ខេត្តតាកែវ ៖ រមណីយដ្ឋានអន្លង់ផ្ញៀវ គឺជារមណីយដ្ឋានធម្មជាតិកែច្នៃមួយ កំពុងទាក់ទាញអ្នកទេសចរទៅកម្សាន្ត ។ អន្លង់ផ្ញៀវមានសួនកម្សាន្ត ចម្ការដំណាំជាច្រើនប្រភេទនៅតាមជើងភ្នំ និងចង្កេះភ្នំ ពិសេសជួរភ្នំព័ទ្ធជុំវិញខៀវស្រងាត់គាប់ភ្នែកអ្នកទេសចរ ។ មានគម្រោងសាងសង់កន្លែងងូតទឹក និងកន្លែងកម្សាន្តជាច្រើនទៀតនាពេលខាងមុខ ។
រមណីយដ្ឋានអន្លង់ផ្ញៀវនៅភូមិស្រែជើងរាស្ត្រ ឃុំត្រពាំងគ្រញូង ស្រុកត្រាំកក់ ខេត្ដតាកែវ ។ មិនឆ្ងាយប៉ុន្មានពីភ្នំពេញ គឺអ្នកទេសចរអាចធ្វើដំណើរតាមផ្លូវជាតិលេខ៣ ដល់ផ្សារអង្គតាសោម ចម្ងាយ៧៧គីឡូម៉ែត្រ រួចបត់ស្តាំធ្វើដំណើរតាមបណ្តោយផ្លូវកៅស៊ូលេខ១៣២ ប្រមាណ៣៩គីឡូម៉ែត្រទៀតនឹងដល់កន្លែងកម្សាន្តអន្លង់ផ្ញៀវហើយ ។ សម្រាប់អ្នកធ្វើដំណើរតាមបណ្តោយផ្លូវជាតិលេខ២ពីភ្នំពេញដល់រង្វង់មូលព្រះវិស្ណុអូរចំបក់ចម្ងាយ៧៨គីឡូម៉ែត្រ បត់ស្តាំធ្វើដំណើរតាមផ្លូវលេខ២២ ចម្ងាយ១២គីឡូម៉ែត្រដល់អង្គតាសោម រួចបន្តដំណើរតាមបណ្តោយផ្លូវលេខ១៣២ ។
ចំពោះការធ្វើដំណើរតាមផ្លូវាតិលេខ៤ ពីភ្នំពេញទៅដល់ថ្នល់ទទឹងបត់ឆ្វេងចូលទៅផ្លូវលេខជាតិ៤១ ឆ្ពោះទៅស្រុកគងពិសី ខេត្តកំពង់ស្ពឺ រហូតដល់ផ្សារត្រពាំងអណ្តើក ស្ថិតក្នុងស្រុកត្រាំកក់ ចាប់ពីផ្សារនេះទៅដល់រមណីយដ្ឋានអន្លង់ផ្ញៀវមានចម្ងាយផ្លូវ២១គីឡូម៉ែត្រទៀត ។
អ្នកទេសចរទៅដល់អន្លង់ភ្ញៀវនឹងមានអារម្មណ៍ស្រស់ស្រាយ សប្បាយរីករាយ ដោយការស្រូបយកខ្យល់អាកាសបរិសុទ្ធ និងគាប់ភ្នែកគយគន់ជួរភ្នំវែង រំលេចដោយកូនភ្នំ តូចៗជាប់គ្នា ។ មិនតែប៉ុណ្ណោះរុក្ខជាតិរំលេចពីលើភ្នំ និងនៅជើងភ្នំពណ៌ខៀវស្រងាត់ ។ ក្រៅពីឈើធម្មជាតិមានចម្ការម្រេចលាតសន្ធឹងល្វឹងល្វើយទៀតផង ។
អន្លង់ផ្ញៀវជារម្មណីយដ្ឋានថ្មី ដូច្នេះ អ្វីៗមិនទាន់រួចរាល់នៅឡើយ ដោយនៅមានការរចនាលំអ និងកសាងកន្លែងកម្សាន្តជាច្រើនទៀត ។ ទោះជាយ៉ាងណាក្តីទីឋានធម្មជាតិនោះទាក់ទាញការចាប់អារម្មណ៍អ្នកទេសចរទៅកម្សាន្តមិនដាច់ ។ ជាពិសេស កាលពីអំឡុងបុណ្យចូលឆ្នាំថ្មីប្រពៃណីជាតិកន្លងមកនេះអ្នកទេសចរច្រើនកុះករទៅកម្សាន្ត ។
លោកសំ សាន អ្នកទេសចរពីរាជធានីភ្នំពេញដែលនាំភរិយា និង កូនៗទៅកម្សាន្តនៅអន្លង់ផ្ញៀវ កាលពីពេល ថ្មីៗកន្លងមកបានសរសើរសម្រស់ជួរភ្នំធម្មជាតិនៅទីនោះបីដូចផ្ទាំងគំនូរ ហើយថាខ្យល់អាកាសបរិសុទ្ធធ្វើឲ្យស្រស់ថ្លាអារម្មណ៍មិនដូចនៅទីក្រុងទេ ។
អ្នកទេសចរជាច្រើនទៀតនិយាយពីអន្លង់ផ្ញៀវមិនខុសពីលោកសំ សាន ទេ ។
ទាំងរីករាយលោកសំ សាន ថា «ខ្ញុំដូចជាជាប់ចិត្តនឹងអន្លង់ផ្ញៀវណាស់ ហើយកូន និងប្រពន្ធខ្ញុំក៏មានអារម្មណ៍ដូចគ្នាដែរ ។ ពេលទំនេរពួកយើងចង់មកលេងទីនេះទៀត ។ មកទីនេះប្លែកភ្នែក និងស្រស់ស្រាយអារម្មណ៍តែម្តង ។
មិនឆ្ងាយពីភ្នំពេញប៉ុន្មាន ហើយផ្លូវក៏មិនពិបាកអីដែរ ល្ងាចបន្តិចចាំយើងត្រឡប់ទៅវិញក៏បានដែរ »៕
ការសរសើរ តៗគ្នា និងការឃើញរូបភាពដ៏ប្រណីតពីការផ្សព្វផ្សាយ ធ្វើឲ្យអន្លង់ផ្ញៀវ ទទួលអ្នកទេសចរឥតដាច់ក្លាយជាទីកម្សាន្តពេញនិយមថ្មីមួយ ៕
ចែករំលែកព័តមាននេះ