រាជធានីភ្នំពេញ ៖ យោងតាមដីកាកោះរបស់លោកគី ឫទ្ធីចៅក្រម ស៊ើបសួរនៃសាលាដំបូងរាជធានីភ្នំពេញចុះថ្ងៃទី១៧ ខែឧសភា ឆ្នាំ២០១៨ ដែលកាន់សំណុំរឿងលោកកឹម សុខាអតីតប្រធានគណបក្សសង្គ្រោះជាតិបានចេញដីកាកោះសាក្សីចំនួន៨នាក់ទៀត ចូលបំភ្លឺនៅសាលាដំបូងរាជធានីភ្នំពេញពីថ្ងៃទី០៥…
រាជធានីភ្នំពេញ ៖ យោងតាមដីកាកោះរបស់លោកគី ឫទ្ធីចៅក្រម ស៊ើបសួរនៃសាលាដំបូងរាជធានីភ្នំពេញចុះថ្ងៃទី១៧ ខែឧសភា ឆ្នាំ២០១៨ ដែលកាន់សំណុំរឿងលោកកឹម សុខាអតីតប្រធានគណបក្សសង្គ្រោះជាតិបានចេញដីកាកោះសាក្សីចំនួន៨នាក់ទៀត ចូលបំភ្លឺនៅសាលាដំបូងរាជធានីភ្នំពេញពីថ្ងៃទី០៥ ដល់១៣ ខែមិថុនា ២០១៨ ក្នុងសំណុំរឿងលោកកឹម សុខាដែលត្រូវបានតុលាការចោទពីបទ«សន្ធិដ្ឋិភាពជាមួយបរទេស»ឬក្បត់ជាតិមាត្រា ៤៤៣នៃក្រមព្រហ្មទណ្ឌកម្ពុជា ។
សាក្សីទាំងនោះមាន១- លោកប៉ា ង៉ួនទៀងអាយុ៤៦ឆ្នាំ ២- លោក គ្រី សុង អាយុ៤៩ឆ្នាំ ៣ -លោកហេង ពិសិដ្ឋ អាយុ២៦ឆ្នាំ ៤- អ្នកស្រី ចក់ សុភាព អាយុ៣៣ឆ្នាំ ៥- លោក មាស គឹម សេង អាយុ៤៨ឆ្នាំ ៦- លោកកែវ រតនា អាយុ៣១ឆ្នាំ ៧ -លោកអឿ រីរ៉ាត់ អាយុ២៨ឆ្នាំ និង៨-លោក សៀ ភីរម្យ អាយុ៤៣ឆ្នាំ ។
សាក្សីទាំងនេះត្រូវចូលទៅកាន់សាលាដំបូងរាជធានីភ្នំពេញចាប់ពីថ្ងៃទី៥ ដល់ថ្ងៃទី១៣ ខែមិថុនា ឆ្នាំ២០១៨ ។ ទោះបីយ៉ាងណាសាក្សីមួយចំនួនត្រូវបានគេអះអាងថា មិនមានវត្តមាននៅក្នុងប្រទេសកម្ពុជាទេ គឺបានចាកចេញពីប្រទេសកម្ពុជា ក្រោយពេលលោកកឹម សុខាត្រូវបានចាប់ខ្លួន ។
ក្នុងនោះគេដឹងថា លោកប៉ា ង៉ួនទៀង អាយុ៤៦ឆ្នាំមានទីលំនៅបច្ចុប្បន្ននៅភូមិទ្រា សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញបានចាកចេញពីប្រទេសកម្ពុជា ។
គួរបញ្ជាក់ថា កាលពីពេលថ្មីៗនេះតុលាការធ្លាប់បានកោះលោកម៉ម សូណង់ដូ ប្រធានគណបក្សសំបុកឃ្មុំ សង្គមប្រជាធិបតេយ្យចូលបំភ្លឺជាសាក្សីដែរ ក្នុងសំណុំរឿងនេះ ។ តែលោកបានបដិសេធ និងបានចាកចេញទៅប្រទេសបាំង ។
លោក ឈឹម ផលវរុណ ប្រធានវិទ្យាស្ថានពលរដ្ឋវិជ្ជា និងជាអតីតបុគ្គលិកនៃមជ្ឈមណ្ឌលសិទ្ធិមនុស្សកម្ពុជាធ្លាប់បានចូលបំភ្លឺរួចហើយ ។
គួររំលឹកថា លោកកឹម សុខា ត្រូវបានចាប់ខ្លួនកាលពីយប់ថ្ងៃទី៣ ខែកញ្ញា ២០១៧ក្នុងផ្ទះរបស់លោក សង្កាត់បឹងកក់២ ខណ្ឌទួលគោក ក្រោមបទចោទសន្ធិដ្ឋិភាពជាមួយបរទេស ឬក្បត់ជាតិ ។ បន្ទាប់ពីខ្សែអាត់សម្លេងក្នុងវីដេអូត្រូវបានគេបង្ហោះភ្លាមដែលលោកបាននិយាយនៅបរទេសកំឡុងឆ្នាំ២០១៣ ៕
ចែករំលែកព័តមាននេះ