ទីក្រុងហាណូយ ៖ ក្រសួងកសិកម្ម និងអភិវឌ្ឍន៍ជនបទរបស់ប្រទេសវៀតណាម បានព្រមានដល់កសិករចិញ្ចឹមបង្គា ថា កុំឲ្យពួកគេភ័យព្រួយហើយលក់បង្គាជាច្រើនចេញ ខណៈតម្លៃកំពុងតែធ្លាក់ចុះ ។
ព្រោះតែការព្រួយបារម្ភពីតម្លៃបង្គាធ្លាក់ចុះនេះ ទើបធ្វើឲ្យកសិករជាច្រើននៅក្នុងតំបន់ដីសណ្តទន្លេមេគង្គ បានលក់បង្គារបស់ខ្លួនចេញក្នុងតម្លៃដ៏ទាប ។
តម្លៃបង្គានៅខេត្ត Soc Trang នាពេលបច្ចុប្បន្ន ស្មើតែពី៣,០៧ ទៅ៣,៥១ដុល្លារប៉ុណ្ណោះក្នុង១គីឡូក្រាម ឬធ្លាក់ចុះអស់ប្រមាណពី៩០សេន ទៅ១,៣០ដុល្លារតាំងពីដើមឆ្នាំនេះមកម្ល៉េះ ។
តម្លៃបង្គាធ្លាក់ចុះនេះ កសិករចិញ្ចឹមបង្គាអាចលក់យកតែរួចខ្លួនប៉ុណ្ណោះ ហើយពួកគេមិនអាចទទួលបានប្រាក់ចំណេញច្រើនទេ ។
លោក Vo Van Nhut កសិករចិញ្ចឹមបង្គាមួយកន្លែងក្នុងសង្កាត់ My Xuyen ខេត្ត Soc Trang បាននិយាយថា លោកបានខាតបង់ប្រាក់អស់ប្រមាណ៤៤០ដុល្លារទៅហើយ ដោយសារតែតម្លៃបង្គាធ្លាក់ចុះ ។
យោងតាមអ្នកជំនាញឲ្យដឹងថា តម្លៃបង្គាបានធ្លាក់ចុះ ដោយសារតែក្រុមហ៊ុនវេចខ្ចប់ជាច្រើនបាននាំចូលបង្គាតូចៗមកក្នុងប្រទេសវៀតណាម ហើយនាំចេញបន្តទៅកាន់ទីផ្សារផ្សេងៗ ជាពិសេស នាំចេញទៅកាន់ក្រុមហ៊ុននានាក្នុងទីផ្សារចិន ។
លើសពីនេះ រោងចក្រវេចខ្ចប់នានានៅក្នុងស្រុកបានជួបប្រទះនឹងការប្រកួតប្រជែងយ៉ាងខ្លាំង នៅពេលពួកគេនាំចេញបង្គាទៅកាន់ទីផ្សារសហរដ្ឋអាមេរិក ព្រោះតែបង្គាដែលនាំចេញពីប្រទេសឥណ្ឌា គឺមានតម្លៃថោកជាងបង្គានាំចេញពីវៀតណាម ៕
ចែករំលែកព័តមាននេះ