ខេត្តសៀមរាប ៖ បងប្អូនយុវជន យុវនារី និងប្រជាពលរដ្ឋមកពីអតីតគណបក្សសង្គ្រោះជាតិ និងសមាជិកកសាងថ្មី នៅសង្កាត់គោកចកចំនួន៤០០នាក់ត្រូវបានធ្វើពិធីប្រកាសបញ្ជូលជាសមាជិកសមាជិកាគណបក្សប្រជាជនកម្ពុជានាថ្ងៃទី២៧ ខែឧសភា ឆ្នាំ២០១៨ ។
ក្រោមអធិបតីភាពលោកបណ្ឌិត ឃឹម ប៊ុនសុងសមាជិកគណៈកម្មាធិការកណ្តាល និងជាប្រធានគណៈកម្មាធិការនៃគណៈបក្សប្រជាជនខេត្ត និងជាប្រធានក្រុមការងារគណបក្សប្រជាជនកម្ពុជាខេត្ត ចុះជួយក្រុងសៀមរាប ព្រមទាំងសមាជិកគណៈកម្មាធិការគណបក្សប្រជាជនខេត្តជាច្រើនរូបទៀតដែលបានចូលរួម ។
បន្ទាប់ពីការអានសេចក្តីសម្រេចទទួលស្គាល់របស់គណៈកម្មាធិការគណបក្សប្រជាជនសង្កាត់គោកចក និងការប្រកាសបញ្ចូលប្រគល់សេចក្តីសម្រេចជូនដល់សមាជិកបក្សថ្មីទាំង ៤០០នាក់ ព្រមទាំងតំណាងសមាជិកថ្មីឡើង ធ្វើការប្តេជ្ញាចិត្តរួចមកមានប្រសាសន៍សំណេះសំណាលនោះលោកបណ្ឌិតឃឹម ប៊ុនសុង ក៏បានធ្វើការបញ្ជាក់ថា ដោយការយល់ឃើញច្បាស់របស់បងប្អូន និងក្មួយៗ ដែលមានការជឿជាក់លើការដឹកនាំដ៏ត្រឹមត្រូវរបស់គណបក្សប្រជាជនកម្ពុជា ហើយបានធ្វើការសុំមករួមរស់ជាមួយសមាជិកគណបក្សប្រជាជនកម្ពុជានាពេលនេះ ជាការសរបញ្ជាក់ឲ្យឃើញនូវរាល់សកម្មភាព និងបានបង្ហាញឲ្យឃើញថា គណបក្សប្រជាជនកម្ពុជាកាន់តែមានប្រជាប្រិយភាព ឧត្តមភាព ធ្វើឲ្យគណបក្សប្រជាជនកាន់តែមានការទទួលគាំទ្រយ៉ាងខ្លាំងក្លាពីស្រទាប់ប្រជាជនក្នុងពេលបោះឆ្នោតជ្រើសតាំងតំណាងរាស្ត្រនាពេលខាងមុខនេះ ។
ក្នុងនោះដែរលោកបណ្ឌិត ឃឹម ប៊ុនសុង ក៏បានលើកឡើងពីភាពរីកចម្រើននៃកិច្ចអភិវឌ្ឍន៍ប្រទេសជាតិរបស់គណបក្សប្រជាជនក្នុងអាណត្តិទី៥ ក្រោមកិច្ចដឹកនាំរបស់សម្តេចតេជោ ហ៊ុន សែន ព្រមទាំងមានការគាំទ្រពីសមាជិកសមាជិកាបក្សក្នុងការជ្រើសរើសបេក្ខភាពសម្តេចតេជោ ហ៊ុន សែន ជានាយករដ្ឋមន្ត្រីអាណត្តិទី៦ និងអាណត្តិក្រោយៗទៀតផងដែរ ។
