រាជធានីភ្នំពេញ ៖ ស្ត្រីម្នាក់បើករថយន្តមួយគ្រឿងទាំងភ្លើងស្តុបក្រហមក៏ជ្រុលទៅបុករថយន្តព្រូសដូចគ្នាចំផ្នែកខាងស្តាំ បណ្តាលឲ្យរងការខូចខាតដាច់កាឡេទៅមុខលែងរួច ហេតុការណ៍នេះបានកើតឡើងកាលពីវេលាម៉ោង១១និង១៥នាទីយប់ ថ្ងៃទី២៧ ខែឧសភា ឆ្នាំ២០១៨ តាមបណ្តោយផ្លូវកម្ពុជាក្រោមកែងផ្លូវ១០៧ នៅចំណុចមុខភោជនីដ្ឋានថ្មដា ស្ថិតនៅក្នុងសង្កាត់មនោរម្យ ខណ្ឌ៧មករា ។
សាក្សីដែលឃើញហេតុការណ៍បានឲ្យដឹងថា មុនពេលកើតហេតុគេបានឃើញបុរសម្នាក់បើករថយន្តមួយគ្រឿង ពណ៌ទឹកប្រាក់ ពាក់ស្លាកលេខភ្នំពេញ2AA-4786 បើកបរតាមបណ្តោយផ្លូវ១០៧ ក្នុងទិសដៅពីត្បូងទៅជើង ខណៈពេលបើកមកដល់ចំណុចកើតហេតុខាងលើភ្លើងស្តុបពណ៌ខៀវក៏ជាន់ហ្គាបើកឆ្លងស្តុបទៅត្រង់ក្នុងល្បឿនលឿនក៏ស្រាប់តែមានស្ត្រីម្នាក់បើករថយន្តមួយគ្រឿងទៀតម៉ាកព្រូសដូចគ្នា ពណ៌ក្រហម ពាក់ស្លាកលេខបាត់ដំបង2B-1816 បើកបរនឹងធ្វើដំណើរមកតាមបណ្តោយផ្លូវកម្ពុជាក្រោម ក្នុងទិសដៅពីកើតទៅលិច តែភ្លើងស្តុបក្រហមហើយនៅតែបើកមកទៀតធ្វើឲ្យរថយន្តទាំងសងខាងចាប់មិនទាន់ដូចគ្នា ក៏ជ្រុលទៅបុកគ្នាចំពីមុខនឹងខាងស្តាំ បណ្តាលឲ្យរងការខូចខាតរថយន្តព្រូសពណ៌ទឹកប្រាក់ ក្រពឹតផ្នែកខាងមុខ និងដាច់កាឡេកង់ ។
រីឯខាងរថយន្តព្រូសពណ៌ក្រហមវិញ ខ្ទេចអស់មួយកំណាត់ខាងមុខ ភ្លាមៗនោះដែរខាងម្ចាស់រថយន្តព្រូសពណ៌ទឹកប្រាក់ ទាមទារសំណងចំនួន៣០០ដុល្លារ ក្រោយមកមានសមត្ថកិច្ចចុះធ្វើការវាស់វែង ប៉ុន្តែខាងភាគីទាំងសងខាងសុំចរចាគ្នាមួយជំហាន ។
ក្រោយពេលកើតហេតុរថយន្តភាគីទាំងសងខាងសុខចិត្តយករថយន្តយកទៅជួសជុលរៀងៗខ្លួន ដើម្បីបញ្ចប់រឿងនៅនឹងកន្លែងកើតហេតុតែម្តង ៕
ចែករំលែកព័តមាននេះ