រាជធានីភ្នំពេញ ៖ ស្រូវ គឺជាផលិតផលសំខាន់បំផុតរបស់ប្រទេសកម្ពុជា ដែលពាក់ព័ន្ធ៨០% នៃកសិករ ។ កម្ពុជាបាននាំចេញអង្ករកើនឡើង១០ដង បើប្រៀបធៀបនឹងឆ្នាំ២០១០ ដោយសារការលើកកម្ពស់ស្តង់ដាឧស្សាហកម្ម ការកែលម្អប្រសិទ្ធភាពនៃរោងម៉ាស៊ីនកិនស្រូវនិងអ្នកកែច្នៃបន្ត និងការសម្របសម្រួលនីតិវិធីនាំចេញ ។ វិស័យនេះនៅមានសក្តានុពលបង្កើនតម្លៃការនាំចេញអង្ករបន្ថែមទៀត តាមរយៈការលើកកម្ពស់ទិន្នផលស្រូវនិងគុណភាពស្រូវ ប្រកាន់យកការធ្វើកសិកម្ម និងការកែច្នៃប្រកបដោយនិរន្តរភាព ព្រមទាំងជំរុញការផ្សារភ្ជាប់ខ្សែសង្វាក់តម្លៃ ។ នេះបើយោងតាមសាជីវកម្មហិរញ្ញវត្ថុអន្តរជាតិ ហៅកាត់ថា IFC បានឲ្យដឹងកាលពីថ្ងៃទី២២ ឧសភា ម្សិលមិញ ។
សាជីវកម្ម IFC បានឲ្យដឹងទៀតថា ក្នុងរយៈពេល៣ឆ្នាំខាងមុខនេះ កសិករខ្នាតតូចប្រហែល៩ពាន់នាក់នឹងទទួលបានផលប្រយោជន៍ការយល់ដឹងអំពីប្រតិបត្តិការកសិកម្មប្រកបដោយនិរន្តរភាព បច្ចេកវិទ្យាកសិកម្ម ឆ្លាតវៃ ផ្នែកអាកាសធាតុ និងការបណ្តុះបណ្តាលការគ្រប់គ្រងធុរកិច្ច ដែលបានផ្សព្វផ្សាយដោយគម្រោង និងភាពជាដៃគូរវាងសាជីវកម្មហិរញ្ញវត្ថុអន្តរជាតិ និងការប្តេជ្ញារបស់ក្រុមហ៊ុន Mars ។
លោក Kyle Kelhofer នាយកគ្រប់គ្រងនៃសាជីវកម្មហិរញ្ញវត្ថុអន្តរជាតិ ប្រចាំប្រទេសវៀតណាម កម្ពុជា និងឡាវ បានមានប្រសាសន៍ថា ៖« គោលបំណងនៃគម្រោងនេះ គឺសំដៅច្របាច់បញ្ចូលកសិករតូចតាច និងសហគ្រាសខ្នាតតូចនិងមធ្យម ឱ្យក្លាយទៅជាផ្នែកមួយនៃខ្សែសង្វាក់តម្លៃស្រូវអង្ករកាន់តែមានប្រសិទ្ធភាព ដោយផ្តល់ជូនលទ្ធភាពទទួលបានកាន់តែប្រសើរនូវធាតុចូល បច្ចេកវិទ្យា ចំណេះដឹង និងទីផ្សារ ការផ្សារភ្ជាប់សហគ្រាសកាន់តែប្រសើរឡើង និងការបណ្តុះបណ្តាល » ។
លោកបន្តថា ៖« ការកសាងលើការគាំទ្រតាំងពីមុនរបស់យើងចំពោះវិស័យស្រូវអង្ករកម្ពុជា គម្រោងនេះនឹងជួយបន្ថែមទៀតឱ្យឧស្សាហកម្មនេះសម្រេចបាននូវសក្តានុពលពេញលេញរបស់វា ដោយបង្កើនការនាំចេញផលិតផលអង្ករ ដែលអាចរកប្រភពដើមឃើញ ប្រកបដោយនិរន្តរភាព និងមានគុណភាព
ខ្ពស់»។
លោក Luc Beerens នាយកផ្នែកលទ្ធកម្ម ប្រកបដោយនិរន្តរភាពនៃក្រុមហ៊ុន Mars Food មានប្រសាសន៍ដែរថា ៖« គម្រោងនេះមានគោលបំណងឱ្យកសិករទទួលបាននូវកសិកម្មឆ្លាតវៃផ្នែកអាកាសធាតុ រួមមាន ការដាំគ្រាប់ពូជល្អ បច្ចេកវិទ្យាថ្មី និងសេវាកម្មនានា។ គម្រោងនេះនឹងកសាងខ្សែសង្វាក់ផ្គត់ផ្គង់ស្រូវអង្ករប្រកបដោយនិរន្តរភាពមួយ ដោយប្រកាន់យកការប្រើប្រាស់ថ្នាំសម្លាប់សត្វល្អិតនិងជី និងអនុវត្តវិធី ក្រោយពេលប្រមូលផលកាន់តែប្រសើរឡើង » ៕
ចែករំលែកព័តមាននេះ