ខេត្តព្រះសីហនុ ៖ រដ្ឋបាលស្រុកព្រៃនប់នៅតែបន្តមានវិធានការក្តៅ ទៅលើការកាប់ទន្ទ្រានដីព្រៃលិចទឹកព្រៃកោងកាង សាងសង់របងសង់រោង ឬខ្យូសរំលោភចូលក្នុងដីចំណីព្រែក ដោយអាជ្ញាធរបានដាក់កម្លាំងរុះរើ បន្ទាប់ពីម្ចាស់សំណង់មួយចំនួនមិនគោរពតាមកិច្ចសន្យារបស់ក្រុមកាងារ ដែលបានហាមឃាត់ និងចុះណែនាំឱ្យរុះរើដោយផ្ទាល់ ដោយសារការសាងសង់និងការកាប់ព្រៃលិចទឹកនោះ គឺស្ថិតក្នុងដីចំណីព្រែកសាធារណៈរបស់រដ្ឋ ។
បច្ចុប្បន្ន រដ្ឋបាលខេត្តកំពុងបង្កើនការយកចិត្តទុកដាក់ថែរក្សាការពារ និងហាមឃាត់យ៉ាងតឹងរុឹងមិនឱ្យអនុញ្ញាតដាច់ខាត ទោះបីជាជ្រកក្រោមស្លាកអ្វីក៏ដោយ ឱ្យតែប៉ះពាល់ដីចំណីសាធារណៈ ជាពិសេសប្រឡាយ អូរ ព្រែក ។ ជាក់ស្តែង កាលពីរសៀលថ្ងៃទី២១ ខែឧសភា កន្លងមក ក្រុមការងាររដ្ឋបាលស្រុកដឹកនាំដោយលោក ព្រំ ប៊ុន្នី នាយករងរដ្ឋបាលសាលាស្រុកព្រៃនប់ បានចុះរុះរើការសង់ខ្យូសទំហំ៣ម៉ែត្រ
គុណនឹង៣ម៉ែត្រ ជីកប្រឡាយទទឹង៣ម៉ែត្រ បណ្តោយប្រមាណ៤៥០ម៉ែត្រនៅតាមបណ្តោយខាងក្នុងទំនប់ប៉ុលឌែ(ទំនប់ការពារទឹកប្រៃ)ចំណុចខាងក្រោយឡឥដ្ឋ ស្ថិតក្នុងភូមិសំរុងក្រោម ឃុំសំរុង ស្រុកព្រៃនប់ ។ ក្រុមការងារបានរុះរើខ្យូសចោល និងបាននាំយកម៉ូតូដែលម្ចាស់រត់គេចខ្លួនចំនួន៤គ្រឿងមករក្សាទុកជាបណ្តោះអាសន្ន រង់ចាំម្ចាស់ចូលមកទទួលការណែនាំតាមផ្លូវច្បាប់ ។
សូមបញ្ជាក់ថា ព្រៃលិចទឹកដើមកោងកាងនៅជួរតាមទំនប់ការពារទឹកប្រៃបច្ចុប្បន្ន កំពុងត្រូវបានកាប់បំផ្លាញជាបន្តបន្ទាប់ ដោយខ្លះកាប់សាងសង់រោង ខ្លះទៀតកំពុងដើរបាញ់ថ្នាំកំណត់ចំណាំជាព្រំដីរបស់ខ្លួន ហាក់ដូចជាពុះចែកគ្នាកាន់កាប់យ៉ាងអនាធិបតេយ្យ ។ ទីតាំងទាំងនោះជ្រកក្រោមរូបភាពចិញ្ចឹមត្រី ហើយព្រៃលិចទឹកនៅទីនោះ ក៏ត្រូវបានកាប់បំផ្លាញដើម្បីសាងសង់លំនៅឋាន ដែលរហូតមកដល់ពេលនេះសកម្មភាពកាប់ឆ្ការតាមជួរទំនប់នោះមានការរាលដាលជាបន្តបន្ទាប់ ។ ចំពោះទីតាំងដែលសង់រួចជាមួយនឹងរូបភាពចិញ្ចឹមត្រីនោះ គេនៅពុំទាន់ឃើញអាជ្ញាធរមានចំណាត់ការណាមួយនៅឡើយទេ បន្ទាប់ពីអាជ្ញាបានចុះណែនាំ១លើកជា២លើកមកហើយ ។ ការទុកឱ្យអ្នករំលោភទាំងនោះបន្តធ្វើបែបនេះ នឹងជំរុញឱ្យអ្នកថ្មីៗទៀតនាំគ្នាធ្វើតាមពេលអាជ្ញាធរដកថយទៅវិញ ៕
ចែករំលែកព័តមាននេះ