រាជធានីភ្នំពេញ ៖ អគ្គលេខាធិការមជ្ឈមណ្ឌលអាស៊ាន-កូរ៉េ បានបញ្ជាក់ថា កម្ពុជានៅតែជាប្រទេសមានសក្ដានុពលខ្ពស់សម្រាប់ក្រុមហ៊ុនកូរ៉េ ដើម្បីបោះទុនវិនិយោគ ទោះបីសព្វថ្ងៃការវិនិយោគរបស់វិនិយោគិនកូរ៉េមិនទាន់ច្រើន ដូចការវិនិយោគពីប្រទេសចិន និងជប៉ុនក្ដី ។…
រាជធានីភ្នំពេញ ៖ អគ្គលេខាធិការមជ្ឈមណ្ឌលអាស៊ាន-កូរ៉េ បានបញ្ជាក់ថា កម្ពុជានៅតែជាប្រទេសមានសក្ដានុពលខ្ពស់សម្រាប់ក្រុមហ៊ុនកូរ៉េ ដើម្បីបោះទុនវិនិយោគ ទោះបីសព្វថ្ងៃការវិនិយោគរបស់វិនិយោគិនកូរ៉េមិនទាន់ច្រើន ដូចការវិនិយោគពីប្រទេសចិន និងជប៉ុនក្ដី ។
លោក Lee Hyuk អគ្គលេខាធិការនៃមជ្ឈមណ្ឌលអាស៊ាន-កូរ៉េ បានលើកឡើងក្នុងសិក្ខាសាលាស្ដីពី ការពង្រឹងការប្រកួតប្រជែងនៃម្ហូបអាហារខ្មែរ និងការវេចខ្ចប់ ដែលជាការរៀបចំរបស់មជ្ឈមណ្ឌលអាស៊ាន-កូរ៉េ និងក្រសួងពាណិជ្ជកម្ម នាព្រឹកថ្ងៃទី២៤ ឧសភា ម្សិលមិញថា ទោះបីជាសព្វថ្ងៃ ការវិនិយោគរបស់ប្រទេសកូរ៉េនៅកម្ពុជា នៅមានកម្រិត បើធៀបនឹងការវិនិយោគរបស់ប្រទេសចិន និងជប៉ុនក្ដី ប៉ុន្តែកម្ពុជានៅតែមានសក្ដានុពលខ្ពស់សម្រាប់ពាណិជ្ជករកូរ៉េ ។
លោកបន្តថា ៖« ពាណិជ្ជករកូរ៉េទាំងអស់ នឹងទទួលបានដៃគូជាពាណិជ្ជករកម្ពុជា ដើម្បីពិភាក្សា និងសហការគ្នាធ្វើការដោយរលូន » ។
អនុរដ្ឋលេខាធិការក្រសួងពាណិជ្ជកម្ម លោកសំ សិរីរតន៍ បានលើកឡើងថា ពាណិជ្ជកម្មរវាងប្រទេសកូរ៉េ និងកម្ពុជា កំពុងមានកំណើនល្អប្រសើរ និងកំពុងដំណើរការទៅមុខយ៉ាងរលូន។ ការរៀបចំសិក្ខាសាលាខាងលើ ក៏ជាផ្នែកមួយជំរុញ និងទាក់ទាញអ្នកវិនិយោគ ឬពាណិជ្ជករកូរ៉េមកកម្ពុជាបន្ថែមផងដែរ ។
យោងតាមរបាយការណ៍របស់ក្រសួងពាណិជ្ជកម្មបានបង្ហាញឲ្យដឹងថា កាលពីឆ្នាំ ២០១៧ ការនាំទំនិញពីប្រទេសកូរ៉េមកកម្ពុជា មានទំហំទឹកប្រាក់សរុប៤៥៩,៦លានដុល្លារ រីឯការនាំចេញទំនិញពីកម្ពុជាទៅកាន់ប្រទេសកូរ៉េវិញ មានចំនួនទឹកប្រាក់២៣៩,៨លានដុល្លារអាមេរិក ។ មុខទំនិញសំខាន់ៗដែលកម្ពុជានាំចេញរួមមាន ស្បៀងអាហារ វត្ថុធាតុដើម ឥន្ធនៈមិនទាន់កែច្នៃ គីមី ទំនិញឧស្សាហកម្ម និងគ្រឿងម៉ាស៊ីន ជាដើម ៕
ចែករំលែកព័តមាននេះ