ខេត្តបាត់ដំបង ៖ យ៉ាងហោចណាស់ គោចំនួន៣ក្បាលក្នុងចំណោមជាង៦០ក្បាល ត្រូវចរន្តអគ្គិសនីឆក់ងាប់នៅក្បែរបង្គោលប្រអប់កុងទ័រភ្លើង កាលពីវេលាម៉ោងជាង៥ល្ងាចថ្ងៃទី២៦ ខែឧសភា នៅភូមិស្រះទឹកថ្មី ឃុំតាក្រី ស្រុកកំរៀង ។ សមត្ថកិច្ចបានឱ្យដឹងថា ហេតុការណ៍នេះ បានកើតឡើងនៅចំណុចបង្គោលភ្លើងប្រអប់លេខ៥៩៤ ដែលមានតខ្សែប្រអប់កុងទ័រភ្លើងខ្វាត់ខ្វែង ។ មន្ត្រីដដែលនិយាយថា ទំនងខ្សែភ្លើងដែលតចេញពីប្រអប់កុងទ័រនៅជាប់បង្គោលភ្លើងនោះមានឆ្លងចរន្ត ទើបបានជាឆក់គោងាប់បន្តគ្នាបែបនេះ ។
សមត្ថកិច្ចបញ្ជាក់ថា គោជាង៦០ក្បាល ត្រូវម្ចាស់ដេញកាត់ទីនោះ តែមានគោប៉ុន្មានក្បាលដើរទៅស៊ីស្មៅក្បែរបង្គោលភ្លើងនោះ ក៏ស្រាប់តែត្រូវចរន្តភ្លើងឆក់បណ្តាលឱ្យដួលប្រកាច់ងាប់ចំនួន៣ក្បាលដែលនៅក្បែរគ្នាជាបន្តបន្ទាប់ ឯជាង៦០ក្បាលទៀតបោលចេញព្រោងព្រាត ។បើតាមម្ចាស់គោម្នាក់ក្នុងចំណោម៣នាក់ឈ្មោះ រឹត ពៅ និយាយថា គោទាំងអស់៦៦ក្បាល ហើយគាត់បានដេញពីកន្លែងឃ្វាលត្រឡប់មកផ្ទះវិញតាមផ្លូវដែលធ្លាប់ដេញគោឆ្លងកាត់រាល់ថ្ងៃ ។ នៅថ្ងៃកើតហេតុ ពេលគាត់ដេញគោទៅដល់ចំណុចខាង
លើ មានគោមួយចំនួនបានដើរទៅស៊ីស្មៅក្បែរបង្គោលភ្លើងនោះ ស្រាប់តែឃើញគោហាក់ដូចជាផ្អើលនឹងអ្វីមួយលោតព្រោងព្រាតស្ទុះបោលទៅមុខ ។ ម្ចាស់គោរូបនេះនិយាយទៀតថា ភ្លាមនោះគាត់ក៏ក្រឡេកឃើញគោ៣ក្បាលស្រាប់តែដួលប្រកាច់ងាប់ភ្លាមៗជាបន្តបន្ទាប់នៅក្បែរបង្គោលភ្លើង ឯជាច្រើនក្បាលទៀតបោលរួចផុត ។ ប៉ុន្តែគាត់មិនហ៊ានទៅក្បែរទេ ព្រោះដឹងថាបង្គោលភ្លើងនោះមានឆ្លងចរន្តអគ្គិសនី ហើយក៏បានរាយការណ៍ទៅសមត្ថកិច្ចឱ្យបានដឹងភ្លាមៗដែរ ។
សមត្ថកិច្ចបានចុះទៅកាន់កន្លែងកើតហេតុដើម្បីពិនិត្យ ក្រោយពីទទួលព័ត៌មាននេះ ។ បើតាមសមត្ថកិច្ចឱ្យដឹងថា បង្គោលភ្លើងនោះមានបំពាក់ប្រអប់កុងទ័រគីឡូភ្លើង ហើយអាចមានខ្សែដាច់រលាត់ទើបមានឆ្លងចរន្តបែបនេះ ។ ភ្លាមៗនោះដែរ ក៏បានរាយការណ៍ទៅខាងក្រុមហ៊ុនអគ្គិសនីឱ្យទៅត្រួតពិនិត្យបង្គោលភ្លើង និងដោះស្រាយជាមួយម្ចាស់គោ ។ជាមួយគ្នានេះ ទាំងសមត្ថកិច្ច ទាំងប្រជាពលរដ្ឋ បានស្នើឱ្យក្រុមហ៊ុនអគ្គិសនីចុះត្រួតពិនិត្យឡើងវិញនូវខ្សែបណ្ដាញអគ្គិសនីដែលមានបំពាក់កុងទ័រភ្លើងតាមបង្គោលភ្លើង ឬ
តាមកន្លែងដែលមានភាពស្មុគស្មាញ ចៀសវាងកុំឱ្យមានបញ្ហាផ្សេងៗដែលអាចកើតឡើងដោយយថាហេតុ ព្រោះពេលនេះជារដូវភ្លៀងធ្លាក់ ដែលអាចធ្វើឱ្យខ្សែភ្លើងឆ្លងចរន្តបង្កគ្រោះថ្នាក់ដល់មនុស្សនិងសត្វ ពាហ នៈគ្រប់ពេល ៕
ចែករំលែកព័តមាននេះ