រាជធានីភ្នំពេញ ៖ ដោយសារតែរន្ទះបាតដៃ «យូឡាយ» ទៅលើស្ត្រីភេទម្នាក់ពីសំណាក់លោកប៉ូលិសប៉ុស្តិ៍ម្នាក់ បានធ្វើឱ្យមានការកក្រើកពេញបណ្តាញសង្គមហ្វេសប៊ុក កាលពីល្ងាចថ្ងៃ២១ ឧសភា ហើយនៅព្រឹកថ្ងៃ២២ ឧសភា…
រាជធានីភ្នំពេញ ៖ ដោយសារតែរន្ទះបាតដៃ «យូឡាយ» ទៅលើស្ត្រីភេទម្នាក់ពីសំណាក់លោកប៉ូលិសប៉ុស្តិ៍ម្នាក់ បានធ្វើឱ្យមានការកក្រើកពេញបណ្តាញសង្គមហ្វេសប៊ុក កាលពីល្ងាចថ្ងៃ២១ ឧសភា ហើយនៅព្រឹកថ្ងៃ២២ ឧសភា មន្ត្រីប៉ូលិសរូបនេះ ក៏ត្រូវបានលោកនាយឧត្តមសេនីយ៍ ជួន សុវណ្ណ អគ្គស្នងការរង និងជាស្នងការនគរបាលរាជធានី បានចេញលិខិតផ្អាកការងារបណ្តោះអាសន្ននូវម្ចាស់បាតដៃរន្ទះនោះដោយអះអាងថា ជាការដាក់ពិន័យកងកម្លាំង ។
លោកអនុសេនីយ៍ទោ កៅ សំអុល អាយុ៤៨ឆ្នាំ ជាមន្ត្រីនគរបាលបម្រើការងារនៅប៉ុស្តិ៍នគរបាលរដ្ឋបាល សង្កាត់ទួលស្វាយព្រៃទី១ ខណ្ឌចំការមន ដែលបានប្រើអំពើហិង្សាដោយការទះកំផ្លៀងទៅលើស្ត្រីម្នាក់ នៅពេលអនុវត្តន៍ច្បាប់ចរាចរណ៍ កាលពីព្រឹកថ្ងៃ២១ ឧសភា ដោយបង្កឱ្យមានការភ្ញាក់ផ្អើលយ៉ាងខ្លាំងនៅលើបណ្តាញសង្គមហ្វេសប៊ុក ។ នៅថ្ងៃទី២២ ឧសភា លោកត្រូវបានលោកនាយឧត្តមសេនីយ៍ ជួន សុវណ្ណ ស្នង ការនគរបាលរាជធានីភ្នំពេញបញ្ជាឱ្យធ្វើការឃាត់ខ្លួន និងផ្អាកការងារជាបណ្តោះអាសន្ន ទៅតាមវិន័យរបស់កងកម្លាំងនគរបាលជាតិ ។
តាមប្រភពព័ត៌មានពីសមត្ថកិច្ចបានប្រាប់ឱ្យដឹងថា រឿងរ៉ាវដែលបង្កឱ្យភ្ញាក់ផ្អើលនៅព្រឹកថ្ងៃ២២ ឧសភា នេះការពិត បានកើតឡើងកាលពីព្រឹកថ្ងៃទី២១ ឧសភា កម្លាំងនគរបាលប៉ុស្តិ៍ទួលស្វាយព្រៃទី១ ជាច្រើននាក់បានចុះអនុវត្តច្បាប់ចរាចរណ៍នៅលើផ្លូវលេខ១៩៣ ខាងត្បូងផ្សារអូឡាំពិក ។ តាមប្រភពដដែលបានប្រាប់បន្តទៀតថា ពេលនោះក៏បានចាប់ឃាត់ស្ត្រីម្នាក់ឈ្មោះ ឌី លីណា អាយុ៣៧ឆ្នាំ ជាគ្រូពេទ្យជិះម៉ូតូមួយគ្រឿង ដោយមិនមានពាក់មួកសុវត្ថិភាពតាមច្បាប់ចរាចរណ៍ទេ ។ ពេលឃាត់នោះ អ្នកគ្រូពេទ្យក៏បានយកទូរស័ព្ទដៃរបស់ខ្លួន ថតរូបកម្លាំងមានសមត្ថកិច្ច ហើយលោក កៅ សំអុល ក៏បានយកទូរស័ព្ទដៃរបស់លោកថតទៅលើស្ត្រីនោះវិញដែរ ។
