រាជធានីភ្នំពេញ ៖ ក្រោយការចូលរួមបោះឆ្នោតពីភ្ញៀវទេសចររាប់លាននាក់នៅជុំវិញពិភពលោក គេហទំព័រដ៏ល្បីល្បាញ TripAdvisor បានផ្តល់ចំណាត់ថ្នាក់លេខ១ ដល់ប្រាសាទអង្គរវត្តរបស់កម្ពុជា ជាសំណង់ដ៏មានសារសំខាន់ផ្នែកប្រវត្តិសាស្ត្រអស្ចារ្យបំផុត និងចំណាត់ថ្នាក់លេខ១៣ ជាគោលដៅទេសចរណ៍របស់ពិភពលោក សម្រាប់ឆ្នាំ២០១៨នេះ ។
នេះគឺជាឆ្នាំទី៥ហើយ ដែលប្រាសាទអង្គរវត្តត្រូវបានភ្ញៀវទេសចរលើពិភពលោកបោះឆ្នោតគាំទ្រ ហើយទទួលបានចំណាត់ថ្នាក់លេខ១ជាប់ៗគ្នា តាមរយៈគេហទំព័រដ៏ល្បីល្បាញផ្សេងៗគ្នា គឺក្នុងឆ្នាំ២០១៤ បានជាប់ចំណាត់ថ្នាក់លេខ១ នៅលើគេហទំព័រមួយដែលតែងតែយកតំបន់បុរាណវិទ្យា និងប្រវត្តិសាស្ត្រទាំងអស់លើពិភពលោក មកប្រៀបធៀបគ្នានោះ គឺគេហទំព័រ ArchaeoMadness ។ បន្ទាប់មកទៀត នៅដើមឆ្នាំ២០១៥ អង្គរវត្តទទួលបានចំណាត់ថ្នាក់លេខ១ម្តងទៀតនៅលើគេហទំព័រអន្តរជាតិមួយ ដែលជាគេហទំព័រផ្សព្វផ្សាយតំបន់ទេសចរណ៍ល្បីៗលើពិភពលោកនោះ គឺគេហទំព័រ TripAdvisor ។
នៅឆ្នាំ២០១៦ អង្គរវត្តបានបន្តជាប់លេខ១បន្ថែមទៀតនៅលើគេហទំព័ររបស់ក្រុមហ៊ុន Lonely Planet ដែលជាគេហទំព័រផ្សព្វផ្សាយ និងជាប្រភពព័ត៌មានទេសចរណ៍ដ៏ល្បីមួយលើពិភពលោក មានទាំងព័ត៌មានតាមរយៈវែបសាយ ទស្សនាវដ្តី និងសៀវភៅ ជាដើម ។ នៅឆ្នាំ២០១៧ និងឆ្នាំ២០១៨នេះ TripAdvisor ក៏បានបន្តផ្តល់ចំណាត់ថ្នាក់លេខ១ ដល់ប្រាសាទអង្គរវត្តរបស់កម្ពុជា ក្នុងឋានៈជាសំណង់ដ៏មានសារសំខាន់ផ្នែកប្រវត្តិសាស្ត្រអស្ចារ្យបំផុតក្នុងលោក ។
នេះជាមោទនភាពមួយរបស់ជាតិខ្មែរយើងទាំងមូល ដែលអង្គរវត្តរបស់កម្ពុជាទទួលបានការគាំទ្រពីបណ្ដាប្រជាពលរដ្ឋជុំវិញពិភពលោក ។
ក្នុងនាមស្ថាប័នគ្រប់គ្រងរមណីយដ្ឋានអង្គរ អាជ្ញាធរជាតិអប្សរា សូមចូលរួមអបអរសាទរ និងសូមអំពាវនាវដល់សាធារណជនទាំងអស់បន្តចូលរួមថែរក្សា ការពារនូវបេតិកភណ្ឌរបស់ដូនតាយើងឲ្យបានខ្លាំងក្លា ដើម្បីភាពគង់វង្សយូរអង្វែងតទៅ ។
