រាជធានីភ្នំពេញ ៖ បន្ទាប់ពីប្រកាសទទួលស្គាល់ជាផ្លូវការនូវគណបក្សចំនួន១៦ ដែលបានចុះបញ្ជីនៅ គ.ជ.ប ដើម្បីចូលរួមក្នុងការបោះឆ្នោតជាតិជ្រើសតាំងតំណាងរាស្ត្រ អាណត្តិទី០៦នោះ នៅរសៀលថ្ងៃទី២២ ខែឧសភា ឆ្នាំ០១៨នេះ…
រាជធានីភ្នំពេញ ៖ បន្ទាប់ពីប្រកាសទទួលស្គាល់ជាផ្លូវការនូវគណបក្សចំនួន១៦ ដែលបានចុះបញ្ជីនៅ គ.ជ.ប ដើម្បីចូលរួមក្នុងការបោះឆ្នោតជាតិជ្រើសតាំងតំណាងរាស្ត្រ អាណត្តិទី០៦នោះ នៅរសៀលថ្ងៃទី២២ ខែឧសភា ឆ្នាំ០១៨នេះ គ.ជ.ប ក៏បានប្រកាសទទួលស្គាល់ជាផ្លូវការនូវ គណបក្សនយោបាយ២ទៀត គឺគណបក្សឆន្ទៈខ្មែរ ដែលដាក់បេក្ខជនឱ្យឈរឈ្មោះនៅ២៥មណ្ឌល និងគណបក្សខ្មែរសាធារណរដ្ឋ ដែលដាក់បេក្ខជនឱ្យឈរឈ្មោះនៅ១០មណ្ឌល។ នេះបើយោងតាមសេចក្តីប្រកាសព័ត៌មានរបស់ គ.ជ.ប។ យោងតាមសេចក្តីប្រកាសព័ត៌មានរបស់ គ.ជ.ប បានឲ្យដឹងថា រហូតល្ងាចថ្ងៃទី២២ ខែឧសភានេះ មានគណបក្សនយោបាយសរុបទាំងអស់១៨ហើយ ដែល គ.ជ.ប បានទទួលស្គាល់ជាផ្លូវការ ដើម្បីឱ្យចូលរួមក្នុងការបោះឆ្នោត ក្នុងនោះរួមមានដូចតទៅ៖ ១-គណបក្សខ្មែរឈប់ក្រ ដាក់បេក្ខជនឈរនៅ ២៥មណ្ឌល, ២-គណបក្សសម្ព័ន្ធដើម្បីប្រជាធិបតេយ្យ ដាក់បេក្ខជនឈរឈ្មោះនៅ ២៥មណ្ឌល, ៣-គណបក្សសំបុកឃ្មុំសង្គមប្រជាធិបតេយ្យ ដាក់បេក្ខជនឈរឈ្មោះនៅ ២៥មណ្ឌល,។
៤-គណបក្សប្រជាធិបតេយ្យមូលដ្ឋាន ដាក់បេក្ខជនឈរឈ្មោះនៅ ២៥មណ្ឌល, ៥-គណបក្សខ្មែរតែមួយ ដាក់បេក្ខជនឈរឈ្មោះនៅ ១៦មណ្ឌល, ៦-គណបក្សពន្លឺថ្មី ដាក់បេក្ខជនឈរឈ្មោះនៅ ១៣មណ្ឌល, ៧-គណបក្សប្រជាជនកម្ពុជា ដាក់បេក្ខជនឈរឈ្មោះនៅ ២៥មណ្ឌល, ៨-គណបក្សយុវជនកម្ពុជា ដាក់បេក្ខជនឈរឈ្មោះនៅ ១៧មណ្ឌល, ៩-គណបក្សសញ្ជាតិកម្ពុជា ដាក់បេក្ខជនឈរឈ្មោះនៅ ២៥មណ្ឌល, ១០-គណបក្សខ្មែររួបរួមជាតិ ដាក់បេក្ខជនឈរឈ្មោះនៅ ២៥មណ្ឌល, ១១-គណបក្សហ្វ៊ុនស៊ិនប៉ិច ដាក់បេក្ខជនឈរឈ្មោះនៅ ២៥មណ្ឌល, ១២-គណបក្សធម្មាធិបតេយ្យ ដាក់បេក្ខជនឈរឈ្មោះនៅ ១០មណ្ឌល, ១៣-គណបក្សមាតុភូមិយើង ដាក់បេក្ខជនឈរឈ្មោះនៅ ៦មណ្ឌល, ១៤- គណបក្សខ្មែរក្រោក ដាក់បេក្ខជនឈរឈ្មោះនៅ ៦មណ្ឌល, ១៥-គណបក្សសាធារណរដ្ឋប្រជាធិបតេយ្យ ដាក់បេក្ខជនឈរឈ្មោះនៅ ១៦មណ្ឌល, ១៦-គណបក្សខ្មែរអភិវឌ្ឍន៍សេដ្ឋកិច្ច ដាក់បេក្ខជនឈរឈ្មោះនៅ ១២មណ្ឌល, ១៧-គណបក្សឆន្ទៈខ្មែរ ដាក់បេក្ខជនឱ្យឈរឈ្មោះនៅ ២៥មណ្ឌល, ១៨-គណបក្សខ្មែរសាធារណរដ្ឋ ដាក់បេក្ខជនឱ្យឈរឈ្មោះនៅ១០មណ្ឌល។
ចំណែក២គណបក្សផ្សេងទៀត គឺគណបក្សរស្មីខេមរា និងគណបក្សជនជាតិដើមប្រជាធិបតេយ្យកម្ពុជា គ.ជ.ប បានផ្ញើលិខិតជូនដំណឹងដល់គណបក្សទាំងនោះ ដើម្បីកែតម្រូវ និងបំពេញលក្ខខណ្ឌបន្ថែម។ គណបក្សនយោបាយនោះមាន ពេលយ៉ាងយូរចំនួន៥ថ្ងៃ ដើម្បីបញ្ចប់នីតិវិធី បន្ទាប់ពីទទួលបានសេចក្តីជូនដំណឹងពី គ.ជ.ប។ សូមបញ្ជាក់ថា ការចុះឈ្មោះគណបក្សនយោបាយ និងបេក្ខភាពសម្រាប់ការបោះឆ្នោតជ្រើសរើសតំណាងរាស្ត្រ អាណត្តិទី៦ ត្រូវបានបិទបញ្ចប់ នៅថ្ងៃទី១៤ ខែឧសភា ឆ្នាំ២០១៨។ គណបក្សនយោបាយដែលបានចុះឈ្មោះ និងដាក់បេក្ខភាពប្រកួតប្រជែង មានរហូតដល់ទៅ ២០គណបក្ស៕
ចែករំលែកព័តមាននេះ