ការនាំចេញរបស់ប្រទេសថៃកើនឡើង14ខែជាប់គ្នា
ទីក្រុងបាងកក ៖ កាលពីខែមេសាកន្លងមក ការនាំចេញរបស់ប្រទេសថៃបានកើនឡើង១៤ខែជាប់ៗគ្នា គឺនាំមុខដោយការនាំចេញរថយន្ត និងគ្រឿង, ប្លាស្ទិក, ប្រេង, អង្ករ, ផលិតផលធ្វើពីដំឡូងឈើ,…
ទីក្រុងបាងកក ៖ កាលពីខែមេសាកន្លងមក ការនាំចេញរបស់ប្រទេសថៃបានកើនឡើង១៤ខែជាប់ៗគ្នា គឺនាំមុខដោយការនាំចេញរថយន្ត និងគ្រឿង, ប្លាស្ទិក, ប្រេង, អង្ករ, ផលិតផលធ្វើពីដំឡូងឈើ, សាច់មាន់កកនិងវេចខ្ចប់, ផ្លែឈើ, បន្លែស្រស់, គ្រឿងកំប៉ុង និងផលិតផលវេចខ្ចប់ផ្សេងទៀត ។
ក្រសួងពាណិជ្ជកម្មបានឲ្យដឹងកាលពីថ្ងៃអង្គារថា ការនាំចេញដោយមិនគិតពន្ធ បានកើនឡើង១២,៣%កាលពីខែមេសា បើធៀបនឹងឆ្នាំមុន មកស្មើ១៨,៩៤ប៊ីលានដុល្លារ បន្ទាប់ពីលូតលាស់បាន៧,១%កាលពីខែមីនា ។
លោកស្រី Pimchanok Vonkorpon ប្រធានការិយាល័យគោលនយោបាយ និងយុទ្ធសាស្ត្រពាណិជ្ជកម្ម ក្រោមក្រសួងពាណិជ្ជកម្ម ថ្លែងថា ៖« ការនាំចេញកសិផល និងផលិតផលកសិឧស្សាហកម្មបានល្អប្រសើរវិញនៅខែមេសា ជាពិសេស ផ្លែឈើនិងបន្លែស្រស់, គ្រឿងកំប៉ុងនិងវេចខ្ចប់, អង្ករ, ផលិតផលធ្វើពីដំឡូងឈើ និងសាច់មាន់ស្រស់និងវេចខ្ចប់ ហើយសូម្បីតែការនាំចេញកៅស៊ូ ក៏បង្ហាញភាពវិជ្ជមានដែរ » ។
លោកស្រីបន្តថា ការនាំចេញកសិផល និងផលិតផលកសិឧស្សាហកម្មបានកើនឡើង៩,៨%កាលពីខែមេសា មកស្មើ៣,៣៩ប៊ីលានដុល្លារ បន្ទាប់ពីធ្លាក់ចុះអស់៣,៣%កាលពីខែមីនា ។
កំណើននេះ គឺជាលទ្ធផលនៃកំណើនការនាំចេញផ្លែឈើ និងបន្លែស្រស់និងកក ដែលកើនឡើងបាន៥០,៧% ផលិតផលដំឡូងឈើកើន២៥,៨% អង្ករកើន១៩,១% រួមទាំងសាច់មាន់កក និងវេចខ្ចប់កើន១២,៤% ។
លោកស្រីបន្ថែមថា ការនាំចេញទុរេនបានកើនឡើង១៣៥%ក្នុងខែមេសា មកស្មើ១២ម៉ឺនតោន និងមានតម្លៃសរុប២២០លានដុល្លារ ឬច្រើនជាងឆ្នាំមុនដល់ទៅ២០៧% ។ រីឯការនាំចេញទុរេនទៅកាន់ប្រទេសចិន បានលូតលាស់៧៧៤% មកស្មើ៥ម៉ឺន៦ពាន់តោន ព្រោះតែការធ្វើពាណិជ្ជកម្មលើអុីនធើរណេត ។
ការនាំចេញផលិតផលឧស្សាហកម្ម ក៏កើនឡើងបាន១៤ខែជាប់ៗគ្នាដែរ និងកើន១២,២%កាលពីខែមេសា មកស្មើ១៤,៧៨ប៊ីលានដុល្លារ ព្រោះការនាំចេញប្រេងកើន៣៩%, ប្លាស្ទិកកើន២៩%, កុំព្យូទ័រនិងគ្រឿងកើន២៣,៩% និងយានយន្ត-គ្រឿងកើន១៧,៨% ៕
ចែករំលែកព័តមាននេះ