រាជធានីភ្នំពេញ ៖ រដ្ឋមន្ត្រីក្រសួងទេសចរណ៍បានអះអាងជាថ្មីប្រកបដោយសុទិដ្ឋិនិយមទៅលើកំណើនភ្ញៀវទេសចរអន្តរជាតិថា ក្នុងឆ្នាំ២០១៨នេះ កម្ពុជានឹងទទួលបានភ្ញៀវទេសចរអន្តរជាតិប្រមាណ៦,២លាននាក់ និងប្រមាណ៧លាននាក់នៅឆ្នាំ២០២០ ។ លោករដ្ឋមន្ត្រី ថោង ខុន…
រាជធានីភ្នំពេញ ៖ រដ្ឋមន្ត្រីក្រសួងទេសចរណ៍បានអះអាងជាថ្មីប្រកបដោយសុទិដ្ឋិនិយមទៅលើកំណើនភ្ញៀវទេសចរអន្តរជាតិថា ក្នុងឆ្នាំ២០១៨នេះ កម្ពុជានឹងទទួលបានភ្ញៀវទេសចរអន្តរជាតិប្រមាណ៦,២លាននាក់ និងប្រមាណ៧លាននាក់នៅឆ្នាំ២០២០ ។
លោករដ្ឋមន្ត្រី ថោង ខុន បានថ្លែងបែបនេះនៅក្នុងវេទិកាកំពូលទេសចរណ៍កម្ពុជា-ចិនលើកទី១ ក្រោមប្រធានបទ «ការចាប់យកកាលានុវត្តភាព នៃការអភិវឌ្ឍវិស័យទេសចរណ៍នៅលើផ្លូវសូត្រ» ដែលបានប្រារព្ធធ្វើឡើងនៅសណ្ឋាគាររ៉េស៊ីដង់សុខា កាលពីថ្ងៃទី១៧ ឧសភា កន្លងមក ។
លោករដ្ឋមន្ត្រីថ្លែងថា ៖« កម្ពុជាបច្ចុប្បន្នមានសុខសន្តិភាព ស្ថិរភាពនយោបាយ សន្តិសុខសណ្តាប់ធ្នាប់ពេញលេញ និងមាន ការអភិវឌ្ឍរីកចម្រើនលើគ្រប់វិស័យ ក្នុងនោះវិស័យទេសចរណ៍រីកចម្រើនគួរជាទី
មោទនៈ » ។
ទេសចរណ៍កម្ពុជា ត្រូវបានចាត់ទុកជាវិស័យអាទិភាពមួយដើរតួជាមាសបៃតង រួមចំណែកដល់ការអភិវឌ្ឍសេដ្ឋកិច្ច-សង្គម និងការការពារបរិស្ថាន ពោលគឺចូលរួមដល់ការកសាងសេដ្ឋកិច្ចបៃតងនៅកម្ពុជា ដែលជាផ្នែកគាំទ្រដល់ការសម្រេចបាននូវគោលដៅអភិវឌ្ឍន៍ ប្រកបដោយចីរភាព (SDGs) ឆ្នាំ២០៣០ របស់អង្គការសហប្រជាជាតិ (UN) ។
ជាក់ស្តែង នៅឆ្នាំ២០១៧ កម្ពុជាសម្រេចបានកំណើនក្នុងអត្រា១១,៨% ជាមួយនឹងការមកដល់នៃភ្ញៀវទេសចរអន្តរជាតិជាង៥,៦លាននាក់ និងនាំប្រាក់ចំណូលប្រមាណ៣.៤០០លានដុល្លារអាមេរិកចាក់បញ្ចូលក្នុងសេដ្ឋកិច្ចជាតិ រួមចំណែកប្រមាណ១៣% នៃផលិតផលក្នុងស្រុកសរុប (GDP) និងបង្កើតការងារដោយផ្ទាល់ប្រមាណជាង៦២ម៉ឺននាក់ ។ ក្នុងរយៈពេល៣ខែដើមឆ្នាំ២០១៨ កម្ពុជាទទួលបានភ្ញៀវអន្តរជាតិចំនួនជាង១,៧លាននាក់ កើនឡើង១៣,៩% ក្នុងនោះភ្ញៀវទេសចរចិនមានចំនួន៥០៥.៩៤០នាក់ កើនឡើង៨៥,៣% ធៀបនឹងរយៈពេលដូចគ្នាឆ្នាំ២០១៧ ។
លោករដ្ឋមន្ត្រីបានលើកឡើងថា តាមការព្យាករ កម្ពុជានឹងទទួលបានភ្ញៀវអន្តរជាតិប្រមាណ៦,២លាននាក់នៅឆ្នាំ២០១៨ និង
ប្រមាណ៧លាននាក់នៅឆ្នាំ២០២០ និងនាំមកនូវចំណូលសរុបប្រមាណ៥.០០០លានដុល្លារអាមេរិក បង្កើតនូវឱកាសការងារប្រមាណ១លាននាក់ និងភ្ញៀវទេសចរអន្តរជាតិប្រមាណ១៥លាននាក់នៅឆ្នាំ២០៣០ ដោយនាំមកនូវចំណូលសរុបប្រមាណ១០ពាន់លានដុល្លារអាមេរិក និងបង្កើតឱកាសការងារប្រមាណ២លាននាក់ ។
