រាជធានីភ្នំពេញ ៖ ផ្លូវប្រទះឡាង ឬផ្លូវខ្សែក្រវាត់ក្រុងទី៤ដែលមានភូមិសាស្ត្រជាប់នឹងខេត្តកណ្តាល ខណ្ឌពោធិ៍សែនជ័យ និងខណ្ឌដង្កោ រាជធានីភ្នំពេញ មានប្រវែងជាង១២គីឡូម៉ែត្រ ដែលបានបើកការដ្ឋានស្ថាបនាជាងមួយឆ្នាំកន្លងមក ពេលនេះការដ្ឋានទាំងមូលបានបញ្ចប់១០០ភាគរយហើយ ដោយចំណាយថវិកាចំនួន៥លានដុល្លារអាមេរិក។
លោកសាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញ បានអោយដឹងនៅព្រឹកថ្ងៃទី២៨ឧសភា ២០១៨ នេះថា ផ្លូវបេតុងប្រទះឡាងចាប់ពីផ្លូវជាតិលេខ៣ ដល់ផ្លូវជាតិលេខ៤ ដែលមានប្រវែង១២.៦២០ម៉ែត្រ ទទឹង៧ម៉ែត្រ បានបញ្ចប់ការដ្ឋាន១០០ភាគរយនៅថ្ងៃនេះហើយ ។ លោកបន្តថាផ្លូវនេះជាផ្លូវខ្សែក្រវាត់ទី៤ ដែលរថយន្តធុនធ្ងន់ រថយន្តកុងតឺន័រអាចធ្វើចរាចរណ៍ពីផ្លូវជាតិលេខ៤ទៅភ្ជាប់ផ្លូវជាតិលេខ៣ ផ្លូវជាតិលេខ២ ផ្លូវជាតិលេខ១ ដោយមិនចាំបាច់ឱ្យយានយន្តចូលមកដល់រង្វង់មូលចោមចៅដែលតែងតែកកស្ទះរាលថ្ងៃនោះទេ។
លោកសាំ ពិសិដ្ឋ បានឲ្យដឹងទៀតថា ផ្លូវប្រទះឡាង ឬផ្លូវខ្សែក្រវាត់ក្រុងទី៤នេះគឺជាផ្លូវមួយដែលមានសារសំខាន់ក្នុងការរំដោះចរាចរណ៍តភ្ជាប់ពីផ្លូវជាតិលេខ៤ ត្រង់ចំណុចផ្សារបែកចានមកផ្លូវជាតិលេខ៣ ត្រង់ចំណុចវត្តស្លែង ។ ផ្លូវនេះបានរងនូវការខូចខាតស្ទើរទាំងស្រុងដោយកត្តាជាច្រើន ទើបអាជ្ញាធររាជធានីភ្នំពេញ និងអាជ្ញាធរខេត្តកណ្តាលសហការគ្នាធ្វើការជួលជុលឡើងវិញ តាមបទបញ្ជាពីសម្តេចតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា ។ លោកបញ្ជាក់ទៀតថា កំណាត់ផ្លូវនេះបើតាមការគ្រោងទុក នៅពេលខាងមុខនឹងត្រូវពង្រីកឲ្យមានទទឹងរហូតទៅដល់១៤ម៉ែត្រ រួមនឹងការដាក់ប្រព័ន្ធលូសងខាងផ្លូវផងដែរ ។ ប៉ុន្តែដោយសារថវិកានៅមានកម្រិត គឺអាជ្ញាធរសម្រេចស្ថាបនាទទឹងតែ៧ម៉ែត្រនេះសិន។
លោកសាំ ពិសិដ្ឋ បានធ្វើការអំពាវនាវដល់អ្នកបើកបររថយន្តធំៗដឹកទំនិញ និងរថយន្តតូចៗជាដើម សូមវាងមកផ្លូវខាងលើនេះ ដើម្បីកុំឲ្យមានការកកស្ទះចរាចរនៅចំណុចរង្វង់មូលចោមចៅ។
គួររំលឹកថា កំណាត់ផ្លូវខាងលើនេះបានបើកការដ្ឋានជួសជុលកាលថ្ងៃទី៣១ ខែតុលា ឆ្នាំ២០១៦ ក្រោមអធិបតីភាពអភិបាលរាជធានីភ្នំពេញ និងអភិបាលខេត្តកណ្តាល ។ ផ្លូវនេះមិនមែនត្រឹមតែបម្រើផលប្រយោជន៍ដល់ប្រជាពលរដ្ឋទូទៅដែលឆ្លងកាត់ភូមិសាស្ត្រតំបន់នេះនោះទេ គឺអាចកាត់បន្ថយការកកស្ទះចរាចរលើកំណាត់ផ្លូវជាតិលេខ៤ និងលេខ៣ផងដែរ ជាពិសេសត្រង់ចំណុចប្រសព្វរង្វង់មូលចោមចៅដែលជាចំណុចតភ្ជាប់ពីផ្លូវជាតិលេខ៤ ទៅផ្លូវជាតិលេខ៣ និងពីផ្លូវជាតិលេខ៣មកផ្លូវជាតិលេខ៤វិញ៕
ចែករំលែកព័តមាននេះ