រាជធានីភ្នំពេញ ៖ យុវជនពីរនាក់ទំនងជាសុទ្ធតែជាកូនអ្នកមានទ្រព្យសម្បត្តិយ៉ាងស្តុកស្តម្ភនោះ បានបោះពួយរថយន្តស៊េរីទំនើបម៉ាក Bentley ពណ៌ស ថ្មីសឡាងមួយគ្រឿង ដែលមានតម្លៃរហូតទៅដល់ជាង ៤០ម៉ឺនដុល្លារឯណ្ណោះ ឡើងលើខឿនពុះចែកទ្រូងផ្លូវ…
រាជធានីភ្នំពេញ ៖ យុវជនពីរនាក់ទំនងជាសុទ្ធតែជាកូនអ្នកមានទ្រព្យសម្បត្តិយ៉ាងស្តុកស្តម្ភនោះ បានបោះពួយរថយន្តស៊េរីទំនើបម៉ាក Bentley ពណ៌ស ថ្មីសឡាងមួយគ្រឿង ដែលមានតម្លៃរហូតទៅដល់ជាង ៤០ម៉ឺនដុល្លារឯណ្ណោះ ឡើងលើខឿនពុះចែកទ្រូងផ្លូវ ខណៈពេលដែលពួកគេបោះពួយក្នុងល្បឿនយ៉ាងលឿនទៅដល់ចំណុចផ្លូវកោងហើយកាច់ចង្កូតបត់មិនទាន់នោះ ដោយបានឱ្យរងការខូចខាតរថយន្តផ្នែកខាងមុខយ៉ាងដំណំ និងខឿនពុះចែកទ្រូងផ្លូវរងការខូចខាតអស់ជាង១០ម៉ែត្រផងដែរ។
ហេតុការណ៍នេះ បានកើតឡើងកាលពីវេលាម៉ោង១១និង៤៥នាទីព្រឹក ថ្ងៃទី២៤ ខែ ឧសភា ឆ្នាំ ២០១៨ នៅចំណុចលើ ផ្លូវថ្មី R 6 (ផ្លូវលើវាលខ្សាច់បឹងកក់) ក្នុងសង្កាត់ស្រះចក ខណ្ឌដូនពេញ។
តាមប្រភពព័ត៌មានបានឱ្យដឹងថា មុនពេលកើតហេតុ រថយន្តស៊េរីទំនើបមួយគ្រឿងម៉ាក Bentley ពណ៌ស ពាក់ស្លាក លេខភ្នំពេញ ២Y-៩១៣៨ មួយគ្រឿង បើកបរដោយយុវជនចំនួន២នាក់ បានបើកបោះពួយក្នុងល្បឿនយ៉ាងតាមបណ្តោយផ្លូវថ្មីមួយខ្សែនៅលើវាលខ្សាច់បឹងកក់ ។ លុះមកដល់ចំណុចកើតហេតុខាងលើដែលជាចំណុចផ្លូវកោង ទំនងអ្នកបើកបររថយន្តបើកក្នុងល្បឿនលឿនពេកមិនអាចគ្រប់គ្រងបាននោះ ក៏ជ្រុលចង្កូតបុកឡើងទៅលើខឿនថ្មពុះចែកទ្រូងផ្លូវអូសចម្ងាយជាង១០ម៉ែត្រ ទើបរថយន្តអស់ល្បឿន និងឈប់បន្តលែងទៅមុខទៀតបាន ។ 
តាមប្រភពដដែលបានប្រាប់បន្តទៀតថា ក្រោយពីរថយន្តស៊េរីទំនើបម៉ាក Bentley ព៌ណស មួយគ្រឿងខាងលើបើកឡើងទៅលើខឿនថ្មពុះចែកទ្រូងផ្លូវរួចហើយ ភ្លាមនោះគេក៏បានឃើញក្មេងប្រុសចំនួន ២នាក់ ដែលមានអាយុប្រហាក់ប្រហែលគ្នាបាននាំគ្នារត់ចុះពីរថយន្តយ៉ាងតក់ក្រហល់ និងនាំគ្នាមកឈរនៅម្ខាងនៃផ្លូវ ហើយក៏ត្រូវបានរថយន្តស៊េរីទំនើបមួយគ្រឿងទៀតមកដឹកយកទៅបាត់ភ្លាមៗពីកន្លែងកើត ហេតុផងដែរ។
ក្នុងករណីនេះដែរ គឺបានកើតឡើងដោយសារតែក្រុមយុវជនទាំងពីរនាក់បានបើកបររថយន្តក្នុងល្បឿន លឿន ដោយខ្វះការប្រុងប្រយ័ត្ន ទើបបណ្តាលឱ្យឡើងលើខឿនពុះចែកទ្រូងផ្លូវបែបនេះ តែមិនបង្កអោយ នរណាម្នាក់រងគ្រោះថ្នាក់នោះទេ ដោយគ្រាន់តែធ្វើអោយរថយន្តរងការខូចខាតផ្នែកខាងមុខធ្ងន់ធ្ងរ ហើយទ្រូងថ្មពុះចែកផ្លូវរងការខូច ខាតអស់ប្រវែងជាង១០ម៉ែត្រប៉ុណ្ណោះ ។ បុរសម្នាក់ដែលឃើញហេតុការណ៍បាននិយាយថា រថយន្តស៊េរីទំនើបម៉ាក Bentley មួយគ្រឿងខាងលើនេះ វាគឺជារថយន្តដែលមានតម្លៃថ្លៃរហូតទៅដល់ជាង ៤០ម៉ឺនដុល្លារឯណ្ណោះ មិនគួរណាបើកយកមកធ្វើអោយខូចខាតបែបនេះឡើយ។
ក្រោយកើតហេតុ តំណាងខាងរថយន្តបង្កមកធ្វើការដោះស្រាយជាមួយភាគីក្រុមហ៊ុនម្ចាស់ផ្លូវខាងលើ ដោយយល់ព្រមចេញថ្លៃជួសជុលខឿនពុះចែកទ្រូងផ្លូវនេះដើម្បីបញ្ចប់រឿង ទើបអាចហៅរថយន្ត ស្ទូចមកស្ទូចយករថយន្តស៊េរីទំនើបខាងលើទៅវិញផងដែរ៕
ចែករំលែកព័តមាននេះ