រាជធានីភ្នំពេញ ៖ខណៈដែលការបោះឆ្នោតជ្រើសរើសតាំងតំណាងរាស្ត្រអាណត្តិទី៦ កាន់តែរំកិលមកជិតបន្តិចម្តងៗនោះសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអំពាវនាវដល់ប្រជាពលរដ្ឋដែលមានឈ្មោះក្នុងបញ្ជីបោះឆ្នោតសូមអញ្ជើញទៅបោះឆ្នោតឲ្យបានគ្រប់គ្នា ។ សម្ដេចតេជោ ហ៊ុន សែន នាយរដ្ឋមន្ដ្រីនៃកម្ពុជា បានថ្លែងថា ប្រជាពលរដ្ឋខ្មែរទូទាំងប្រទេសសប្បាយរីករាយចំពោះការបោះឆ្នោតនាថ្ងៃទី២៩ ខែកក្ដដា ឆ្នាំ២០១៨ ខាងមុខនេះពីព្រោះមានឱកាសបានប្រើប្រាស់នូវសិទ្ធិសេរីភាពក្នុងការបោះឆ្នោតជ្រើសរើស គណបក្សនយោបាយដែលខ្លួនពេញចិត្ត ។
យោងតាមគេហទំព័រហ្វេសប៊ុករបស់សម្ដេចតេជោ ហ៊ុន សែន នៅថ្ងៃទី២៨ ខែឧសភា ឆ្នាំ២០១៨ ថា សម្ដេចសូមផ្ញើសេចក្តីនឹករឮកដល់ពលរដ្ឋខ្មែរទូទាំងប្រទេស ។ សម្ដេចតេជោមានប្រសាសន៌ «ថ្ងៃបោះឆ្នោតជ្រើសតាំងតំណាងរាស្ត្រគឺកាន់តែជិតមកដល់ហើយនៅថ្ងៃទី២៩ ខែកក្កដា ឆ្នាំ២០១៨ ។ កម្ពុជាទូទាំងប្រទេសសប្បាយរីករាយចំពោះការបោះឆ្នោតខាងមុខនេះ ព្រោះយើងមានឱកាសបានប្រើប្រាស់នូវសិទ្ឋិសេរីភាពក្នុងការបោះឆ្នោតជ្រើសរើសគណបក្សនយោបាយដែលយើងម្នាក់ៗពេញចិត្ត» ។
សម្ដេចបន្ដថា មកទល់ពេលនេះរាជរដ្ឋាភិបាលដែលដឹកនាំដោយគណបក្សប្រជាជនគឺបានកសាងសមិទ្ឋិផលជាតិជាច្រើនដើម្បីបម្រើសេចក្តីត្រូវការរបស់បងប្អូនប្រជាពលរដ្ឋ ។ ទិសដៅនៃការអភិវឌ្ឍរបស់យើងគឺនឹងប្រែក្លាយកម្ពុជាអោយទៅជាប្រទេសដែលមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសដែលមានប្រាក់ចំណូលខ្ពស់នៅឆ្នាំ២០៥០ ។ ទន្ទឹមនឹងនេះដែរ គឺគណបក្សប្រជាជនគាំទ្រ និងលើកទឹកចិត្តឲ្យកូនក្មួយយុវជនមានឱកាសបានចូលរួមកាន់តែច្រើនឡើងៗនៅក្នុងការអភិវឌ្ឍប្រទេសជាតិ ។
ជាមួយគ្នានេះដែរ សម្តេចនាយរដ្ឋមន្ដ្រីក៏បានអរគុណខ្លាំងណាស់ចំពោះសមាជិក សមាជិកា គណបក្សប្រជាជន និងកូនក្មួយយុវជន ព្រមទាំងបងប្អូនកូនក្មួយកម្មករ កម្មការនី ដែលតែងតែគាំទ្រ និងបោះឆ្នោតជូនគណបក្សប្រជាជន ដើម្បីធានានូវសន្តិភាព និងនិរន្តរភាពនៃការអភិវឌ្ឍនៅក្នុងប្រទេសជាតិផងដែរ ៕
ចែករំលែកព័តមាននេះ