ប្រទេសវេណេស៊ុយអេឡា ៖ អ្នកទោសអាមេរិកម្នាក់ និងភរិយារបស់គេ ដែលជាប់ឃុំឃាំងរយៈពេលជិត២ឆ្នាំមកហើយ នៅក្រុងការ៉ាកាស់បានមកដល់សហរដ្ឋអាមេរិកកាលពីថ្ងៃទី២៦ ឧសភា ក្រោយពីរដ្ឋាភិបាលវេណេស៊ុយអេឡា ដោះលែងពួកគេ។
រដ្ឋាភិបាលនោះបានហៅការសម្រេចចិត្តនេះថា ជាកាយវិការបើកចំហមួយ ចំពោះក្រុងវ៉ាស៊ីនតោន។
វិធានការនេះកើតមានក្រោយរយៈពេល១សប្ដាហ៍នៃការដំឡើងវោហាសាស្ត្ររបស់អាមេរិក ដែលចាត់ទុកការជាប់ឆ្នោតជាថ្មីរបស់ប្រធានាធិបតី សង្គមនិយមលោកនីកូឡាស់ម៉ាឌូរ៉ូ ថា ជាការបោកបន្លំមួយហើយដាក់ទណ្ឌកម្មថ្មីៗ។
ភ្លាមៗតាម TWITTER អនុប្រធានាធិបតីអាមេរិក លោក MIKE PENCE អះអាងថា បណ្ដាទណ្ឌកម្មអាមេរិក នឹងនៅតែរក្សាទុក ទោះបីមានការដោះលែងលោក JOSHUA HOLT ក្ដី រហូតទាល់តែមានការវិលត្រឡប់វិញនៃលទ្ធិប្រជាធិបតេយ្យនៅវេណេស៊ុយអេឡា។ ចំណែករដ្ឋមន្ត្រីការបរទេសអាមេរិកលោក MIKE POMPEO អះអាងថា នយោបាយអាមេរិកចំពោះវេណេស៊ុយអេឡា ពុំមានការផ្លាស់ប្ដូរឡើយ។
លោក JOSHUA HOLT និង ភរិយានាងTHAMARA ពេលមកដល់ក្រុងវ៉ាស៊ីនតោននាយប់ថ្ងៃទី២៦ ឧសភា បានមកជួបជុំសាច់ញាតិគ្រួសារ ហើយបន្ទាប់មកត្រូវបានទទួលនៅសេតវិមានដោយ លោកដូណាល់ត្រាំ ដែលនិយាយថា លោកពិតជាមានក្ដីក្លាហានមែន។
លោក HOLT អាយុ២៦ឆ្នាំ បានទៅកាន់វេណេស៊ុយអេឡា កាលពីខែមិថុនា ឆ្នាំ២០១៦ ដើម្បីមករៀបការជាមួយនារីម្នាក់ដែលស្គាល់គ្នាតាមអ៊ីនធើរណេត។ បន្តិចក្រោយមកអ្នកទាំង២ត្រូវចាប់ខ្លួនជាប់ចោទថា ចូលរួមក្នុងការរួមគំនិតប្រដាប់អាវុធ បង្កអស្ថេរភាពដល់រដ្ឋាភិបាលលោកម៉ាឌូរ៉ូ៕
ចែករំលែកព័តមាននេះ