ខេត្តកំពង់ធំ ៖ រថយន្តកាមរីគូតស្វិតពន្លះលោកតាអាយុ៩៤ឆ្នាំ ជិះកង់ឆ្លងថ្នល់ស្លាប់ ហេតុគ្រោះថ្នាក់ចរាចរណ៍ខាងលើនេះបានបង្កឡើងរវាងរថយន្តកាមរីគូតស្វិតបុកលោកតាជិះកង់ម្នាក់ បណ្ដាលឲ្យស្លាប់ កាលពីវេលាម៉ោង០៣និង៣៣នាទីរសៀលថ្ងៃទី២៣ ខែឧសភា ឆ្នាំ២០១៨ ស្ថិតនៅលើកំណាត់ផ្លូវជាតិលេខ៦ ចន្លោះគីឡូម៉ែត្រលេខ១៣៨-១៣៩ ក្នុងភូមិសំពង់ ឃុំប្រសាទ ស្រុកសន្ទុក ខេត្តកំពង់ធំ ។
សមត្ថកិច្ចបានឲ្យដឹងថា បើយោងតាមការឲ្យដឹងពីប្រជាពលរដ្ឋដែលរស់នៅក្បែរកន្លែងកើតហេតុនិយាយថា នៅមុនពេលកើតហេតុគេឃើញលោកតាដែលជាជនរងគ្រោះឈ្មោះ ម៉ម ញិល អាយុ៩៤ឆ្នាំ នៅភូមិឃុំកើតហេតុខាងលើ បានជិះកង់ឆ្លងកាត់ផ្លូវក្នុងទិសដៅពីលិចទៅកើត គាប់ជួនក៏មានរថយន្តខាងលើ ពណ៌សពាក់ផ្លាកលេខ ភ្នំពេញ ង.៥៧៩៦ បើកបរទិសដៅពីត្បូងទៅជើង ដោយឈ្មោះ ពេជ ដាណា ភេទប្រុស អាយុ៤០ឆ្នាំ នៅភូមិមេភ្លើង ឃុំស្វាយរៀង ស្រុកស្វាយរៀង ខេត្តស្វាយរៀង នៅក្នុងល្បឿនយ៉ាងលឿន លុះមកដល់ចំណុចខាងលើ ក៏បានបុកកង់ពេញទំហឹង បណ្តាលឲ្យលោកតារងរបួសធ្ងន់ ត្រូវបានបញ្ជូនទៅកាន់មន្ទីរពេទ្យ តែដោយសារតែអាការរបួសធ្ងន់ធ្ងរពេក លោកតាក៏បានស្លាប់បាត់បង់ជីវិតនៅក្នុងមន្ទីរពេទ្យ ។
ចំណែកអ្នកបើកបររថយន្តត្រូវបានឃាត់ខ្លួននាំទៅអធិការដ្ឋាននគរបាលស្រុកសន្ទុក ដើម្បីដោះស្រាយតាមផ្លូវច្បាប់ ។
សមត្ថកិច្ចប្រាប់ថា ករណីគ្រោះថ្នាក់ចរាចរណ៍ខាងលើ មូលហេតុបង្កឡើងដោយអ្នកជិះកង់ខ្វះការប្រុងប្រយ័ត្ន រួមផ្សំនឹងរថយន្តបើកបរមានល្បឿនលឿន ៕
ចែករំលែកព័តមាននេះ