រាជធានីភ្នំពេញ ៖ មជ្ឈមណ្ឌលពាណិជ្ជកម្ម វឌ្ឍនៈ កាពីតាល ដែលជាអគារដ៏ខ្ពស់ស្កឹមស្កៃជាងគេមួយនៅកណ្ដាលទីក្រុងភ្នំពេញ និងត្រូវបានដាក់រហ័សនាមថា «ចក្កវាឡប្លែកគេ» បានសម្ពោធជាផ្លូវការហើយកាលពីរសៀលថ្ងៃទី២៦ ឧសភា…
រាជធានីភ្នំពេញ ៖ មជ្ឈមណ្ឌលពាណិជ្ជកម្ម វឌ្ឍនៈ កាពីតាល ដែលជាអគារដ៏ខ្ពស់ស្កឹមស្កៃជាងគេមួយនៅកណ្ដាលទីក្រុងភ្នំពេញ និងត្រូវបានដាក់រហ័សនាមថា «ចក្កវាឡប្លែកគេ» បានសម្ពោធជាផ្លូវការហើយកាលពីរសៀលថ្ងៃទី២៦ ឧសភា ក្រោមអធិបតីភាពដ៏ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ។
អគារនេះមានកម្ពស់៣៩ជាន់ ស្មើនឹងកម្ពស់សរុប១៨៦ម៉ែត្រ គឺជាអគារពាណិជ្ជកម្ម និងបណ្តុំសេវាកម្មចម្រុះជាច្រើនដូចជា ទីតាំងសម្រាប់ប្រើប្រាស់ធ្វើជាការិយាល័យ សណ្ឋាគារ ភោជនីយដ្ឋាន ផ្សារទំនើប ព្រមទាំងមានហាងលក់ទំនិញម៉ាកល្បីៗលំដាប់អន្តរជាតិជាច្រើនទៀត ដែលសរុបទឹកប្រាក់វិនិយោគប្រមាណ២៥០លានដុល្លារអាមេរិក ។
ថ្លែងនៅក្នុងពិធីសម្ពោធនាថ្ងៃនោះ សម្ដេចតេជោ ហ៊ុន សែន បានលើកឡើងពីវឌ្ឍនភាព និងការអភិវឌ្ឍរាជធានីភ្នំពេញ ដែលកើតចេញពីការខិតខំប្រឹងប្រែងរបស់យើងទាំងអស់គ្នា ក៏បានប្រែក្លាយទីក្រុងភ្នំពេញ ក៏ដូចជាប្រទេសកម្ពុជាទាំងមូលមានការអភិវឌ្ឍ និងរីកចម្រើនដូចសព្វថ្ងៃ ។ ជាមួយគ្នានេះ សម្ដេចតេជោក៏បានបង្ហាញនូវក្ដីរីករាយ និងមានមោទនភាពចំពោះប្រទេសជាតិ ដែលមានអគារខ្ពស់ៗដូចជាអគារវឌ្ឍនៈ កាពីតាល នេះ ហើយក៏ជាមោទនភាពមួយរបស់រាជធានីភ្នំពេញ ដែលមានការអភិវឌ្ឍរីកចម្រើនជាបន្តបន្ទាប់ ។
សម្តេចតេជោថ្លែងថា ៖« វាមិនមែនជាការងាយស្រួលទេ នៅក្នុងការដឹកនាំប្រទេសមួយដែលចេញពីភាពខ្ទេចខ្ទាំ ហើយវាកាន់តែពិបាកទៅទៀត នៅពេលដែលប្រទេសនេះត្រូវទទួលបន្តនូវមរតកសង្គ្រាមបែកបាក់ ព្រមទាំងការហ៊ុមព័ទ្ធដោយអយុត្តិធម៌ពីសំណាក់ខាងក្រៅ » ។
