ខេត្តបន្ទាយមានជ័យ ៖ ឃាតករសម្លាប់់មនុស្សទម្លាក់ចូលស្រះទឹក ត្រូវចាប់ខ្លួនបានហើយ កាលពីវេលាម៉ោង០៨ និង៣០នាទីព្រឹកថ្ងៃទី២៧ ឧសភា ត្រង់នៅភូមិជំទាវ ឃុំប្ញស្សីក្រោក ស្រុកមង្គលបុរី គឺឈ្មោះ
អុីវ ប៊ុនម៉ៅ ភេទប្រុស អាយុ៣២ឆ្នាំ រស់នៅក្នុងភូមិ-ឃុំខាងលើ ។ លោកឧត្តមសេនីយ៍ត្រី សិទ្ធិ ឡោះ ស្នងការរងនគរបាលខេត្តបានឲ្យដឹងថា កាលពីវេលាម៉ោង០៦និង៣០នាទីព្រឹកថ្ងៃទី២៥ ខែឧសភា នៅភូមិជំទាវ ឃុំឫស្សីក្រោក ស្រុកមង្គលបុរី អ្នកស្រុកបានប្រទះឃើញសពបុរសម្នាក់នៅក្នុងទឹកស្រះខាងត្បូងរោងការប្រមាណ២០០ម៉ែត្រ។ ភ្លាមៗ ក៏បានរាយការណ៍ជូននគរបាលជំនាញចុះទៅស្រង់សពមកពិនិត្យឃើញមានស្នាមវាយជាច្រើនកន្លែង ហើយក៏រកឃើញកំណាត់មែកឈើប្រវែងជិត១ម៉ែត្រដែលជាឧបករណ៍វាយជនរងគ្រោះផងដែរ ។
លោកស្នងការរងថ្លែងថា ក្រោយពិនិត្យសពជនរងគ្រោះឃើញថា នេះជាករណីឃាតកម្មហើយអូសសពយកមកទម្លាក់ទឹកស្រះ លុះព្រឹកឡើងទើបមានអ្នកស្រុកប្រទះឃើញនិងស្រាវជ្រាវរកសាច់ញាតិ ។ តាមការសន្និដ្ឋាន ឃាតកម្មនេះអាចកើតឡើងអំឡុងម៉ោង១១យប់ថ្ងៃទី២៤ ខែឧសភា ។ លោកស្នងការរង សិទ្ធិ ឡោះ ថ្លែងទៀតថា ក្រោយពេលស្រាវជ្រាវរកសាច់ញាតិនិងក្រុមគ្រួសារក៏បានឲ្យដឹង ជនរងគ្រោះបានចេញពីផ្ទះទៅផឹកស៊ីនៅរោងមង្គលការអ្នកជិតខាងក្នុងភូមិកាលពីវេលាម៉ោង៦ល្ងាចថ្ងៃទី២៤ ខែឧសភា ហើយរហូតដល់ម៉ោង១១យប់មិនឃើញមកផ្ទះវិញក៏មានការតាមរកដែរ ។ ឯអ្នកនៅរោងការបានប្រាប់ថា ជនរងគ្រោះក្រោយពីផឹកស៊ីស្រវឹងក៏ចេញទៅផ្ទះវិញបាត់ហើយ ។ លុះដល់ព្រឹកឡើងក៏ទទួលព័ត៌មានថា មានគេប្រទះឃើញសពនៅក្នុងស្រះទឹក ហើយតាមរយៈការស្រាវជ្រាវរបស់សមត្ថកិច្ចគឺជាអំពើសម្លាប់់ទម្លាក់ទឹកស្រះ ។លោកស្នងការរងបញ្ជាក់ថា ក្រោយពេលមានករណីឃាតកម្មកើតឡើង លោកឧត្តមសេនីយ៍ទោ អាត់ ខែម ស្នងការនគរបាលខេត្ត បានចាត់កម្លាំងនគរបាលជំនាញឲ្យចុះស្រាវជ្រាវ ហើយកំណត់បានមុខសញ្ញាក៏ឈានដល់ឃាត់ខ្លួនជនសង្ស័យជាឃាតករឈ្មោះ អុីវ ប៊ុនម៉ៅ ។
តាមចម្លើយសារភាពថា រូបគេពិតជាបានសម្លាប់់ជនរងគ្រោះមែន ដោយសារពេលផឹកស៊ីស្រវឹងនៅរោងការមានទំនាស់ពាក្យសម្តីគ្នា រហូតជ្រុលដៃនិងឡើងជង្គង់មកលើរូបគេផង ទើបរូបគេខឹងក៏លួងលោមបបួលជូនទៅផ្ទះ ។ លុះចេញពីរោងការបានប្រមាណជិត២០០ម៉ែត្រ រូបគេក៏កាច់មែកចាមរីនៅក្បែរផ្លូវប៉ុនកដៃវាយជនរងគ្រោះបណ្តាលដួលសន្លប់ រួចហើយអូសទម្លាក់ទឹកស្រះ ទើបបណ្តាលឱ្យឈ្លក់ទឹកស្លាប់ ហើយរូបគេក៏វិលត្រឡប់ទៅរោងការវិញ ។ លោកស្នងការបញ្ជាក់ថា យោងតាមចម្លើយសារភាពនិងវត្ថុតាងនៃអំពើឃាតកម្ម ជនសង្ស័យត្រូវបានកសាងសំណុំរឿងបញ្ជូនទៅសាលាដំបូងខេត្ត ៕
ចែករំលែកព័តមាននេះ