លោកបណ្ឌិតក៏បានធ្វើការគូសបញ្ជាក់ផងដែរថា ការសម្រេចចិត្តជ្រើសរើសរបស់បងប្អូន គឺជាភាពយុត្តិធម៌បំផុត សម្រាប់បងប្អូនក្នុងការគាំទ្រនូវកម្មវិធីនយោបាយ និងលក្ខន្តិកៈគណបក្សប្រជាជនកម្ពុជា ដើម្បីរួមគ្នាធ្វើកិច្ចអភិវឌ្ឍន៍ជាតិឲ្យមានការរីកចម្រើនដូចបណ្តាប្រទេស ជឿនលឿនលើសកលលោក ។
ក្នុងនោះដែរលោកបណ្ឌិត ឃឹម ប៊ុនសុង ក៏បានលើកឡើងពីគោលការណ៍ទាំង១១ខ របស់គណបក្សប្រជាជនព្រមទាំងធ្វើការបញ្ជាក់នូវចំណុចមួយចំនួននៃលក្ខន្តិកៈរបស់គណបក្សប្រជាជនកម្ពុជាដែលមានសម្តេចតេជោ ហ៊ុន សែន ដែលជាកុលបុត្រខ្មែរដ៏ឆ្នើម រួមទាំងវីរជនមួយចំនួន ក្នុងការស្វែងរកនូវសុខសន្តិភាពពេញលេញជូនជាតិមាតុភូមិ ក្រោមគោលនយោ បាយឈ្នះៗ និងធ្វើឲ្យមានការអភិវឌ្ឍន៍រីកចម្រើនលើគ្រប់វិស័យ តាំងពីទីប្រជុំជនទៅដល់ជនបទ ។
លោកបណ្ឌិត ឃឹម ប៊ុនសុង បានបញ្ជាក់ជូនសមាជិកទាំងអស់ថា មានតែគណបក្សប្រជាជនកម្ពុជាទេ ដែលមិនដែលរត់ចោលប្រជាពលរដ្ឋ គឺតែងតែនៅរួមសុខរួមទុក្ខជាមួយប្រជាពលរដ្ឋ រឺឯគណបក្សផ្សេងមិនដែលធ្វើអ្វីសោះបានតែថា គឺតែងតែបង្កអសន្តិសុខ ញុះញង់បំពុលបរិយាកាសសង្គម ហើយគណបក្សសង្គ្រោះជាតិដែលតុលាការកំពូលបានធ្វើការរំលាយដោយសារមេបក្សរងការចោទប្រកាន់ជាជនក្បត់ជាតិផងដែរ ។
ក្នុងនោះលោកបណ្ឌិត ក៏បានអំពាវនាវដល់អាជ្ញាធរ មូលដ្ឋានសង្កាត់គោកចកត្រូវបន្តធ្វើអំពើល្អជាមួយពលរដ្ឋឲ្យបានកាន់តែបានល្អប្រសើរថែមទៀត ព្រមទាំងត្រូវផ្តល់សេវាសាធារណៈផ្សេងៗឲ្យបានឆាប់រហ័ស និងផ្សព្វផ្សាយឲ្យបានទូលំទូលាយនូវសេវាមិនបង់ប្រាក់ដូចជា សំបុត្រកំណើត សំបុត្រអាពាហ៍ពិពាហ៍ អត្តសញ្ញាណបណ្ណ សៀវភៅគ្រួសារជាដើម ដើម្បីឲ្យប្រជាពលរដ្ឋបានដឹងយល់ជ្រួតជ្រាបជៀសវាងមានការថ្នាំងថ្នាក់ណាមួយ ។ ក្នុងពិធីនោះដែរលោកបណ្ឌិតក៏បាននាំយកនូវវត្ថុអនុស្សាវរីយកំដរដៃជូនដល់បងប្អូនជាសមាជិកថ្មីទាំង៤០០នាក់ ម្នាក់ៗ២ម៉ឺនរៀលផងដែរ ៕
ចែករំលែកព័តមាននេះ