សម្តេចបន្តថា ៖« ការហ៊ុមព័ទ្ធនេះ មិនបានខ្ទប់ដង្ហើមយើងឲ្យស្លាប់នោះទេ ខ្ញុំបានប្រើប្រាស់វិស័យឯកជន ដើម្បីទម្លាយរបងក្នុងការធ្វើទំនាក់ទំនងវិស័យពាណិជ្ជកម្ម និងទាក់ទាញការវិនិយោគពីខាងក្រៅ ហើយអ្នកដែលស្រែកខ្លាំងជាងគេអំពីការដាក់ទណ្ឌកម្មចំពោះកម្ពុជា ក៏ជាអ្នកដែលរកស៊ីជាមួយកម្ពុជាជាច្រើនផងដែរ។ ដូច្នេះ ចំណុចនេះក៏ត្រូវមានបទពិសោធន៍របស់យើងដែលហៅថា យើងបានចាប់ផ្តើមងើបឈរឡើង ហើយត្រូវគេចាប់ជ្រមុជក្បាលទៅក្នុងទឹក ដើម្បីឲ្យយើងស្លាប់ទៅវិញ ក៏ប៉ុន្តែយើងមិនអាចទទួលយកសេចក្តីស្លាប់នោះទេ ព្រោះថា បើមានការវិលត្រឡប់នៃរបបប៉ុលពត យើងកាន់តែគ្រោះថ្នាក់ជាងនេះទៅទៀត។ ដូច្នេះ កិច្ចខិតខំប្រឹងប្រែងរបស់យើង គឺយើងបានសម្រេចគោលដៅ ហើយខ្ញុំពិតជាមានមោទនភាព ដោយសារជនរួមជាតិរបស់ខ្ញុំនៅទីនេះបានរួមជាមួយខ្ញុំ ងើបឈរឡើងទាំងលំបាកលំបិន » ។
សម្តេចតេជោ ហ៊ុន សែន ក៏បានថ្លែងការកោតសរសើរចំពោះការខិតខំប្រឹងប្រែងរបស់ម្ចាស់ក្រុមហ៊ុនវឌ្ឍនៈ ដែលចាប់ផ្តើម២នាក់ប្តីប្រពន្ធ ដំបូងឡើយ គ្រាន់តែជាអ្នកលក់អំបោះហុងប៉ុណ្ណោះ ក៏ប៉ុន្តែដោយសារតែការខិតខំប្រឹងប្រែង និងការព្យាយាម ស្របពេលដែលប្រទេសកម្ពុជាមានសុខសន្តិភាព ទើបធ្វើឲ្យពួកគាត់ទទួលបាននូវភាពជោគជ័យដល់សព្វថ្ងៃនេះ ។
សម្ដេចតេជោថ្លែងថា ៖« អគារនេះ បានចាប់ផ្ដើមសាងសង់ឡើង ស្របពេលដែលវិបត្តិសេដ្ឋកិច្ច ហិរញ្ញវត្ថុបានចាប់ផ្ដើម ។ បើសិនមិនអាចមានអគារនេះកើតឡើង ខ្ញុំគិតថា វាអាចជាការបរាជ័យមួយសម្រាប់ខ្ញុំដែរ ក៏ប៉ុន្ដែតាមរយៈការខិតខំរបស់វឌ្ឍនៈ គ្រុប បានបង្កើតអគារវឌ្ឍនៈនេះនៅក្នុងពេលវេលាដ៏លំបាក ព្រោះនៅពេលវិស័យអចលនទ្រព្យនៅកម្ពុជាចាប់ផ្ដើមទ្រឹង ប៉ុន្ដែអគារវឌ្ឍនៈនៅតែបន្ដកើតឡើង ហើយចេញជារូបរាងនៅពេលនេះ ។ ដូច្នេះ ខ្ញុំពិតជាមានអំណរសាទរ និងកោតសរសើរចំពោះវឌ្ឍនៈ គ្រុប ដែលបានប្រឹងប្រែងរួមចំណែកកសាងនូវអគារល្អៗ ដែលបង្ហាញពីស្នាដៃកូនខ្មែរ បង្ហាញពីវិនិយោគិនខ្មែរដែលបានប្រឹងប្រែងងើបពីគំនរផេះផង់ ដើម្បីនាំមកនូវវឌ្ឍនភាព រួមជាមួយក្រុមហ៊ុនដទៃទៀតដែលមាននៅក្នុងប្រទេសកម្ពុជា និងដៃគូវិនិយោគមកពីក្រៅប្រទេស ដែលធ្វើឲ្យប្រទេសយើងបានប្រែមុខមាត់យ៉ាងខ្លាំងពីទីក្រុងភ្នំពេញ ដែលក្នុងឆ្នាំ១៩៧៩ មានត្រឹមតែប្រមាណជាង៣០០គីឡូម៉ែត្រការ៉េ បានឈានទៅដល់ជាង៦០០គីឡូម៉ែត្រការ៉េទៅហើយ » ។
ទោះបីជាពេលនេះ កម្ពុជារីកចម្រើនប៉ុណ្ណេះក៏ដោយ ក៏កម្ពុជានៅតែត្រូវការការវិនិយោគបន្ថែមទៀត ដោយគ្មានការរើសអើង ឬបែងចែករវាងអ្នកនៅក្នុង ឬក្រៅស្រុក ដើម្បីឲ្យប្រទេសមានការវិវឌ្ឍរីកចម្រើនបន្ថែមទៀត ។
សម្តេចតេជោបញ្ជាក់ថា ៖« នៅមិនទាន់ស្កប់ស្កល់សម្រាប់យើងទេ យើងត្រូវទាក់ទាញនូវការវិនិយោគបន្ថែមពីអ្នកទាំងអស់គ្នា ពិសេសវិនិយោគិនក្នុងស្រុក ។ ខ្ញុំចង់ឲ្យអ្នកទាំងអស់គ្នាប្រើប្រាស់ឱកាសដែលយើងមានដោយកម្របានមកពីសុខសន្តិភាពនៅក្នុងប្រទេសរបស់យើងដែលបានបាត់បង់រាប់សិបឆ្នាំ ឬរហូតរាប់រយឆ្នាំមកហើយនោះបន្តការអភិវឌ្ឍតទៅទៀត តាមរយៈការវិនិយោគសំខាន់ទៅលើអ្វីដែលជាមុខសញ្ញាសម្រាប់ការវិនិយោគ ហើយខ្ញុំពិតជាមានមោទនភាពជាមួយនឹងការរីកចម្រើនទាំងនេះ ។ ខ្ញុំសង្ឃឹមថា វឌ្ឍនៈ គ្រុប នឹងបន្តឈានឡើងតទៅទៀតជាមួយនឹងក្រុមហ៊ុននៅក្នុងប្រទេសរបស់យើង ដែលមកដល់ពេលនេះ មានរាប់ម៉ឺនសហគ្រាសបានកើតឡើងនៅទូទាំងប្រទេស។ គ្រាន់តែក្រុមហ៊ុនមួយនេះ បានដោះស្រាយការងារធ្វើរហូតទៅដល់ជាង២ម៉ឺននាក់សម្រាប់យុវជនរបស់យើង » ។
ខ្លឹមសារសំខាន់ដែលគួរឲ្យកត់សម្គាល់ នៅក្នុងឱកាសដ៏មហាឧឡារិកអធិកអធមនេះដែរ លោកជំទាវឧកញ៉ា ឈុន លាង សហស្ថាបនិកវឌ្ឍនៈ គ្រុប បានថ្លែងថា អគារវឌ្ឍនៈគ្រុប បានរួមចំណែកកាត់បន្ថយអត្រានិកម្មភាពនៅប្រទេសកម្ពុជា ដោយបានផ្តល់ការងារដល់ប្រជាពលរដ្ឋខ្មែរចំនួន២៦.២៨០នាក់ ដែលកំពុងធ្វើការស្របតាមលក្ខខណ្ឌ និងបទប្បញ្ញត្តិនៃច្បាប់ការងារយ៉ាងពេញលេញ ហើយបានចូលរួមបង្កើតអាជីវកម្មថ្មី ដែលជាប្រភពនៃការប្រមូលពន្ធដល់រាជរដ្ឋាភិបាល ។
