ក្រុមហ៊ុនវេសឡាញ អេឌ្យូខេសិន គ្រុប ចុះ MoU លើកម្មវិធីប្រឹក្សាយោបល់ផ្នែកសិក្សាអប់រំ និងចិត្តសាស្ត្រ
- ភ្នំពេញ
រាជធានីភ្នំពេញ ៖ ក្រុមហ៊ុនវេសឡាញ អេឌ្យូខេសិន គ្រុប និង ក្រុមហ៊ុន Asia House Aide…
រាជធានីភ្នំពេញ ៖ ក្រុមហ៊ុនវេសឡាញ អេឌ្យូខេសិន គ្រុប និង ក្រុមហ៊ុន Asia House Aide (AHA) កាលពីថ្ងៃទី ២៦ ខែឧសភា ឆ្នាំ២០១៨ បានចុះអនុស្សរណៈយោគយល់គ្នា លើកម្មវិធីប្រឹក្សាយោបល់ផ្នែកសិក្សាអប់រំ និងចិត្តសាស្ត្រ ដើម្បីចូលរួមអភិវឌ្ឍន៍ធនធានមនុស្សនៅកម្ពុជា នៅសាខាសាលារៀនវ៉េស្ទឡាញន៍ ស្ថិតក្នុងខណ្ឌដូនពេញ ។
កញ្ញា ម៉េង សុខលីន ប្រធានប្រតិបត្តិការ និងអ្នកផ្តល់ប្រឹក្សាយោបល់នៃ AHA បានឱ្យដឹងនៅក្នុងពិធីចុះអនុស្សារណៈជាមួយក្រុមហ៊ុនវេសឡាញ អេឌ្យូខេសិន គ្រុប ថា ៖ «គោលបំណងដែល AHA ចូលរួមសហការជាមួយក្រុមហ៊ុនវ៉េស្ទឡាញន៍ថ្ងៃនេះ គឺក្រុមហ៊ុនចង់ចូលរួមចំណែកអភិវឌ្ឍន៍ធនធានមនុស្សនៅក្នុងប្រទេសកម្ពុជា ។ សាលារៀនវ៉េស្ទឡាញន៍ បង្កើតកម្មវិធីនេះឡើងអាចជួយដល់យុវជនដែលជាសិស្សានុសិស្ស មានសុខភាពផ្លូវចិត្តល្អ ធ្វើឱ្យការសិក្សាពួកគាត់បានប្រសើរឡើងជាងពេលមុនៗ និងមានទំនាក់ទំនងល្អ ជាមួយមនុស្សនៅជុំវិញខ្លួន ជាពិសេសមានទំនាក់ទំនងយ៉ាងជិតស្និទ្ធផ្ទាល់ជាមួយក្រុមគ្រួសារ»។
លោក គង់ សំនៀង ប្រធាននាយកប្រតិបត្តិការនៃក្រុមហ៊ុនវេសឡាញ អេឌ្យូខេសិន គ្រុប មានប្រសាសន៍ថា ៖ «យើងសហការជាមួយក្រុមហ៊ុន AHA រៀបចំកម្មវិធីប្រឹក្សាផ្លូវចិត្តនេះ យើងមិនមែនធ្វើសម្រាប់តែជាមួយសិស្សនោះទេ យើងធ្វើជាមួយមាតាបិតាសិស្ស បុគ្គលិកទាំងអស់ បើគាត់មានបញ្ហាអាចណាត់ជាមួយ និងសាលា ដើម្បីធ្វើការប្រឹក្សាយោបល់ជាមួយអ្នកជំនាញ» ។
លោកគង់ សំនៀង មានប្រសាសន៍បន្ថែមទៀតថា ក្រុមហ៊ុនវេសឡាញ អេឌ្យូខេសិន គ្រុប ៖ «មើលឃើញកម្មវិធីប្រឹក្សាយោបល់ផ្នែកសិក្សាអប់រំ និងចិត្តសាស្ត្រនេះ តាំងពីវ៉េស្ទឡាញន៍ចាប់បើកដំបូង ប៉ុន្តែពេលនោះ វាមិនទាន់មានរូបភាពមួយពេញលេញ ។ តែមកដល់ថ្ងៃនេះ យើងធ្វើវាឱ្យមានរូបភាពពេញលេញ ដោយមានអ្នកប្រឹក្សាយោបល់ប្រចាំការ មានបន្ទប់សម្រាប់ប្រឹក្សាយោបល់ ដែលគោរពទៅតាមស្តង់ដា ដោយដាក់ឱ្យអនុវត្តចាប់ពីខែឧសភានេះ ទៅមាននៅសាខា ដូនពេញ និងសាខាច្បារអំពៅ ។ តែចាប់ពីខែសីហាយើងនឹងចាប់ផ្តើមដាក់ឱ្យមាននៅគ្រប់សាខាសាលាទាំងអស់»។
អ្នកស្រី អ៊ី សោភា នាយិកាសាលារៀនវេស្ទឡាញន៍ សាខាច្បារអំពៅបានឲ្យដឹងផងដែរថា ៖ «ក្នុងប៉ុន្មានឆ្នាំថ្មីៗនេះ ចំនួនសិស្សទូទាំងពិភពលោក កាន់តែច្រើនឡើងៗ ដែលពួកគាត់កំពុងរៀនសូត្រ និងមានផលវិបាកលើការសិក្សា បញ្ហាផ្លូវចិត្ត ដែលអាចប៉ះពាល់ដល់ដំណើរការសិក្សាសុខភាព ក៏ដូចជាសុខុមាលភាពផ្លូវចិត្ត និងអារម្មណ៍របស់ពួកគាត់ ។
ដើម្បីឆ្លើយតបទៅនឹងបញ្ហាខាងលើ ក្រុមហ៊ុនវេសឡាញ អេឌ្យូខេសិន គ្រុប បានសហការជាមួយអ្នកជំនាញផ្នែកប្រឹក្សាយោបល់ និងគណៈនាយកសាលាបានព្យាយាមបង្កើតកម្មវិធី ប្រឹក្សាយោបល់នេះឡើង ដើម្បីអន្តរាគមន៍ទាន់ពេល និងសមស្របសម្រាប់សិស្សានុសិស្ស និងតម្រូវការនាពេលបច្ចុប្បន្ននេះ» ៕
ចែករំលែកព័តមាននេះ