ខេត្តកំពង់ចាម ៖ ដើម្បីពង្រឹងច្បាប់ចរាចរណ៍ផ្លូវគោក និងបញ្ជាររបស់លោកអភិបាលខេត្តបានបញ្ជាឲ្យសមត្ថកិច្ចឃាត់រថយន្តម៉ាកសាំងយ៉ុង១គ្រឿង ពាក់ស្លាកលេខ កំពង់ចាម 2A-6223 បានដឹកសំពីងសំពោង ដោយផ្នែកខាងក្រោយ ស្ទើរកោស និងថ្នល់ត្រង់រង្វង់មូលក្បាលស្ពានគីហ្ស៊ុណា នៅវេលាម៉ោង១១ព្រឹកថ្ងៃទី២៤ ខែឧសភា ២០១៨ ត្រង់ចំណុចភូមិទី៣ សង្កាត់វាលវង់ ក្រុងកំពង់ចាម ។
លោកវរសេនីយ៍ត្រី ស៊ាម យូសេង អធិការរងនគរបាលក្រុងកំពង់ចាមទទួលផែនសណ្តាប់ធ្នាប់ប្រាប់
ថា រថយន្តខាងលើបើកបរដោយឈ្មោះប៉ែន សុខណា ភេទប្រុស អាយុ២៥ឆ្នាំ នៅភូមិអូរដូនអាម
ឃុំព្រះពន្លា ស្រុកកំពង់រោទ៏ ខេត្តស្វាយរៀងបានផ្ទុកខ្យងជាច្រើនបាវចងនឹងចង្អើរខាងក្រោយឡើង
បាសរថយន្តខាងមុខផងដែរ ។ ដែលបានបើកបរក្នុងទិសដៅពីលិចមកកើតក្នុងគោលបំណងយកខ្យងទៅចែកចាយនៅទឹកដីខេត្តត្បូងឃ្មុំដែលមិនទាន់ទៅដល់ផងនោះត្រូវបានសមត្ថកិច្ចចាប់ឃាត់រថយន្ត ។
អធិការរងទទួលផែនសណ្តាប់ធ្នាប់រូបនេះប្រាប់បន្តថា ក្នុងពេលដែលរថយន្តបើកមកកាន់អធិការដ្ឋាន
នោះបានធ្វើឲ្យបាវខ្យងកកិតនឹងថ្នល់ធ្លាក់ខ្យងជ្រុះរាយ ។ រថយន្តនេះត្រូវបានចាប់ផាកពិន័យតាមច្បា
ប់ ដោយតម្រូវឲ្យសាងខ្យងដាក់រថយន្ត១គ្រឿងផ្សេងទៀត ជាប្រភេទសាំងយ៉ុង៥បាំង រថយន្តល្មើសច្បាប់ចរាចរណ៍ត្រូវបានចាប់ដកហូតយកចង្អើរដែក ដែលផ្សារតភ្ជាប់រថយន្តប៉ែកខាងក្រោយ អ្នកបើកបរត្រូវបានធ្វើកិច្ចសន្យាអប់រំមិនឲ្យមានលើកក្រោយទៀតទេ ។
លោកវរសេនីយ៍ត្រី ស៊ាម យូសេង អធិការរងនគរបាលក្រុងកំពង់ចាមបញ្ជាក់ថា រថយន្តនេះត្រូវបាន
ផ្ទុកទំនិញខុសបច្ចេកទេសដោយតចង្អើរក្រោយ ជាមួយនោះរូបលោកសូមផ្តាំផ្ញើទៅដល់អ្នកបើកបរ
រថយន្តផ្សេងៗទៀត ធ្វើយ៉ាងណានាំគ្នាគោរពច្បាប់ចរាចរណ៍ ដើម្បីចៀសវាងនូវគ្រោះថ្នាក់ដែលកើត
ឡើងជាយថាហេតុនោះ ។
សូមបញ្ជាក់ថា កន្លងទៅថ្មីៗនេះមានរថយន្តធុនធំ១គ្រឿងដឹកដើមដំឡូងមី ចេញពីត្រើយខាងកើត
មកខាងលិចលុះពេលដែលចុះពីលើស្ពានគីហ្ស៊ុណាក៏ស្រាប់តែចៃដន្យរថយន្តដាច់ហ្វ្រាំងមកបុករះ
បណ្តាលឲ្យខូចខាតម៉ូតូរបួសមនុស្ស២នាក់ និងខូចរថយន្ត១គ្រឿង ។
អ្នកបើកបរត្រូវបានចាប់ខ្លួនដោយត្រូវបានចោទប្រកាន់ពីបទបើកបរធ្វេសប្រហែសខ្ជីខ្ជារ និងខ្វះការប្រុងប្រយ័ត្ន បណ្តាលឲ្យរបួសអ្នកដទៃ និងបើកបរក្រោមឥទ្ធិពលសារធាតុញៀនកំពុងតែត្រូវបានឃុំខ្លួននៅពន្ធនាគារខេត្តផងដែរ ៕
ចែករំលែកព័តមាននេះ