ខេត្តក្រចេះ៖ ជនកំណាចជាកូនប្រុសមានចរឹតតិរច្ឆានម្នាក់ដែលបានយកកូនកាំបិតចុងស្រួចចាក់ទៅលើបុរសរងគ្រោះជាឪពុកបង្កើតចំគល់ភ្លៅខាងស្តាំ បណ្តាលឲ្យហូរឈាមរហូតស្លាប់ ដោយសារទំនាស់ក្នុងគ្រួសារ ហើយត្រូវបាននគរបាលស្រុកស្នួលស្រាវជ្រាវចាប់ខ្លួនបាន ក្រោយរត់គេចខ្លួនអស់រយៈពេល២ថ្ងៃ។ អធិការនគរបាលស្រុកស្នួលបានបញ្ជាក់ថា ជនសង្ស័យជាកូនឈ្មោះ គឿន ផារី…
ខេត្តក្រចេះ៖ ជនកំណាចជាកូនប្រុសមានចរឹតតិរច្ឆានម្នាក់ដែលបានយកកូនកាំបិតចុងស្រួចចាក់ទៅលើបុរសរងគ្រោះជាឪពុកបង្កើតចំគល់ភ្លៅខាងស្តាំ បណ្តាលឲ្យហូរឈាមរហូតស្លាប់ ដោយសារទំនាស់ក្នុងគ្រួសារ ហើយត្រូវបាននគរបាលស្រុកស្នួលស្រាវជ្រាវចាប់ខ្លួនបាន ក្រោយរត់គេចខ្លួនអស់រយៈពេល២ថ្ងៃ។
អធិការនគរបាលស្រុកស្នួលបានបញ្ជាក់ថា ជនសង្ស័យជាកូនឈ្មោះ គឿន ផារី អាយុ២៦ឆ្នាំ ជាកូនប្រុសទី៣ ក្នុងចំណោមបងប្អូន៧នាក់ ក្នុងនោះស្រី៤នាក់ ។ ជនសង្ស័យនេះត្រូវចាប់ខ្លួនបានកាលពីថ្ងៃទី ២៥ ខែឧសភា បន្ទាប់ពីរូបគេបានចាក់សម្លាប់ទៅលើជនរងគ្រោះដែលជាឪពុកឈ្មោះ រិន គឿន អាយុ៥៩ឆ្នាំ ព្រោះតែរឿងទំនាស់ក្នុងគ្រួសារនៅនឹងលំនៅឋានរបស់ជនរងគ្រោះក្នុងភូមិក្រសាំង ឃុំស្នួល ស្រុកស្នួល។
គួររំលឹកថា ជនរងគ្រោះជាឪពុកដែលស្លាប់ដោយសារត្រូវជនសង្ស័យជាកូនចាក់នឹងកាំបិតចុងស្រួចចំគល់ភ្លៅខាងស្តាំ នៅពេលបុរសរងគ្រោះជាឪពុកដេញវាយជនសង្ស័យជាកូន ក៏ព្រោះតែផ្តើមចេញពីរឿងទំនាស់ក្នុងគ្រួសារកាលពីយប់ថ្ងៃទី២៣ ឧសភា។
នគរបាលបានឲ្យដឹងទៀតថា នៅយប់កើតហេតុ ជនសង្ស័យស្រវឹងស្រា និងបានឈ្លោះប្រកែកគ្នាជាមួយនឹងប្អូនស្រីសាច់ថ្លៃ។ ពេលឈ្លោះប្រកែកគ្នា ជនសង្ស័យបានយកចំពាមកៅស៊ូបាញ់ទៅលើប្អួនស្រីសាច់ថ្លៃនោះ តែមិនត្រូវ។ ឃើញបែបនេះ បុរសរងគ្រោះជាឳពុកបានស្តីបន្ទោសជនសង្ស័យជាកូន និងបានដេញវាយជនសង្ស័យរហូតប្រតាយប្រតប់គ្នានៅលើផ្លូវលំមួយកន្លែង ហើយជនសង្ស័យជាកូនបានយកកាំបិតចុងស្រួចចាក់ទៅលើជនរងគ្រោះជាឪពុក ចំគល់ភ្លៅខាងស្តាំ បណ្តាលឲ្យជនរងគ្រោះជាឪពុកហូរឈាមជោកដី ហើយបានស្លាប់ក្រោយពេលបញ្ជូនមកសង្គ្រោះ ៕
ចែករំលែកព័តមាននេះ