រាជធានីភ្នំពេញ ៖ ប៉ូលិសព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញសហការជាមួយកម្លាំងសមត្ថកិច្ចមូលដ្ឋាន និងមន្ត្រីតុលាការចូលបង្ក្រាបផ្ទះបើកលេងល្បែងស៊ីសងប្រភេទកន្ទុយលេខធំមួយកន្លែង ឃាត់ខ្លួនមនុស្ស៦នាក់ និងសម្ភារប្រភេទគ្រឿងអេឡិចត្រូនិកជាច្រើនគ្រឿង កាលពីវេលាល្ងាចថ្ងៃទី១៩ មីនា ២០១១ នៅផ្ទះដីឡូត៍មួយកន្លែងគ្មានលេខ ផ្លូវបណ្ឌិតឧកញ៉ាម៉ុង ឫទ្ធី ស្ថិតក្នុងភូមិទួលគោក សង្កាត់ទួលសង្កែ ខណ្ឌឫស្សីកែវ ។
មនុស្សដែលឃាត់ខ្លួនទាំង៦នាក់នេះរួមមាន ១-ឈ្មោះប៉េង ចាន់ស ភេទស្រី អាយុ១៩ឆ្នាំ ២-ឈ្មោះប៉េង ចាន់ពៅ ភេទស្រី អាយុ២២ឆ្នាំ ៣-ឈ្មោះជិន ស្រីពៅ ភេទស្រី អាយុ២៣ឆ្នាំ ៤-ឈ្មោះរស់ ផាន្នី ភេទស្រី អាយុ២២ឆ្នាំ ៥-ឈ្មោះឈន ធីតា ភេទស្រី អាយុ២០ឆ្នាំ ៦-ឈ្មោះរិន ស៊ាងឡេង ភេទស្រី អាយុ២៣ឆ្នាំ ។ អ្នកទាំងនេះជាបុគ្គលិកបូកបញ្ជីឆ្នោត ឬកន្ទុយលេខដ៏ធំនេះ…ចំណែកថៅកែល្បែងកន្ទុយលេខនេះ ឈ្មោះហាក់ អៀងហួរ ភេទប្រុស អាយុ៤៣ឆ្នាំ ជនជាតិខ្មែរ សញ្ជាតិញូវហ្សេឡែន បានគេចខ្លួនបាត់ មុនពេលប៉ូលិសចូលទៅបង្ក្រាប ។
ក្នុងពេលបង្ក្រាបសមត្ថកិច្ចដកហូតបានប្រាក់ដុល្លារ៣៤.០០០ដុល្លារ ប្រាក់ខ្មែរ៤លាន៣ម៉ឺន២ពាន់ ម៉ាស៊ីនហ្វាក់២៦គ្រឿង ម៉ាស៊ីនព្រីនធើរ១គ្រឿង កុំព្យូទ័រ២ កាស្យូគិតប្រាក់១១គ្រឿង ឯកសារមួយចំនួន និងរថយន្ត២គ្រឿង ។ សូមបញ្ជាក់ថា សមត្ថកិច្ចចម្រុះនេះដឹកនាំ ដោយលោកគឺ ប៊ុណ្ណារ៉ា ព្រះរាជអាជ្ញារងសាលាដំបូងរាជធានីភ្នំពេញ លោកផែង វណ្ណៈ អនុប្រធានការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញ ៕
ចែករំលែកព័តមាននេះ