រាជធានីភ្នំពេញ ៖ រថយន្តប្រមូលសំរាមរបស់ក្រុមហ៊ុន ស៊ិន ទ្រី បត់ស្តាំមិនបានប្រយ័ត្នក៏ជ្រុលប៉ះស្តុបរថយន្តស៊េរីទំនើបចតចោលនៅតាមចិញ្ចើមផ្លូវបណ្តាលឱ្យបែកស្តុបខាងឆ្វេង ។ ហេតុការណ៍នេះបានកើតឡើងកាលពីវេលាម៉ោង៩យប់ ថ្ងៃទី២២ ខែឧសភា ឆ្នាំ២០១៨ តាមបណ្តោយផ្លូវព្រះមុនីវង្សកែងផ្លូវ១៧៤ នៅចំណុចក្បែរនឹងស្តុបអូរឬស្សី ស្ថិតនៅក្នុងសង្កាត់បឹងរាំង ខណ្ឌដូនពេញ ។
តាមប្រភពពីសាក្សីដែលឃើញហេតុការណ៍បានឱ្យដឹងថា មុនពេលកើតហេតុគេបានឃើញរថយន្តស៊េរីទំនើបមួយគ្រឿង ពណ៌ខ្មៅ ពាក់ស្លាកលេខ ខេមរភូមិន្ទ០១ ២-៤១៨៨ ចតទុកចោលនៅចិញ្ចើមផ្លូវកែងផ្លូវ១៧៤ ខណៈដែលកើតហេតុក៏ស្រាប់តែរថយន្តប្រមូលសំរាមរបស់ក្រុមហ៊ុន ស៊ិន ទ្រី ពណ៌លឿង បានស៊ីញ៉ូបត់ស្តាំដើម្បីទៅប្រមូលសំរាមតែបត់រថយន្តមិនបានប្រយ័ត្នជ្រុលទៅប៉ះចំស្តុបក្រោយរថយន្តស៊េរីទំនើបនោះបណ្តាលឱ្យបែក និងក្រពិតគូទក្រោយជំហៀងខាងឆ្វេងត្រូវម្ចាស់រថយន្តរងគ្រោះចេញមកទាមទារសំណងចំនួន១០០០ដុល្លារ ប៉ុន្តែខាងរថយន្ត ស៊ិន ទ្រី អត់មានលិទ្ធភាពសងក៏ប្រគល់ឱ្យសមត្ថកិច្ចធ្វើតាមនីតិវិធី ។
ក្រោយពេលកើតហេតុរថយន្តភាគីទាំងសងខាងត្រូវបានសមត្ថកិច្ចវាស់វែងយកទៅរក្សាទុកនៅការិយាល័យចរាចរណ៍ផ្លូវគោករងចាំដោះស្រាយគ្នានៅពេលក្រោយទៀត ៕
ចែករំលែកព័តមាននេះ