ខេត្តមណ្ឌលគិរី ៖ សេចក្តីរាយការណ៍បន្តឱ្យដឹងទៀតថា គិតត្រឹមម៉ោងជិត៣រសៀលថ្ងៃទី២៤ ឧសភា នេះ កម្លាំងមន្ត្រីជំនាញដែលបានចូលទៅដល់ទីតាំងរែងមាស នៅជាប់ក្រុមហ៊ុនរ៉ុងឆេង ស្ថិតក្នុងភូមិពូទុង ឃុំចុងផ្លាស់ ស្រុកកែវសីមា បានឱ្យដឹងក្រៅផ្លូវការថា អាចមានសមាសធាតុគីមីជាច្រើនប្រភេទ ដែលបានប្រើប្រាស់ ដើម្បីចាប់យកមាសនោះ ។ តាមការអះអាងជំហានដំបូងរបស់ក្រុមការងារដែលកំពុងស្ថិតនៅទីតាំងផ្ទាល់ខាងលើបាននិយាយទៀតថា គឺឃើញមានអាងស្តុកទឹក និងការបង្ហូរធាតុគីមីចូលព្រែកទេរទៀតផង ។
សេចក្តីរាយការណ៍បន្តថា គ្រាន់តែក្រុមការងារចុះទៅដល់ទីតាំងនោះភ្លាម ក៏ត្រូវម្ចាស់បានរត់គេចខ្លួនបាត់អស់ ។ មិនតែប៉ុណ្ណោះ នៅក្នុងទីតាំងនោះ គឺពិបាកក្នុងការដកដង្ហើមជាខ្លាំង ដោយមានក្លិនអាស៊ីតជះមកកម្រិតខ្ពស់ ។
គួររំលឹកថា ក្រុមការងារអន្តរក្រសួងមានក្រសួងរ៉ែ នឹងថាមពល ក្រសួងបរិស្ថាន អាវុធហត្ថលើផ្ទៃប្រទេស និងអាជ្ញាធរខេត្តមណ្ឌលគិរីសរុបប្រមាណ២០០នាក់ ចុះត្រួតពិនិត្យនៅតំបន់រ៉ែមាសចុងផ្លាស់ ក្នុងភូមិពូទុង ឃុំចុងផ្លាស់ ស្រុកកែវសីមា នៅត្រឹមវេលាម៉ោង១រសៀលថ្ងៃទី២៤ ឧសភា បានទៅដល់ទីតាំងនិងធ្វើការបែកចែកកម្លាំងជា៣ក្រុមដោយ ក្រុមទី១-ចុះទៅពិនិត្យទឹកអូរក្លរ, ក្រុមទី២-ចូលពិនិត្យក្នុងក្រុមហ៊ុនរ៉ុង
ឆេង និងក្រុមទី៣-ចុះទៅពិនិត្យអូរទេ ។
ក្បួនរថយន្តក្រុមការងារជំនាញប្រមាណជិត១០០គ្រឿង ត្រូវបានធ្វើដំណើរចេញពីទីរួមខេត្តមណ្ឌលគិរី តាំងពីព្រលឹមស្រាងៗរហូតដល់ម៉ោង១២ថ្ងៃត្រង់ដដែល ទើបទៅដល់គោលដៅក្រុមហ៊ុនរ៉ុង ឆេង ដែលសង្ស័យបានបង្ហូរកាកសំណល់គីមីពុលចូលប្រភពទឹកធម្មជាតិ ដែលអ្នកភូមិប្រើប្រាស់ប្រចាំថ្ងៃ ទើបបណ្តាលឱ្យមានមនុស្សរងគ្រោះ កាលពីពេលកន្លងមក ។
ព័ត៌មានលម្អឹតនឹងមានផ្សាយជូនបន្តលើទំព័រកាសែតកោះសន្តិភាព ។
ចែករំលែកព័តមាននេះ