ខេត្តព្រះសីហនុ ៖ ស្ត្រីម្នាក់បានរងរបួសធ្ងន់ ប្រេះឆ្អឹងស្មងជើងខាងស្តាំ និងមានស្នាមជាំពេញខ្លួន ហើយម៉ូតូថ្មីសន្លាងមួយគ្រឿងត្រូវរងការខូចខាតផ្នែកកំណាត់មុខស្ទើរតែទាំងស្រុងនៅក្នុងហេតុការណ៍គ្រោះថ្នាក់ចរាចរដែលបង្កឡើងដោយរថយន្តបុកជាមួយម៉ូតូ ។
តាមការឲ្យដឹងពីគ្រួសារសាច់ញ្ញាតិស្ត្រីរងគ្រោះបានឲ្យដឹងថា ហេតុការណ៍គ្រោះថ្នាក់ចរាចរណ៍ខាងលើបានកើតឡើងកាលពីវេលាម៉ោង៨ព្រឹកថ្ងៃទី២៨ ខែឧសភា ឆ្នាំ២០១៨ នៅលើចិញ្ចើមផ្លូវក្រាលក្រួសក្រហម ជាប់ផ្លូវជាតិលេខ៤ ត្រង់ចំណុចក្បែរផ្សារឃ្លាំងលើក្នុងក្រុម៣ ភូមិ២ សង្កាត់លេខ១ ក្រុងព្រះសីហនុ ខេត្តព្រះសីហនុ។
ប្រភពខាងលើបានឲ្យដឹងទៀតថា ស្ត្រីរងគ្រោះឈ្មោះប្រាក់ មុំ អាយុ៤២ឆ្នាំ មុខរបរលក់ដូរ (រងរបួសប្រេះឆ្អឹងស្មងជើងខាងស្តាំ និងមានស្នាមជាំពេញខ្លួន) មានទីលំនៅក្បែរកន្លែងកើតហេតុខាងលើ ជាអ្នកបើកបរម៉ូតូមួយគ្រឿងម៉ាកហុងដាឌ្រីម ធុនសេ១២៥ ពណ៌ខ្មៅ ស៊េរីឆ្នាំ២០១៦ មិនទាន់មានស្លាកលេខ ។ ដោយឡែកអ្នកបើកបររថយន្តបង្កឈ្មោះ តិល សាមុត ភេទប្រុស មានអាយុប្រមាណជាង៥០ឆ្នាំ មុខរបរជាគ្រូបង្រៀនភាសាអង់គ្លេស ជាអ្នកបើកបររថយន្តមួយគ្រឿងម៉ាកប៉ាហ្សេរ៉ូ ពណ៌ទឹកប្រាក់លាយបៃតងចាស់ ពាក់ស្លាកលេខ ភ្នំពេញ ២F-១៣៦២។
សាក្សីដែលបានឃើញហេតុការណ៍ខាងលើបានឲ្យដឹងថា មុនកើតហេតុ គេឃើញស្ត្រីរងគ្រោះខាងលើជិះម៉ូតូថ្មីសន្លាងមួយគ្រឿង ម៉ាកហុងដាឌ្រីម ចេញមកពីផ្ទះតាមចិញ្ចើមផ្លូវក្រាលក្រួសក្រហម មកពីទិសខាងកើតធ្វើដំណើរទៅផ្សារឃ្លាំងលើ លុះមកដល់ចំណុចកើតហេតុខាងលើ ស្រាប់តែរថយន្តមួយគ្រឿងម៉ាកប៉ាហ្សេរ៉ូ បើកបរពីទិសខាងលិចទៅកើត ក្នុងទិសដៅបញ្ច្រាសទិសគ្នា បើកបរក្នុងល្បឿនលឿន ហើយបានជ្រុលចង្កូតចេញពីលើផ្លូវជាតិទៅបុកម៉ូតូស្ត្រីរងគ្រោះនៅលើចិញ្ចើមផ្លូវពេញទំហឹង បណ្តាលឲ្យស្ត្រី
ជាអ្នកបើកបរម៉ូតូខ្ទាតប៉ើងចេញពីម៉ូតូរងរបួសធ្ងន់ធ្ងរ ចំណែកម៉ូតូរងការខូចខាត។
តាមការបង្ហើបឲ្យដឹងពីសមត្ថកិច្ចជំនាញការិយាល័យខាងលើបានឲ្យដឹងថា ក្រុមគ្រួសារសាច់ញាតិស្ត្រីរងគ្រោះខាងលើបានទារសំណងការខូចខាតម៉ូតូចំនួន២០០០ដុល្លារ និងថ្លៃសម្រាប់ការព្យាបាលរបួសចំនួន១៧០០ដុល្លារ សរុបការទារសំណងរបស់ក្រុមគ្រួសារស្ត្រីរងគ្រោះនៅក្នុងហេតុការណ៍បង្កគ្រោះថ្នាក់ខាងលើមានចំនួន៣៧០០ដុល្លារសហរដ្ឋអាមេរិក ។ រហូតមកដល់ម៉ោង១១និង៤៥នាទីព្រឹកថ្ងៃដដែល ភាគីទាំង២នៅមិនទាន់មានដំណោះស្រាយបញ្ចប់ករណីខាងលើនៅឡើយ ហើយសមត្ថកិច្ចនគរបាលការិយាល័យជំនាញបានកសាងសំណុំរឿងទៅតាមនីតិវិធី រង់ចាំភាគីទាំង២ស្វែងរកដំណោះស្រាយណាមួយ ដែលក្រុមគ្រួសារស្ត្រីរងគ្រោះអាចទទួលយកបាន។
ក្រោយកើតហេតុ ស្ត្រីរងគ្រោះត្រូវបានរថយន្តគ្លីនិកឯកជនដឹកយកទៅព្យាបាល ។ តាមការឲ្យដឹងពីក្រុមវេជ្ជបណ្ឌិតនៅគ្លីនិកបានឲ្យដឹងថា ស្ត្រីរងគ្រោះប្រេះឆ្អឹងស្មងជើងខាងស្តាំ និងមានស្នាមដាច់ ខ្ទាំសាច់ជាច្រើនកន្លែងកំពុងសម្រាកព្យាបាលនៅគ្លីនិកឯកជន ។ ដោយឡែករថយន្តបង្ក និងម៉ូតូរបស់ស្ត្រីរងគ្រោះត្រូវបានសមត្ថកិច្ចនគរបាលការិយាល័យចរាចរផ្លូវគោកនៃស្នងការដ្ឋាននគរបាលខេត្តយកទៅរក្សាទុករង់ចាំដោះស្រាយទៅតាមនីតិវិធី៕
ចែករំលែកព័តមាននេះ