រាជធានីភ្នំពេញ ៖ ប្រមុខដឹកនាំរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានប្រកាសជាសាធារណៈថា ការតែងតាំងងារ «សម្តេច» ដល់សម្តេចសង្ឃ៣ គឺដោយសារតែព្រះសាក្យមុនី រ័ត្ន សារឿន បានជិះយន្តហោះជាមួយនឹងសម្តេចតេជោពីប្រទេសអូស្ត្រាលីមកក្រុងភ្នំពេញកន្លងមកនោះទេ ។
សម្តេចតេជោថ្លែងនៅក្នុងពិធីប្រកាសតែងតាំង និងស្រោចស្រពព្រះសុគន្ធវារីប្រគេនសម្តេចព្រះកិត្តិយស៣ព្រះអង្គ គឺព្រះឧត្តមមុនី ជា សំអាង, សម្តេចព្រះពុទ្ធជ័យមុនី ឃឹម សន និងសម្តេចព្រះសាក្យមុនី រ័ត្ន សារឿន នៃគណៈមហានិកាយនៃព្រះរាជាណាចក្រកម្ពុជា ដែលពិធីនេះធ្វើឡើងនៅវត្តបទុមវតី រាជធានីភ្នំពេញព្រឹកថ្ងៃទី ២៤ ខែឧសភា ឆ្នាំ២០១៨នេះថា សម្តេចតេជោសុំយកឱកាសនេះអរគុណ និងអរព្រះគុណក៏ដូចជា ថ្លែងនូវការកោតសរសើរចំពោះព្រះអង្គទាំង៣បានខិតខំយ៉ាងខ្លាំង ក្នុងរយៈពេលកន្លងទៅនេះ ដូច្នេះការផ្តល់ងារជាសម្តេច គឺដោយសារតែព្រះសង្ឃទាំង៣បានរួមចំណែកយ៉ាងច្រើនក្នុងការងារព្រះពុទ្ធសាសនា មិនមែនដោយសារតែមនោសញ្ចេតនាណាមួយនោះទេ ។
សម្តេចតេជោ ហ៊ុន សែន មានប្រសាសន៍បញ្ជាក់យ៉ាងដូច្នេះថា ៖ «សុំកុំមានការចោទប្រកាន់ថា ដោយសារតែព្រះ ព្រះសាក្យមុនី រ័ត្ន សារឿនបានជិះយន្តហោះជាមួយខ្ញុំព្រះករុណាខ្ញុំ ពីអូស្ត្រាលីមកកាន់ទីក្រុងភ្នំពេញបានឡើងងារជាសម្តេច ។ ខ្ញុំព្រះករុណាខ្ញុំបានប៉ុនប៉ងរឿងនេះយូរមកហើយ សម្រាប់ការតែងតាំងនេះព្រមជាមួយព្រះមេគុណទាំង២ ព្រះមេគុណនៅក្រុងភ្នំពេញ និងព្រះមេគុណខេត្តកណ្តាល» ។
សម្តេចនាយករដ្ឋមន្ត្រីបានបញ្ជាក់ថា មូលហេតុដែលត្រូវតែងតាំងនេះក៏ប៉ុន្តែក៏បានសង្កេតឃើញ អំពីតួនាទីរបស់ព្រះ អង្គទាំង៣ «បានបំពេញតួនាទីដ៏ល្អប្រសើរក្នុងវិស័យព្រះពុទ្ធសាសនា ដែលសមរម្យ ដើម្បីថ្វាយតាមរយៈសំណើរសុំព្រះរាជក្រឹត្យសម្រាប់តែងតាំងជាសម្តេច» ។ សម្តេចនាយករដ្ឋមន្ត្រីបានបន្តទៀតថា ពុទ្ធចក្រ និងអាណាចក្រប្រៀបដូចជា កង់២ មិនអាចខ្វះបាន ដូច្នេះហើយអាណាចក្រប្រសិនដើរខុសឆ្គងហើយនោះនឹងនាំទៅដល់វិនាសកម្មដល់ពុទ្ធចក្រ និយាយជារួម គឺប៉ះពាល់សម្រាប់សាសនាទាំងអស់តែម្តង ចំណុចនេះយើងបានឃើញរួចមកហើយ នៅក្នុងអតីតកាលដែលពេលដែលប្រទេសជាតិកើតសង្គ្រាមនៅពេលនោះសាសនាក៏ត្រូវបានបំផ្លាញជាមួយគ្នា តាមរយៈការទម្លាក់គ្រាប់បែក គ្រាប់ផ្លោង កាន់ទីអារាមព្រះវិហារសាសនា ព្រះពុទ្ធសាសនាអ៊ីស្លាម និងព្រះវិហារសាសនាគ្រឹស្ត នៅក្នុងរបបប៉ុល ពត ។
សម្តេចតេជោថ្លែងបន្ថែមទៀតថា ដូច្នេះវាទាក់ទងនឹងតួនាទីរបស់រដ្ឋនៅទីនេះ អំពីការកំណត់គោលនយោបាយបានទាក់ទងជាមួយនឹងវិស័យសាសនាផងដែរ ជួនកាលមានការរឹតបណ្តឹងបែបនេះរឹតបណ្តឹងបែបនោះតែក្របខណ្ឌរបស់ប្រទេសកម្ពុជាតាំងពី១៩៧៩ គណបក្សប្រជាជនកម្ពុជាបានធ្វើការងារយ៉ាងល្អ សម្រាប់វិស័យសាសនានៅកម្ពុជា ។
បច្ចុប្បន្នមានជាង៦ម៉ឺនអង្គ ផ្តើមចេញពីព្រះសង្ឃមួយអង្គពេលបង្កើតរណសិរ្សសង្គ្រោះជាតិ ។ ប្រទេសខ្លះពេលឪពុកម្តាយចាស់យកទៅកន្លែងផ្សេង តែសម្រាប់ប្រជាជនកម្ពុជាពេលឪពុក-ម្តាយចាស់ទៅ ពេលឈឺថ្កាត់ គឺតែងតែត្រូវបានកូនចៅមើលថែយ៉ាងល្អផងដែរ ។ លោកនាយករដ្ឋមន្ត្រីបញ្ជាក់ថា «កាលពីពេលមុន គឺយើងហាក់ដូចជា បានច្រឡោះប្រហោងបន្តិច នៅត្រង់ថា នៅពេលដែលមានពិធីម្តងៗ យើងតែងតែដាក់ឲ្យព្រះសង្ឃគង់នៅស្មើជាមួយនឹងគ្រហស្ថ ។
ដូចជាតាមទម្លាប់ធម្មតា គឺនៅខាងឆ្វេង ហើយដាក់កៅអីស្មើជាមួយនឹងគ្រហស្ថ តែក្រោយមកយើងបានកំណត់ឲ្យមានការលើកឡើងមួយកម្រិត ដែលខ្ពស់ជាងកៅអីរបស់គ្រហស្ថធម្មតា» ។ នេះក៏ជាផ្នែកមួយនៃការលើកកម្ពស់កម្រិតនៃការគោរពបូជាចំពោះព្រះពុទ្ធសាសនាផងដែរ ៕
ចែករំលែកព័តមាននេះ