តាមប្រភពព័ត៌មាន Marca បានឲ្យដឹងថា កីឡាករលេចមុខខ្លាំងប្រចាំរដូវកាលនេះ Mohamed Salah បានសារភាពថា ខ្លួនកំពុងតែត្រៀមនឹងទៅប្រកួតជាមួយនឹងក្រុមដែលមាននិមិត្តរូបរបស់ខ្លួនជាអ្នកចាត់ការហើយ ។
កីឡាករជនជាតិអេហ្ស៊ីបរបស់ Liverpool រូបនេះ បានសរសេរលើវេបសាយរបស់ UEFA ថា «និមិត្តរូបរបស់ខ្ញុំកាលពីវ័យកុមារ? ពួកគេគឺ Franceso Totti, Ronaldo ប្រេស៊ីល និង Zinedine Zidane» ។ Salah គ្រាន់តែសង្ឃឹមថា នឹងអាចយកឈ្នះលើយុទ្ធសាស្ត្ររបស់ Zidane ដែលជានិមិត្តរូបរបស់ខ្លួនកាលពីកុមារភាពនៅក្នុងការប្រកួតវគ្គផ្តាច់ព្រ័ត្រ Champions League ។
ជើងខ្លាំងរបស់ក្លិបហង្សក្រហមដដែលនេះបានសរសេរបន្តថា «ពួកគេ (Real Madrid) គឺជាក្រុមដែលឈ្នះពាន Champions League ច្រើនជាងគេដល់ទៅបីដងក្នុងរយៈពេល៤ឆ្នាំកន្លងមកនេះ ។ ហេតុដូចនេះហើយ គេសុទ្ធតែមានបទពិសោធន៍ពេញខ្លួនហើយ» ។
ទោះបីជាមានការព្រួយបារម្ភលើកឡើងក៏ដោយ ក៏ Salah សរសេរបន្តពោរពេញទៅដោយសុទិដ្ឋិនិយមថា «ពួកគេឈ្នះច្រើនមែនពីមុន តែពេលនេះវាជាការប្រកួតម្តងតែប៉ុណ្ណោះ ។ ដូចនេះយើងត្រូវផ្តោតពីបច្ចុប្បន្នកាល ហើយមិនត្រូវគិតពីអតីតកាលឡើយ ។ នៅពេលប្រកួតគឺពឹងទៅលើកីឡាករ១១នាក់ស្មើគ្នា» ។
គួរបញ្ជាក់ផងដែរថា Salah ដែលជាកីឡាករស៊ុតបានគ្រាប់បាល់ច្រើនជាងគេក្នុង Premier League រដូវកាលនេះ បង្ហាញអារម្មណ៍រីករាយ ដោយសារតែបានមកដល់វគ្គផ្តាច់ព្រ័ត្រ Champions League បើទោះបីជាមិនទាន់ដឹងឈ្នះចាញ់ក៏ដោយ ៕
ចែករំលែកព័តមាននេះ