ឈរលើមូលដ្ឋាននៃកំណើននេះ ក៏ទាមទារឱ្យមានការគិតគូរ និងគ្រប់គ្រងដោយហ្មត់ចត់ ពិសេសត្រូវមានផែនការយុទ្ធសាស្ត្រទីផ្សារទាក់ទាញទេសចរណ៍ ដែលមានលក្ខណៈគ្រប់ជ្រុងជ្រោយ ស្របពេលដែលពិភពលោកទាំងមូលបាននិងកំពុងយកចិត្តទុកដាក់លើទីផ្សារទេសចរណ៍ចិន ពិសេសការបង្កើតផលិតផលទេសចរណ៍ថ្មី, ការពង្រឹងគុណភាពសេវាកម្មទេសចរណ៍ (ក្នុងនោះការបណ្តុះបណ្តាលធនធានមនុស្សផ្នែកជំនាញជាស្នូលសំខាន់) និងការផ្សព្វផ្សាយ ជាដើម ។
លោកបានបញ្ជាក់ថា ៖« អនាគតនៃវិស័យទេសចរណ៍កម្ពុជា គឺមិនអាចកាត់ផ្តាច់ចេញពីការស្រូបទាញកំណើនយ៉ាងគំហុកនៃលំហូរទេសចរចេញក្រៅរបស់ភ្ញៀវទេសចរចិន ក្នុងបរិបទនៃកំណើនទេសចរណ៍ជារួមរបស់តំបន់អាស៊ីប៉ាស៊ីហ្វិក និងសកលលោក ។ នៅក្នុងក្របខ័ណ្ឌនៃកិច្ចសហប្រតិបត្តិការអាស៊ាន លើវិស័យទេសចរណ៍អាស៊ាន ក៏ដូចជាកម្ពុជា គេបានចាត់ទុកចិនជាដៃគូយុទ្ធសាស្ត្រ និងជាប្រភពទីផ្សារដ៏សំខាន់បំផុត » ។
លោក ទូ ជាំង អនុរដ្ឋមន្ត្រីក្រសួង ទេសចរណ៍ និងវប្បធម៌ប្រទេសចិន បានឲ្យដឹងថា ឆ្នាំនេះគឺជាខួបលើកទី៦០ នៃការបង្កើតចំណងការទូតចិន-កម្ពុជា ។ ក្រោមការដឹកនាំដ៏ត្រឹមត្រូវរបស់ថ្នាក់ដឹកនាំប្រទេសទាំងពីរ ទំនាក់ទំនងដៃគូយុទ្ធសាស្ត្រគ្រប់ជ្រុង ជ្រោយចិន-កម្ពុជា ត្រូវបានពង្រឹង និងពង្រីកជាលំដាប់ ។
លោកបន្ដថា ៖« ឈរលើស្មារតីនេះ កិច្ចសហប្រតិបត្តិការផ្នែកទេសចរណ៍រវាងកម្ពុជា-ចិន ត្រូវបានពង្រឹង និងពង្រីកលើគ្រប់ទិដ្ឋភាព ស្របជាមួយនឹងឆ្នាំ២០១៨ ជាឆ្នាំនៃការប្រារព្ធខួបលើកទី៦០ នៃការផ្សារភ្ជាប់ទំនាក់ទំនងការទូតរវាងកម្ពុជា-ចិន ដែលត្រូវបានស្វាគមន៍ដោយប្រមុខដឹកនាំនៃប្រទេសទាំងពីរ ដើម្បីជំរុញលំហូរទេសចរទៅវិញទៅមក » ។
លោកឧបនាយករដ្ឋមន្ត្រី ហោ ណាំហុង បានថ្លែងនាឱកាសនោះថា វិស័យទេសចរណ៍រវាងកម្ពុជា-ចិន ស្ថិតនៅក្នុងគំនិតផ្តួចផ្តើមជាយុទ្ធសាស្ត្រ «ខ្សែក្រវាត់ និងផ្លូវ» ដែលជាគំនិតផ្តួចផ្តើមវិសេសវិសាលបំផុតរបស់លោក ស៊ី ជីនពីង ប្រធានាធិបតីចិន ។ វិស័យទេសចរណ៍ជាការផ្លាស់ប្តូរប្រជាពលរដ្ឋកម្ពុជា និងចិន ក្នុងក្របខ័ណ្ឌ «ខ្សែក្រវាត់ និងផ្លូវ» ធ្វើឲ្យប្រជាពលរដ្ឋទាំងពីរកាន់តែយោគយល់គ្នា ស្រឡាញ់គ្នា ទៅមករកគ្នា និងបើកចំហឱ្យកាន់តែទូលំទូលាយថែមទៀត ផ្តើមចេញពីផ្លែផ្កានៃការតភ្ជាប់ និងសម្រួលការធ្វើដំណើរទេសចរណ៍ ៕
ចែករំលែកព័តមាននេះ