រាជធានីភ្នំពេញ ៖ បុរសម្នាក់មិនដឹងថា មានរឿងអីនោះទេ ត្រូវនគរបាលក្រសួងមហាផ្ទៃដេញឃាត់ខ្លួនបានហើយប្រើអំពើហិង្សានៅចំពោះមុខមហាជនរហូតរងរបួសធ្ងន់ធ្ងរ បង្កឱ្យមានការភ្ញាក់ផ្អើលឡើងកាលពីវេលាម៉ោង៧និង៣០នាទីយប់ ថ្ងៃទី២៤ ខែឧសភា ឆ្នាំ២០១៨ ស្ថិតនៅផ្លូវ៣៦០…
រាជធានីភ្នំពេញ ៖ បុរសម្នាក់មិនដឹងថា មានរឿងអីនោះទេ ត្រូវនគរបាលក្រសួងមហាផ្ទៃដេញឃាត់ខ្លួនបានហើយប្រើអំពើហិង្សានៅចំពោះមុខមហាជនរហូតរងរបួសធ្ងន់ធ្ងរ បង្កឱ្យមានការភ្ញាក់ផ្អើលឡើងកាលពីវេលាម៉ោង៧និង៣០នាទីយប់ ថ្ងៃទី២៤ ខែឧសភា ឆ្នាំ២០១៨ ស្ថិតនៅផ្លូវ៣៦០ សង្កាត់បឹងកេងកង៣ ខណ្ឌចំការមន ។ បុរសដែលត្រូវសមត្ថកិច្ចឃាត់ខ្លួនឈ្មោះ អឹង បញ្ញា អាយុ២៣ឆ្នាំ ស្នាក់នៅសង្កាត់ភ្នំពេញថ្មី ខណ្ឌសែនសុខ ។
តាមសម្តីបងប្អូនប្រជាពលរដ្ឋដែលឃើញហេតុការណ៍នៅកន្លែងកើតហេតុបានឱ្យដឹងថា មុនពេលកើតហេតុពួកគាត់មិនដឹងថា មានករណីអ្វីកើតឡើងនោះទេក៏ស្រាប់តែប្រទះឃើញបុរសខាងលើបានជិះម៉ូតូមួយគ្រឿងក្នុងល្បឿនលឿន ខណៈមកដល់ចំណុចកើតហេតុក៏ស្រាប់តែបុរសរូបនោះបានផ្តួលម៉ូតូរត់ចូលទៅក្នុងហាងលក់ ស៊ុបចង្កាក់ ឱ្យគេជួយពេលនោះដែរពួកគាត់ក៏បានឃើញសមត្ថកិច្ច២នាក់ដោយម្នាក់មានពាក់ឯកសណ្ឋាន និងម្នាក់ទៀតអត់មានឯកសណ្ឋានបានរត់ទៅចាប់បុរសខាងលើបាន រួចហើយក៏បានប្រើហិង្សាវាយទៅលើបុរសរូបនោះនៅចំពោះមុខមហាជនដែលកំពុងចោមរោមមើលព្រោងព្រាត ហើយក៏បានដាក់ខ្នោះបុរសម្នាក់នោះថែមទៀតផង ។ បន្ទាប់ពីដាក់ខ្នោះបុរសម្នាក់នោះបានតែដៃម្ខាងហើយបុរសរូបនោះបានយកទូរស័ព្ទខលទៅឪពុកម្តាយឱ្យមកជួយក៏ត្រូវសមត្ថកិច្ចឆក់យកទូរស័ព្ទទៅបោកចោលថែមទៀត ។
បន្តិចក្រោយមកបុរសខាងលើខំប្រឹងរើសបំរាស់មិនព្រមទៅជាមួយសមត្ថកិច្ចនោះទេ ដោយស្រែកឱ្យគេជួយផងហើយថា រងចាំឪពុកម្តាយគាត់មកសិនព្រោះគាត់មិនមែនជាចោរនោះទេតែទោះបីជាបុរសរូបនោះខំស្រែក និងរើសបម្រាស់យ៉ាងក៏ដោយសមត្ថកិច្ចនៅតែចាប់អូសបុរសរូបនោះដាក់ចូលម៉ូតូកង់បីដឹកចេញទៅបាត់ទៅ ។
ចំពោះករណីនេះដែរសមត្ថកិច្ចមូលដ្ឋានគាត់បានបញ្ជាក់ប្រាប់ថា ពួកគាត់មិនដឹងថា ជាករណីអ្វីនោះទេគឺខាងសមត្ថកិច្ចរបស់ក្រសួងមហាផ្ទៃគឺគេជាអ្នកធ្វើដូចនេះហើយកុំឱ្យបងប្អូនយល់ច្រឡំមកលើសមត្ថកិច្ចមូលដ្ឋាន ។
ហេតុការណ៍នេះដែរបានកើតឡើងបានរយៈពេលកន្លះម៉ោងស្រាប់តែខាងសាច់ញាតិរបស់បុរសដែលត្រូវសមត្ថកិច្ចឃាត់ខ្លួនបានទៅដល់ក្រសួងមហាផ្ទៃដើម្បីរកសាច់ញាតិរបស់ខ្លួនដែលសមត្ថកិច្ចឃាត់ខ្លួនមកថាតើមានរឿងអី តែពេលមកក៏ស្រាប់តែឃើញប្អូនប្រុសរបស់ពួកគាត់ដេកនៅលើម៉ូតូកង់បីទាំងដៃជាប់ខ្នោះ និងមានរបួសស្នាមពេញខ្លួនហើយនៅពេលដែលសួរនាំសមត្ថកិច្ចក៏មិនដឹងថា មនរឿងអ្វីឱ្យពិតប្រាកដដែរ ។
ប្រភពដដែលបានបន្តទៀតថា ដោយសារឃើញសភាពបែបនេះពួកគាត់ជាសាច់ញាតិក៏បាននាំប្អូនរបស់គាត់មកធ្វើការសង្គ្រោះនៅគ្លិនិកឯកជន តែដោយសារតែស្ថានភាពធ្ងន់ បែកក្បាល បាក់ក្តោងច្រមុះផង និងខៀវភ្នែកផងពួកគាត់ក៏សំរេចចិត្តបញ្ជួនបន្តទៅសង្គ្រោះនៅមន្ទីពេទ្យលោកសង្ឃ ។ ចំពោះករណីនេះដែរបងប្អូនសាច់ញាតិបុរសដែលត្រូវសមត្ថកិច្ចឃាត់ខ្លួនហើយធ្វើទារុណកម្មយ៉ាងចាស់ដៃព្រមទាំងមានរបួសស្នាមពេញខ្លួន ហើយមិនមានហេតុផលច្បាស់លាស់ពួកគាត់សូមឱ្យសមត្ថកិច្ចជួយរកយុត្តិធម៌ឱ្យពួកគាត់ផង ៕
ចែករំលែកព័តមាននេះ