ខេត្តពោធិ៍សាត់ ៖ ប្រជាពលរដ្ឋពិសេសមន្ត្រីកងរាជអាវុធហត្ថផ្ទាល់តែម្តងដែលប្រើទឹកបឹង ត្រពាំង ប្រឡាយ ក្នុងភូមិអូរស្តៅ សង្កាត់ផ្ទះព្រៃ ក្រុងពោធិ៍សាត់ ជាប់ទីបញ្ជាការកងរាជអាវុធហត្ថខេត្ត បានសម្តែងការខឹងសម្បាយ៉ាងខ្លាំងចំពោះម្ចាស់រោងម៉ាស៊ីនកិនស្រូវឈ្មោះម៉េង ដែលបានបង្ហូរទឹកកខ្វក់ កាកសំណល់ផ្សេងៗពីរោងម៉ាស៊ីនចូលមកក្នុងបឹង ត្រពាំងនិងប្រឡាយនោះ ធ្វើឱ្យទឹកថ្លាក្លាយជាខ្មៅនិងស្អុយប្រើលែងកើត ។
លោកឧត្តមសេនីយ៍ត្រីអន សុខុន មេបញ្ជាការកងរាជអាវុធហត្ថខេត្តបានឱ្យដឹងថា កន្លងមកប្រជាពលរដ្ឋក្នុងភូមិនិងមន្ត្រីកងរាជអាវុធហត្ថដែលស្នាក់នៅក្នុងទីបញ្ជាការប្រើប្រាស់ទឹកបឹង ត្រពាំង និងប្រឡាយនោះសម្រាប់ងូត លាងរថយន្ត-ម៉ូតូ និងស្រោចដំណាំផ្សេងៗ កាត់បន្ថយការចំណាយថវិកាបានមួយកំរិត ។ ប៉ុន្តែឥឡូវនេះរោងម៉ាស៊ីនកិនស្រូវក្បែរនោះគេបានបង្ហូរទឹកប្រេងម៉ាស៊ីន និងកាកសំណល់ចូលបណ្តាលឱ្យខ្មៅកខ្វក់ និងមានក្លិនស្អុយសូម្បីតែគោ-ក្របីក៏ផឹកមិនកើតដែរ មិនតែប៉ុណ្ណោះបំពុលដល់បរិស្ថាន ងាប់ត្រីនិងជីវចំរុះក្នុងបឹងនោះទៀតផង ។
លោកមេបញ្ជាការបន្តទៀតថា ម្យ៉ាងវិញទៀត ពេលមានភ្ញៀវ ថ្នាក់ដឹកនាំឆ្លងកាត់ខេត្តចូលមកអង្គុយលេងឬកំពុងហូបបាយ ស្របពេលដែលរោងម៉ាស៊ីនកំពុងដំណើរការកិនស្រូវនោះគឺជួបបញ្ហាពីរ ទី១-ក្លិនស្អុយជះមកលើ ទី២-កម្ទេចធូលីអង្កាមរសាត់តាមខ្យល់មកចូលម្ហូបអាហារ ជាប់សក់ក្បាលនិងខោអាវសសំព្រុស ហើយលំបាកដល់ការដកដង្ហើមទៀតផង។ លោកអន សុខុន មានប្រសាសន៍ថា ម្ចាស់រោងម៉ាស៊ីនគួរតែមានកន្លែងស្តុកកាកសំណល់ក្នុងដីរបស់ខ្លួន មិនត្រូវបង្ហូរពាសវាលពាសកាលចូលបឹង ត្រពាំង និងប្រឡាយសាធារណៈបែបនេះទេ។ កន្លងមក លោកធ្លាប់ប្រាប់ទៅមន្ទីរជំនាញបរិស្ថានប៉ុន្មានដងដែរ ប៉ុន្តែគេគ្រាន់តែមកពិនិត្យមើលក៏ទៅវិញបាត់មិនឃើញចាត់ការអ្វីសោះ រហូតមកដល់ពេលនេះ ។
លោកថៃ ចន្ថា ប្រធានមន្ទីរបរិស្ថានខេត្តបានប្រាប់កោះសន្តិភាពថា រឿងរោងម៉ាស៊ីនកិនស្រូវបង្ហូរទឹកកខ្វក់ចូលទីសាធារណៈនៅភូមិអូរស្តៅនោះ យើងបានចុះទៅពិនិត្យមើលម្តងហើយ ព្រមទាំងបានធ្វើកិច្ចសន្យាឱ្យម្ចាស់រោងម៉ាស៊ីនបញ្ឈប់ការបង្ហូរទឹកកខ្វក់ចូលទីសាធារណៈជាបន្ទាន់ ព្រោះវាប៉ះពាល់ដល់បរិស្ថាន ។ កាលនោះ ម្ចាស់រោងម៉ាស៊ីនបានយល់ព្រមផ្តិតមេដៃតាមកិច្ចសន្យា ឯមន្ត្រីរបស់លោកក៏មិនបានតាមដានសកម្មភាពរោងម៉ាស៊ីនកិនស្រូវនោះដែរ ។ ក្រោយមក លោកបានសួរទៅលោកអន សុខុន គាត់ប្រាប់ថា អន់ថយជាងមុនច្រើន លោកក៏ឈប់ឱ្យមន្ត្រីទៅមើលទៀតព្រោះនឹកស្មានថាម្ចាស់រោងម៉ាស៊ីនធ្វើតាមកិច្ចសន្យា ។
បើតាមការសាកសួរម្ចាស់រោងម៉ាស៊ីនឱ្យដឹងថា ទឹកខ្មៅកខ្វក់នោះមិនមែនជាប្រេងម៉ាស៊ីនទេគឺទឹកដុតអង្កាមបាញ់ចំហាយទឹកកុំឱ្យម្រែងភ្លើងហុយទៅលើ ដូច្នេះវាត្រូវធ្លាក់កម្ទេចផេះហូរធ្លាក់តាមបំពង់សឺម៉ាំងទើបខ្មៅបែបនេះ។ លោកថៃ ចន្ថា បញ្ជាក់ថា បើពេលនេះម្ចាស់រោងម៉ាស៊ីនបង្ហូរទឹកកខ្វក់នោះចូលបឹង ត្រពាំងនិងប្រឡាយដែលជាទីសាធារណៈឡើងវិញ លោកនឹងបញ្ជូនមន្ត្រីជំនាញទៅពិនិត្យមើលម្តងទៀត ហើយបើណែនាំពីរលើកបីលើកមិនកែប្រែទេ លោកនឹងសុំគោលការណ៍ទៅក្រសួងឱ្យបញ្ឈប់រោងម៉ាស៊ីនកិនស្រូវនោះលែងឱ្យដំណើរការតែម្តង ។ ប្រភពព័ត៌មានពីប្រជាពលរដ្ឋឱ្យដឹងថា ម្ចាស់រោងម៉ាស៊ីនកិនស្រូវឈ្មោះម៉េង នោះ ជាគ្រូបង្រៀន ជាអ្នកមានចំណេះដឹង គេឯងគោរពគ្រប់គ្នា ហេតុអ្វីបានជាធ្វើខ្វះការគិតពិចារណា គិតតែប្រយោជន៍ផ្ទាល់ខ្លួន ធ្វើឱ្យប៉ះពាល់ដល់បរិស្ថានដែលជាទីសាធារណៈបែបនេះ ៕
ចែករំលែកព័តមាននេះ