ខេត្តព្រៃវែង ៖ ផ្ទះល្វែងមួយកន្លែងត្រូវបានគេសាងសង់រំលោភមកលើដីចំណីផ្លូវជាតិស្ទើរទាំងស្រុង ខណៈអាជ្ញាធរចេះតែឃាត់ ម្ចាស់សំណង់ចេះតែបន្តធ្វើមិនឈប់។ ផ្ទះល្វែងដែលកំពុងសាងសង់នេះ ស្ថិតនៅលើចិញ្ចើមផ្លូវជាតិលេខ៨អា ត្រង់ចំណុចភូមិព្រៃព្នៅ ឃុំព្រៃព្នៅ ស្រុកពារាំង ខេត្តព្រៃវែង។ មន្ត្រីនៅស្រុកពារាំងម្នាក់ បានបង្ហើបប្រាប់ឲ្យដឹងនៅថ្ងៃទី២២ ឧសភា ឆ្នាំ២០១៨ នេះថា សំណង់នៅចំណុចខាងលើគឺធ្វើដោយគ្មានច្បាប់ទម្លាប់អ្វីទេ ហើយអាជ្ញាធរស្រុក ឃុំបានចុះហាមឃាត់ ជាច្រើនលើកច្រើនសារមកហើយ ប៉ុន្តែម្ចាស់សំណង់មិនព្រមស្ដាប់ គេនៅតែបន្តធ្វើរហូត ឃាត់ថ្ងៃនេះធ្វើថ្ងៃស្អែក ឃាត់ថ្ងៃស្អែកធ្វើខានស្អែក។
ដោយឡែកពលរដ្ឋដែលរស់នៅក្បែរទីតាំង សំណង់ នោះបានឲ្យដឹងថា ផ្ទះល្វែងនេះគេធ្វើសម្រាប់ជួល ហើយកន្លងមកឃើញតែមនុស្សមករកជួល ប៉ុន្តែម្ចាស់មិនទាន់ដាក់ថ្លៃថាជួល១ខែតម្លៃប៉ុន្មាននោះទេ ហើយបើគិតចំណីផ្លូវវិញដល់ពាក់កណ្ដាលផ្ទះ ឯណោះ។ ពលរដ្ឋបន្តថា ផ្ទះល្វែងនេះធ្វើរំលោភដីចំណីផ្លូវ ហើយថែមទាំងធ្វើសំយ៉ាបដែក លយចេញវែងមកខាងមុខទៀត។ មួយរយៈមុនគាត់ឃើញអាជ្ញាធរ ចុះឃាត់ដល់ទៅ២លើក មិនឲ្យម្ចាស់សំណង់សាងសង់ ប៉ុន្តែមិនដឹងយ៉ាងម៉េចទើបគេធ្វើរហូត?។
ដោយឡែកក្រុមជាងដែលកំពុង សាងសង់ទីនោះបានប្រាប់ថា សំណង់រឹងមាំមួយនេះមានចំនួនសរុប ១៦ល្វែង ក្នុង១ល្វែងមានទំហំទទឹង ៥ម៉ែត្រ ជម្រៅ១២ម៉ែត្រ មានបន្ទប់ទឹក និងឡៅតឿ មួយកំណាត់ផ្ទះខាងក្រោយធ្វើអំពីដែកសម្រាប់ ដេកពេលយប់។ ក្នុងនោះ ថៅកែបានកំណត់ដាក់ជួលមួយខែចាប់ពី១៥០ដុល្លារ ទៅ២០០ដុល្លារ។ ហើយសំណង់មួយនេះ ចាប់ធ្វើតាំងពីខែមីនា ឆ្នាំ២០១៨ មកម្លេះ រហូតដល់ពេលនេះសម្រេចបាន ៨០%ហើយ។ រីឯលោក កែវ ឈួន មេឃុំព្រៃព្នៅ បានឲ្យដឹងនារសៀលថ្ងៃទី២២ ខែឧសភា នេះថា សំណង់នៅចំណុចនោះលោកបានធ្វើការហាមឃាត់មួយលើកជាពីរលើក ប៉ុន្តែគេមិនស្ដាប់នៅ បន្តធ្វើដដែល ហើយនេះជាសំណង់អត់ច្បាប់៕
ចែករំលែកព័តមាននេះ