ខេត្តមណ្ឌលគិរី ៖ សេចក្តីរាយការណ៍ឱ្យដឹងថា ផ្លូវមួយខ្សែចាប់ពីចំណុចភូមិពូត្រុំ ក្រុងសែនមនោរម្យ រហូតទៅដល់ភូមិមេម៉ង់ចុងផ្លាស់ (ចម្ងាយ៥៥គីឡូម៉ែត្រពីទីរួមខេត្តមណ្ឌលគិរី ) គឺកំពុងមានស្ថានភាពខូចយ៉ាងដំណំ ដែលបង្កឱ្យប្រជាពលរដ្ឋពិបាកក្នុងការធ្វើដំណើរជាខ្លាំង ខណៈផ្លូវនេះត្រូវរងការខូចដោយសារតែរថយន្តធំៗដឹកលើសចំណុះបើកឆ្លងកាត់ស្ទើរតែរាល់ថ្ងៃ ដោយមិនមានឃើញអាជ្ញាធរចុះត្រួតពិនិត្យនោះ
ឡើយ ។
សេចក្តីរាយការណ៍បន្តថា រថយន្តដែលបង្កឱ្យខូចផ្លូវនេះត្រូវអ្នកភូមិអះអាងថា គឺភាគច្រើនខាងរថយន្តដឹកប្រេងឱ្យក្រុមហ៊ុនរែងមាស «រ៉ុងឆេង» ដែលជាក្រុមហ៊ុនកំពុងសង្ស័យបង្ហូរកាកសំណល់គីមីចូលក្នុងទឹកធម្មជាតិនោះ ដោយក្នុងមួយថ្ងៃ គឺរថយន្តធុនធំទាំងនេះបើកចេញ-ចូល១៥គ្រឿងឯណោះ ។ គួបផ្សំក្នុងរដូវធ្លាក់ភ្លៀងផង ក៏រឹតបង្កឱ្យផ្លូវកាន់តែទ្រុឌទ្រោមទៅ ពីមួយថ្ងៃទៅមួយថ្ងៃ ។
ប្រភពបន្តថា ទាក់ទិនបញ្ហានេះ ត្រូវបានប្រជាពលរដ្ឋស្នើសុំឱ្យអាជ្ញាធរពាក់ព័ន្ធទាំងអស់ មេត្តាជួយដោះស្រាយជូនពួកគាត់ផង ព្រោះសព្វថ្ងៃពួកគាត់មានការលំបាកខ្លាំងណាស់ក្នុងការធ្វើដំណើរ ដើម្បីចេញប្រកបរបរចិញ្ចឹមក្រពះ ព្រោះការធ្វើដំណើរម្តងៗ គឺត្រូវចំណាយពេលអស់រាប់ម៉ោងឯណោះ ។
ចែករំលែកព័តមាននេះ