ការទាស់ពាក្យសំដីជាមួយគ្នា និងថតរូបគ្នាទៅវិញទៅមកនោះ ក៏ស្រាប់តែអ្នកគ្រូពេទ្យយកដៃទៅទះទូរស័ព្ទដៃរបស់លោកធ្លាក់ពីដៃទៅលើថ្នល់ធ្វើឱ្យបែកអេក្រង់ ។ ដោយសារតែការឆេវឆាវមួយគ្រាទប់កំហឹងមិនបាន លោក កៅ សំអុល ក៏បានទះកំផ្លៀងទៅលើគុម្ពត្រចៀកអ្នកគ្រូមួយដៃធ្វើឱ្យមានស្នាមក្រហមភ្លាម ។ ក្រោយពេលកើតមានហិង្សា ដោយសារប៉ូលិសវាយលើស្ត្រីភេទ ដែលជារឿងរ៉ាវមិនគួរកើតមាន អ្នកគ្រូពេទ្យ និង លោក កៅ សំអុល ក៏បានទៅធ្វើការសម្របសម្រួល ដោយធ្វើកិច្ចសន្យាបញ្ចប់រឿងនៅប៉ុស្តិ៍នគរបាលទួលស្វាយព្រៃទី១ ដោយលោក កៅ សំអុល ព្រមសងថ្លៃព្យាបាល ក្រោយពេលកើតហេតុនោះដែលគិតថាចប់ហើយ ។
លុះមកដល់រសៀលថ្ងៃដដែល ក៏ស្រាប់តែបែកធ្លាយរូបភាពថតបានតាមកាមេរ៉ាសុវត្ថិភាពពីផ្ទះមួយកន្លែងនៅក្បែរនោះ ត្រូវបានបង្ហោះលើបណ្តាញសង្គមហ្វេសប៊ុក ទើបធ្វើឱ្យមានការភ្ញាក់ផ្អើលទៅដល់លោក នាយឧត្តមសេនីយ៍ ជួន សុវណ្ណ ស្នងការនគរបាលរាជធានីភ្នំពេញ ចេញបញ្ជាឱ្យចាប់ឃាត់ខ្លួនលោក កៅ សំអុល នាល្ងាចថ្ងៃទី២១ ឧសភា តែម្តង ។ ហើយនៅព្រឹកថ្ងៃទី២២ ឧសភា ក៏មានលិខិតធ្វើការផ្អាកការងារលោក កៅ សំអុល ជាមន្ត្រីនគរបាលប៉ុស្តិ៍ទួលស្វាយព្រៃទី១ រូបនោះ ជាបណ្តោះអាសន្នផងដែរ ។
ក្នុងលិខិតបានចែងថា ផ្អាកការងារបណ្តោះអាសន្នចំពោះលោកអនុសេនីយ៍ទោ កៅ សំអុល អត្តលេខ២៧៧០២ ឋានៈមន្ត្រីប៉ុស្តិ៍នគរបាលរដ្ឋបាលទួលស្វាយព្រៃទី១ ចំណុះអធិការដ្ឋាននគរបាលខណ្ឌចំការមន ដោយមូលហេតុបញ្ចេញអាកប្បកិរិយា ឬពាក្យសម្តីគ្មានសីលធម៌ អមនុស្សធម៌ ខ្វះសុជីវធម៌ដែលជាហេតុធ្វើឱ្យបាត់បង់កិត្តិយស សេចក្តីថ្លៃថ្នូររបស់នគរបាលជាតិ ។ លិខិតដដែលបានកំណត់ថា សាមីខ្លួនត្រូវមកបង្ហាញមុខនៅការិយាល័យបុគ្គលិករៀងរាល់ម៉ោងធ្វើការដើម្បីកែប្រែកំហុសឆ្គងនិងរង់ចាំការសម្រេចជាថ្មី។
ចំពោះករណីខាងលើនេះ បានធ្វើឱ្យមានមតិចម្រុះក្នុងបណ្តាញសង្គមដែលcomment តាមផេកនានា ខ្លះក៏បានគាំទ្រ ខ្លះស្តីបន្ទោសចំពោះការប្រើហិង្សាបែបនេះទៅលើស្ត្រីភេទ ។ ក្រៅពីវីដេអូឃ្លីបបង្ហាញពីការទះមួយកំផ្លៀងលើស្ត្រីជិះម៉ូតូនោះ ក៏មានឃ្លីបមួយទៀតដែលទំនងជាថតដោយលោក កៅ សំអុល ដោយបាននិយាយបរិហារថា ជាស្ត្រីជើងខ្លាំងនៅអូឡាំពិកនិងជេរប៉ូលិសថាជាចោរ ។ ទោះជាបែបណាក្តី ការប្រើហិង្សាលើស្ត្រីភេទ ព្រោះតែចង់ចាញ់ ចង់ឈ្នះ មិនគួរធ្វើបែបនេះទេ ក្នុងនាមជាសមត្ថកិច្ចឡើយ ៕
ចែករំលែកព័តមាននេះ