ខេត្តបន្ទាយមានជ័យ ៖ ប្រជាពលរដ្ឋខ្មែរដែលធ្វើចំណាកស្រុក និងធ្វើការខុសច្បាប់នៅប្រទេសថៃចាប់បញ្ជូនក្នុងខែមេសា ឆ្នាំ២០១៨ មានចំនួន៤,២៦៨នាក់ តាមច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ។
ដោយយោងតាមរបាយការណ៍ការិយាល័យនគរបាលប្រឆាំងការជួញដូរ និងការពារអានីតិជនខេត្តបន្ទាយមានជ័យក្នុងខែមេសាឆ្នាំ២០១៨នេះ អាជ្ញាធរថៃចាប់បញ្ជូនប្រជាពលរដ្ឋខ្មែរដែលធ្វើចំណាកស្រុក និងធ្វើការដោយខុសច្បាប់នៅប្រទេសថៃដែលចាប់បញ្ជូនមកវិញមានចំនួន៤,២៦៨នាក់ ក្នុងនោះស្រី១,៤៧៣នាក់ កុមារចំនួន៤៣៩នាក់ កុមារី១៦៧នាក់ ដឹកតាមរថយន្តភាគីថៃចំនួន១០២គ្រឿង។
ស្ថិតិពលរដ្ឋក្នុងខេត្តចំណាកស្រុកចេញទៅរកការងារធ្វើនៅប្រទេសថៃមានចំនួនសរុប៥០៤នាក់ ស្រី២៣៣នាក់ ក្នុងនោះស្របច្បាប់ចំនួន៦០នាក់ ស្រី២២នាក់ ។ មិនស្របច្បាប់ចំនួន៤៤៤នាក់ ស្រី២១១នាក់ ត្រឡប់មកវិញ២,៤២៧នាក់ ស្រី១,១៦៨នាក់ កុមារ៤០នាក់។
គួររំលឹកថា បញ្ហាពលករចំណាកស្រុកខុសច្បាប់ដែលប្រឈមគ្រោះថ្នាក់ និងសុវត្ថិភាព រាល់ប្រជុំគណៈបញ្ជាការឯកភាពខេត្តបន្ទាយមានជ័យ លោក សួន បវរ អភិបាលខេត្ត បានលើកឡើងជារឿយៗដល់កម្លាំងសមត្ថកិច្ចដែលឈជើងតាមបន្ទាត់ព្រំដែន និងកម្លាំងជំនាញត្រូវលុបបំបាត់ច្រករបៀងខុសច្បាប់ និងទប់ស្កាត់ពលករចំណាកស្រុកដោយខុសច្បាប់ ការពារសុវត្ថិភាពដល់បងប្អូនប្រជាពលរដ្ឋ។
ដាស់តឿនដាក់វិធានការត្រូវចាប់មេខ្យល់ និងអប់រំណែនាំប្រជាពលរដ្ឋអោយមានការយល់ដឹង ត្រូវបញ្ឈប់ការចាញ់បោកមេខ្យល់ទៅរកការងារធ្វើដោយស្របច្បាប់។
តាមការទទួលព័ត៌មានបានឱ្យដឹងថា ការដែលពលករចំណាកស្រុកខុសច្បាប់នៅតែបន្តលួចចេញតាមច្រករបៀងខុសច្បាប់នៅតែកើតមាន គឺបណ្តាលមកពីកម្លាំងសមត្ថកិច្ចឈជើងតាមបន្ទាត់ព្រំដែនឃុបឃិតជាមួយមេខ្យល់ ហើយកម្លាំង និងមន្ត្រីជំនាញដាក់ខែជាមួយមេខ្យល់ ឬពលករម្នាក់បង់ប្រាក់ចំនួន១៥.០០០រៀលទៅ២០.០០០រៀល អាច១ខែមេខ្យល់ម្នាក់បង់១លានទៅ២លានរៀលជាប្រចាំខែ បើមិនបង់គឺចាប់ពលករអប់រំអោយត្រឡប់ទៅវិញ តែមេខ្យល់រួចខ្លួនរហូត ហើយនៅតែបន្តរកស៊ីដោយរលូន៕
ចែករំលែកព័តមាននេះ