ខេត្តកំពង់ធំ ៖ ដោយឃើញសកម្មភាពរថយន្តដឹកទំនិញសំពីងសំពោងល្មើសច្បាប់ ចូលមកក្នុងក្រុងស្ទឹងសែនធ្វើឲ្យបាត់បង់នូវសណ្តាប់ធ្នាប់ និងសេចក្តីថ្លៃថ្នូររបស់ខេត្ត អភិបាលខេត្តកំពង់ធំបានបញ្ជាឲ្យសមត្ថកិច្ចចាត់វិធានការចំពោះបញ្ហានេះ។
ខណៈពេលដែលច្បាប់ចរាចរណ៍ផ្លូវគោកកំពុងត្រូវបានរឹតបន្តឹងឲ្យអនុវត្តនោះ បច្ចុប្បន្ននេះ គេសង្កេតឃើញមានរថយន្តគ្រប់ប្រភេទដឹងជញ្ជូនទំនិញសំពីងសំពោងចូលមកក្នុងក្រុងស្ទឹងសែនយ៉ាងអនាធិប
តេយ្យ ដោយគ្មានការរំខានពីសមត្ថកិច្ចនោះទេ ជាក់ស្តែងដូចជារថយន្តសាំយ៉ុងដឹកផ្លែឈើល្មើសច្បាប់ដាក់សំពីងសំពោងមកដាក់ឲ្យម៉ូយនៅចំណុចផ្សារកំពង់ធំ និងផ្សារស្ទឹងសែនដឹកចូលមកដាក់ឱ្យម៉ូយនៅម៉ោងប្រហែលជា៤និង៣០នាទីព្រឹករាល់ថ្ងៃ ដោយគ្មានសមត្ថកិច្ចណាម្នាក់មករំខាននោះឡើយ ។ គេឃើញមានតែប៉ូលិសប៉ុស្តិ៍ផ្សារកំពង់ធំទេ ដែលចាំយកតែលុយដាក់ហោប៉ាវមិនឲ្យរួចរថយន្តណាមួយឡើយ ទង្វើទាំងអស់នេះហើយគឺជាភាពអសកម្មរបស់សមត្ថកិច្ចជំនាញពាក់ព័ន្ធនឹងករណីរថយន្តល្មើសខាងលើនេះ។
លោកវរៈសេនីយ៍ឯក ញ៉ែម ឈុនលី អធិការនគរបាលក្រុងស្ទឹងសែនបានឲ្យកោះសន្តិភាពដឹងថា បន្ទាប់ពីទទួលបានបទបញ្ជាពីលោក សុខ លូ អភិបាលខេត្តកំពង់ធំ និងបទបញ្ជារបស់លោកឧត្តមសេនីយ៍ត្រី អ៊ុក កុសល ស្នងការនគរបានខេត្តរួចមក នៅព្រឹកថ្ងៃទី២៨ ខែឧសភា ឆ្នាំ២០១៨នេះ លោកបានឲ្យមន្ត្រីរបស់លោកមានប៉ុស្តិ៍រដ្ឋបាលកំពង់ធំ ប៉ុស្តិ៍កំពង់ក្របៅ និងប៉ុស្តិ៍អាចារ្យលាក់ សហការគ្នាកោះហៅម្ចាស់រថយន្តដែលផ្ទុកទំនិញសំពីងសំពោងល្មើសច្បាប់ចរាចរណ៍ផ្លូវគោកបានចំនួន៥គ្រឿង ឲ្យម្ចាស់ចូលមកធ្វើកិច្ចសន្យាបញ្ឈប់សកម្មភាពដឹកសំពីងសំពោងរួមមាន រថយន្តសាំងយ៉ុងដឹកផ្លែឈើចំនួន៤គ្រឿង និងរថយន្ត១គ្រឿងទៀតផងដែរមកធ្វើកិច្ចសន្យា ទី១-បញ្ឈប់ការដាក់ទំនិញសំពីងសំពោងដាក់លើដំបូល និងចងពីខាងក្រោយរថយន្ត ទី២-ត្រូវគោរពទៅតាមគោលការណ៍របស់សាលាក្រុងស្ទឹងសែន និងទី៣-ការចតរថយន្តដាក់ទំនិញឲ្យមានរបៀបរៀបរយ កុំឈប់កណ្តាលផ្លូវបង្កផលប៉ះពាល់ដល់បងប្អូនប្រជាពលរដ្ឋក្នុងការធ្វើដំណើរ ប្រសិនណានៅតែប្រព្រឹត្តល្មើសទៀត នឹងត្រូវទទួលការផាកពិន័យតាមផ្លូវច្បាប់ដោយមិនមានការយោគយល់តទៅទៀតនោះឡើយ៕
ចែករំលែកព័តមាននេះ