លោកជំទាវថ្លែងថា ដើម្បីចូលរួមចំណែកលើកកម្ពស់កិត្យានុភាពជូនជាតិមាតុភូមិ វឌ្ឍនៈ គ្រុប បានសម្រេចចិត្តយ៉ាងមោះមុតក្នុងការវិនិយោគស្ថាបនាមជ្ឈមណ្ឌលពាណិជ្ជកម្មវឌ្ឍនៈកាពីតាល នេះឡើងក្នុងគោលបំណងសំខាន់ៗដោយមិនគិតពីផលប្រយោជន៍ផ្ទាល់ខ្លួនដូចខាងក្រោម ៖
១-ការបង្ហាញឲ្យឃើញពីជំនឿចិត្តខ្ពស់ចំពោះរាជរដ្ឋាភិបាល ក្រោមការដឹកនាំដ៏ខ្ពង់ខ្ពស់ ប្រកបដោយគតិបណ្ឌិត បញ្ញាញាណរបស់សម្តេចតេជោ នាយករដ្ឋមន្ត្រី ។
២-ការរួមចំណែកជាមួយរាជរដ្ឋាភិបាលដើម្បីពង្រឹង និងផ្តល់ទំនុកចិត្តដល់វិនិយោគិននានាលើវិស័យអចលនទ្រព្យ ក៏ដូចជាចូលរួមក្នុងការអភិវឌ្ឍវិស័យសេដ្ឋកិច្ចជាតិ ។
៣-ថ្វីដ្បិតតែព្រះរាជាណាចក្រកម្ពុជាទើបតែងើបចេញពីភ្នក់ភ្លើងសង្គ្រាម ខ្មែរយើងក៏អាចសម្រេចកសាងបាននូវសំណង់អគារដ៏ប្រណីតស្កឹមស្កៃ ដែលបង្ហាញអំពីអត្តសញ្ញាណនៃការរស់នៅបែបស៊ីវិល័យ លើកស្ទួយសោភ័ណភាពនៃរាជធានីភ្នំពេញ និងបង្ហាញពីភាពរីកចម្រើនរបស់ប្រទេសជាតិ ។
៤-ការបង្ហាញពីការប្តេជ្ញាចិត្តដ៏មុតមាំរបស់វឌ្ឍនៈ គ្រុប ដើម្បីបង្ហាញដល់វិនិយោគិនក្នុងនិងក្រៅប្រទេសថា យើងខ្ញុំជាអ្នកវិនិយោគក្នុងស្រុកមួយដែលមិនចាកឆ្ងាយពីមាតុភូមិ ទោះក្នុងកាលៈទេសៈណាក៏ដោយ ។
គួរបញ្ជាក់ថា មជ្ឈមណ្ឌលពាណិជ្ជកម្មវឌ្ឍនៈ កាពីតាល បានចាប់ផ្ដើមដំណើរការសាងសង់ក្នុងឆ្នាំ២០១០ គ្រាដែលវិបត្តិសេដ្ឋកិច្ច ហិរញ្ញវត្ថុសកលបានចាប់ផ្ដើម និងបញ្ចប់ការសាងសង់ទាំងស្រុងកាលពីឆ្នាំ២០១២ ។ អគារនេះត្រូវបានបែងចែកជា៣ផ្នែក គឺជាន់សម្រាប់ផ្សារទំនើប, ជាន់ទីតាំងសម្រាប់ការិយាល័យជួល និងជាន់សម្រាប់សណ្ឋាគារលំដាប់ផ្កាយ៥ Rosewood ៕
ចែករំលែកព័តមាននេះ