ដំណឹងដ៏រីករាយនេះក៏មានការស្វាគមន៍ និងចូលរួមអបអរសាទរពីអ្នកពាក់ព័ន្ធក្នុងវិស័យទេសចរណ៍ផងដែរ ដោយមានសុទិដ្ឋិនិយមថា ភាពល្បីល្បាញនេះ នឹងរឹតតែទាក់ទាញភ្ញៀវទេសចរអន្តរជាតិឲ្យមានកំណើនថែមទៀត ។ ទោះបីយ៉ាងនេះក្ដី អាជ្ញាធរពាក់ព័ន្ធ ក៏ដូចជាប្រជាពលរដ្ឋខ្មែរទាំងអស់ត្រូវចូលរួមទាំងអស់គ្នាដើម្បីថែរក្សាកេរដំណែលបុព្វបុរសដូនតាឲ្យនៅគង់វង្ស និងនាំគ្នាថែរក្សាបរិស្ថានឲ្យបានស្អាត ។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក បានមានប្រសាសន៍ថា ការចាត់ចំណាត់ថ្នាក់នេះ គឺជួយច្រើនណាស់ក្នុងការផ្សព្វផ្សាយផ្នែកទីផ្សារ និងកេរ្តិ៍ឈ្មោះរបស់កម្ពុជា ពិសេសប្រាសាទអង្គរវត្ត ។
លោកបន្ដថា ៖« ដូច្នេះហើយ នៅពេលគេលើកយើងឡើងដល់កំពូលបែបនេះ ទាំងប្រជាពលរដ្ឋ និងរាជរដ្ឋាភិបាលរបស់យើង គួរតែធ្វើអ្វីឲ្យបានល្អថែមទៀត ស័ក្តិសមនឹងកេរ្តិ៍ឈ្មោះ និងអ្វីដែលគេលើកតម្កើង » ។
លោកបន្តថា ក្រុងសៀមរាប មិនគួរឲ្យមានផ្លូវដីទៀតទេ ហើយគួរពង្រឹងអនាម័យបន្ថែមទៀត ដែលនេះជាការងាររបស់អាជ្ញាធរថ្នាក់ក្រោមជាតិ ព្រោះអាជ្ញាធរថ្នាក់ជាតិបានខិតខំហើយ សម្តេចតេជោលោកបានខិតខំហើយ ។ ហេតុនេះ អាជ្ញាធរថ្នាក់ក្រោមជាតិ គួរយកចិត្តទុកដាក់លើបញ្ហានេះបន្ថែម ។
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន បានថ្លែងថា វាជាគេហទំព័រដ៏ល្បីនៅលើពិភពលោក ដែលភ្ញៀវទេសចរតែងតែចូលមើលពេលចេញដំណើរកម្សាន្ត ។ ហេតុនេះ នៅពេលមានការចាត់ចំណាត់ថ្នាក់បែបនេះ គឺជាចំណុចដ៏ល្អសម្រាប់កម្ពុជា ដែលយើងរំពឹងថា នឹងទទួលបានចំនួនភ្ញៀវទេសចរអន្តរជាតិកាន់តែច្រើននៅឆ្នាំនេះ និងឆ្នាំក្រោយ ។
លោកស្រីបន្តថា ៖« លើសពីនេះ ខ្ញុំគិតថា វានឹងជួយទាក់ទាញអ្នកវិនិយោគអន្តរជាតិកាន់តែច្រើនមកវិនិយោគនៅកម្ពុជា ព្រោះអ្នកវិនិយោគនឹងសម្លឹងមើលនៅប្រទេសណាដែលមានភ្ញៀវទេសចរច្រើន ពួកគេនឹងទៅវិនិយោគនៅប្រទេសនោះ » ។
