ខេត្តព្រៃវែង ៖ ជារឿងដដែលៗកើតមានស្ទើរគ្រប់ស្រុក និងបណ្តាលឲ្យមានមនុស្សស្លាប់យ៉ាងហោចណាស់៥ទៅ៦នាក់ក្នុងមួយខែដោយសារ តែឆក់ និងចរន្តភ្លើងដែលតដាក់ឆក់កណ្តុរនៅតាមវាលស្រែ ដោយខ្លះដាក់ខ្លួនឯងឆក់ខ្លួនឯង និងខ្លះឆក់អ្នកស្រុកដែលមិនដឹងហើយដើរទៅជាន់ ។ ជាក់ស្តែងកាលពីវេលាម៉ោង៣និង៣០នាទីទាបភ្លឺព្រឹកថ្ងៃទី២៤…
ខេត្តព្រៃវែង ៖ ជារឿងដដែលៗកើតមានស្ទើរគ្រប់ស្រុក និងបណ្តាលឲ្យមានមនុស្សស្លាប់យ៉ាងហោចណាស់៥ទៅ៦នាក់ក្នុងមួយខែដោយសារ តែឆក់ និងចរន្តភ្លើងដែលតដាក់ឆក់កណ្តុរនៅតាមវាលស្រែ ដោយខ្លះដាក់ខ្លួនឯងឆក់ខ្លួនឯង និងខ្លះឆក់អ្នកស្រុកដែលមិនដឹងហើយដើរទៅជាន់ ។
ជាក់ស្តែងកាលពីវេលាម៉ោង៣និង៣០នាទីទាបភ្លឺព្រឹកថ្ងៃទី២៤ ខែឧសភា បុរសម្នាក់បានស្លាប់បាត់បង់ជីវិតដោយសារ តែដួលសង្កត់ទៅលើខ្សែលួសដែលតភ្ជាប់ចរន្តភ្លើងឆក់កណ្តុរនៅចំណុចបឹងលលា ខាងលិចព្រែកទោលចំងាយ២គីឡូម៉ែត្រ ស្ថិតក្នុងភូមិព្រែកក្រូច ឃុំព្រែកតាសរ ស្រុកពោធ៌រៀង ខេត្តព្រៃវែង ។
ជនរងគ្រោះមានឈ្មោះ ត្រិះ សៀងហេង អាយុ២១ឆ្នាំ មុខរបរកសិករមានទីលំនៅក្នុងភូមិកើតហេតុ ។
សមត្ថកិច្ចនគរបាលឃុំព្រែកតាសរបានឲ្យដឹងថា នៅយប់មុនពេលកើតហេតុនោះ ជនរងគ្រោះបានយកខ្សែលួសទៅដាក់រាយឆក់កណ្តុរនៅចំណុចកើតហេតុខាងលើ លុះដល់មេឃជិតភ្លឺពេលកើតហេតុនោះជនរងគ្រោះក៏បានទៅរើសប្រមូលសត្វកណ្តុរដែលឆក់បាន ដើម្បីយកទៅលក់ ប៉ុន្តែក្នុងពេលកំពុងដើរប្រមូលកណ្តុរនោះ ស្រាប់តែរអិលជើងដួលសង្កត់ទៅលើខ្សែលួសដែលជនរងគ្រោះដាក់ឆក់កណ្តុរនោះបណ្តាលឲ្យឆក់ទាំងខ្លួនឯង ស្លាប់នៅហ្នឹងកន្លែងជាមួយសត្វកណ្តុរនោះតែម្តង ។
លុះព្រឹកឡើងភ្លឺច្បាស់ក៏មានអ្នកស្រុកដើរទៅឃើញទើបមានការភ្ញាក់ផ្អើល និងនាំគ្នារាយការណ៍ប្រាប់សមត្ថកិច្ចចុះទៅពិនិត្យសពនៅកន្លែងកើតហេតុ រកឃើញថា ពិតជាស្លាប់ដោយសារឆក់ខ្សែលួសឆក់កណ្តុរពិតមែនទើបប្រគល់សពទៅឲ្យក្រុមគ្រួសារ យកទៅធ្វើបុណ្យតាមប្រពៃណីតែម្តង ។
គួរបញ្ជាក់ផងដែរថា សំរាប់ខែឧសភានេះមានជនរងគ្រោះស្លាប់បាត់បង់ជីវិត ដោយសារតែឆក់ និងខ្សែលួសឆក់កណ្តុរនេះចំនួន៣នាក់រួចមកហើយ ក្នុងនោះនៅស្រុកពាមជរ២នាក់ និងស្រុកពោធ៌រៀងម្នាក់ ហើយកាលពីខែមុនៗក៏មានអ្នកស្លាប់ដោយសារឆក់ខ្សែលួសឆក់កណ្តុរនេះជាច្រើននាក់រួចមកហើយដែរ៕
ចែករំលែកព័តមាននេះ