ខេត្តមណ្ឌលគិរី ៖ ផ្សារសែនមនោរម្យដែលត្រូវបានអគ្គិភ័យឆាបឆេះស្ទើរទាំងស្រុង កាលពីពេលថ្មីនេះ ត្រូវបានរាជរដ្ឋាភិបាលក៏ដូចជា អាជ្ញាធរខេត្តមណ្ឌលគិរីបានរៀបចំសណ្តាប់ធ្នាប់ និងធ្វើការវាស់វែងដី ជូនពលរដ្ឋក្នុងផ្សារសែនមនោរម្យ ចំនួន២១១គ្រួសារ ស្ថិតនៅភូមិកណ្តាល សង្កាត់ស្ពានមានជ័យ ក្នុងក្រុងសែនមនោរម្យ ខេត្តមណ្ឌលគិរី នាថ្ងៃទី២៦ ខែឧសភា ឆ្នាំ២០១៨នេះ ។
ឯកឧត្តមស្វាយ សំអ៊ាង អភិបាលនៃគណៈអភិបាលខេត្តមណ្ឌលគិរីបានមានប្រសាសន៍ថា ការដែល មកជួបបងប្អូនអាជីករ និងប្រជាពលរដ្ឋនៅផ្សារសែនមនោរម្យ គឺដើម្បីពិនិត្យវឌ្ឍនភាពនៃដំណើរការរៀបចំ សណ្តាប់ធ្នាប់ក្នុងផ្សារឡើងវិញក៏ដូចជា ការផ្សព្វផ្សាយអំពីការសម្រេចរបស់រាជរដ្ឋាភិបាលក្នុងការផ្តល់ដី ផ្សារនេះជូន ។
ឯកឧត្តមអភិបាលខេត្តបានបញ្ជាក់ថា ដើម្បីឱ្យផ្សារសែនមនោរម្យនេះអាចដំណើរការបានក៏សូមឱ្យពលរដ្ឋ ទាំងអស់ត្រូវចូលរួមសហការជាមួយមន្ត្រីជំនាញ ក្នុងការរៀបផ្លូវឲ្យបានធំទូលាយរៀបចំប្រព័ន្ធលូ តភ្ជាប់អគ្គិសនី និងតភ្ជាប់ប្រព័ន្ធទឹកតាមផ្ទះ និងធ្វើការវាស់វែងដីជូនពលរដ្ឋដោយឥតគិតថ្លៃសេវា ដើម្បីរួមចំណែកក្នុងការកាត់បន្ថយការចំណាយរបស់ប្រជាពលរដ្ឋផងដែរ។ ជាងនេះទៅទៀត ឯកឧត្តម អភិបាលខេត្ត បានស្នើដល់ពលរដ្ឋ ត្រូវសហការជាមួយមន្ត្រីជំនាញ ក្នុងការបំពេញបែបបទឯកសារនានា ដើម្បីបានប័ណ្ណកម្មសិទ្ធដីស្របច្បាប់ ត្រូវដោះស្រាយទំនាស់ ដើម្បីធ្វើយ៉ាងណាឱ្យមន្ត្រីជំនាញ ចុះវាស់វែងដីជូនពលរដ្ឋបានឆាប់រហ័ស ។
តំណាងអាជីវករ និងប្រជាពលរដ្ឋក្នុងផ្សារសែនមនោរម្យក៏បានសម្ដែងការត្រេកអរយ៉ាងខ្លាំង ដែលអាជ្ញាធរខេត្ត ជាពិសេសរាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ព្រះរាជាណាចក្រកម្ពុជាដែលបានរៀបចំសណ្តាប់ធ្នាប់ ជាពិសេសដីផ្សារចែកជូនពលរដ្ឋ ជាង២០០គ្រួសារ បានប័ណ្ណកម្មសិទ្ធ (ប្លង់រឹង)ស្របច្បាប់ ។ អាជីវករក៏បានជូនពរដល់អាជ្ញាធរខេត្ត ក៏ដូចជា រាជរដ្ឋាភិបាល សូមមានសុខភាពល្អ ដើម្បីដឹកនាំប្រទេសជាតិឱ្យមានការអភិវឌ្ឍន៍រីកចម្រើនបន្ថែមទៀត ៕
ចែករំលែកព័តមាននេះ