យោងតាមរបាយការណ៍របស់គ្រឹះស្ថានអង្គរ ក្នុងរយៈពេល៤ខែដើមឆ្នាំនេះ ភ្ញៀវទេសចរបរទេសដែលបានទិញប័ណ្ណចូលទស្សនារមណីយដ្ឋានប្រវត្តិសាស្ត្រមួយនេះ មានចំនួនជាង១,០៥លាននាក់ កើនឡើង១១,១៧% បើធៀបនឹងរយៈពេលដូចគ្នាកាលពីឆ្នាំមុន ដែលផ្ដល់ចំណូលសរុបដល់គ្រឹះស្ថានអង្គរប្រមាណជាង៤៨,២៥លានដុល្លារ កើនឡើងជិត២៣% បើធៀបនឹងរយៈពេលដូចគ្នាកាលពីឆ្នាំមុន ។
ទីប្រឹក្សាសមាគមទីភ្នាក់ងារទេសចរណ៍កម្ពុជា និងជានាយកគ្រប់គ្រងក្រុមហ៊ុនទេសចរណ៍ World Express Tours & Travel លោក ហូ វណ្ឌី បានប្រាប់កោះសន្ដិភាព កន្លងទៅថ្មីៗនេះថា ការមកដល់នៃភ្ញៀវទេសចរអន្តរជាតិមកទស្សនារមណីយដ្ឋានអង្គរ ដោយសារតែប្រទេសមានសុខសន្ដិភាព ស្ថិរភាពនយោបាយល្អ និងការភ្ជាប់ជើងហោះហើរតាមគោលដៅសហគមន៍នៅអាស៊ី ជាពិសេសប្រទេសចិន ។
លោកបន្ដថា ដើម្បីទាក់ទាញភ្ញៀវទេសចរអន្តរជាតិមកទស្សនាកាន់តែច្រើនថែមទៀត គ្រឹះស្ថានអង្គរ ក៏ដូចជាអាជ្ញាធរពាក់ព័ន្ធ គួរយកចិត្តទុកដាក់លើការការពារ និងការថែទាំ ដែលជាកត្តាសំខាន់ ពិសេសគឺថែរក្សានូវកេរដំណែលបុព្វបុរសដូនតាឲ្យនៅគង់វង្ស ព្រមទាំងថែរក្សាបរិស្ថាន និងអនាម័យឲ្យបានស្អាត ព្រោះសំរាមជាសត្រូវរបស់ភ្ញៀវទេសចរ ។
លោកក៏សំណូមពរដល់បងប្អូនប្រជាពលរដ្ឋ សូមចូលរួមថែរក្សាបរិស្ថាន និងអនាម័យឲ្យបានល្អ កុំបោះសំរាមចោលពាសវាលពាសកាល និងរួមគ្នាស្រឡាញ់វប្បធម៌ដែលជាដួងព្រលឹងរបស់ខ្លួនឯង ។ លោកថា ៖« ប្រសិនបើបងប្អូនខ្មែរខ្លួនឯងមិនចេះថែទាំផង តើឆ្នាំងបាយរួមហ្នឹងនឹងធ្លាក់ដល់កម្រិតណា ? អីចឹង លុះត្រាតែបងប្អូនប្រជាពលរដ្ឋចេះស្រឡាញ់វប្បធម៌ដែលជាដួងព្រលឹងខ្លួនឯង ទើបដួងព្រលឹងហ្នឹងងើបឡើង ហើយយើងក៏មានមោទនភាពខ្លួនឯងដែរ។ បើយើងបាត់បង់ដួងព្រលឹង យើងក៏បាត់បង់អត្តសញ្ញាណជាតិដែរ ។ ដូច្នេះយើងត្រូវចូលរួមគោរព និងអនុវត្តច្បាប់ឲ្យបានគ្រប់គ្នា ដើម្បីកំណើនទេសចរ ដើម្បីកំណើនការងារ និងប្រាក់ចំណូល ។ ប្រសិនបើគ្មានចំណុចទាំងនេះទេ ភ្ញៀវក្នុងស្រុកក៏មិនទៅ ភ្ញៀវក្រៅស្រុកក៏មិនមក នោះហើយគឺជាផលវិបាករបស់យើងទាំងអស់គ្នា » ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