស សេចក្តីថ្លៃថ្នូរ របស់លោកដែលជាធោធិនពិការ និងជាជនរងគ្រោះដែលថ្នាក់ដឹកនាំតែងតែយកចិត្តទុកដាក់ចំពោះជនពិការគ្រប់រូបនោះ ជាពិសេសមានលោក អែម ចន្ទ័មករា ដែលជាអគ្គលេខាធិការជនពិការតែងតែយកចិត្តទុកដាក់ និងជួយដោះស្រាយរាល់ទុក្ខលំបាករបស់បងប្អូនជនពិការគ្រប់រូបកន្លងមក ៕
ចែករំលែកព័តមាននេះ