ខេត្តឧត្តរមានជ័យ ៖ បុរស២នាក់ត្រូវបានជាប់ចោទពីបទលួចកាច់សោ.កម៉ូតូពីស្ត្រីម្នាក់ ហើយត្រូវសមត្ថកិច្ចតាមទាន់វាយខ្នោះ ហេតុការណ៍នេះកើតឡើងកាលពីម៉ោង១១ព្រឹក ថ្ងៃទី២០ ឧសភា ស្ថិតនៅភូមិព្រៃស្អាក ឃុំត្រពាំងប្រាសាទ ស្រុកត្រពាំងប្រាសាទ ។
ជនសង្ស័យទាំង២នាក់ ១-ឈ្មោះ ចាន់ ឡាក់ ភេទប្រុស អាយុ៣៣ឆ្នាំ រស់នៅភូមិគោកស្ពាន ឃុំគោកស្ពានស្រុកស្រុកស្រីស្នំ ខេត្តសៀមរាប និង២-ឈ្មោះ ត្រាច រុំ ភេទប្រុស អាយុ២២ឆ្នាំ រស់នៅភូមិសំបូ ឃុំបាក់អន្លួង ស្រុកត្រពាំងប្រាសាទ ខេត្តឧត្តរមានជ័យ ដោយឡែកស្ត្រីរងគ្រោះឈ្មោះ ណុប ស្រីតូច អាយុ២៦ឆ្នាំ រស់នៅក្នុងភូមិ-ឃុំកើតហេតុខាងលើ ជាម្ចាស់ម៉ូតូម៉ាកហុងដាឌ្រីម ស៊េរីឆ្នាំ២០០៤ ពណ៌ខ្មៅ គ្មានស្លាកលេខ។
តាមប៉ូលិសស្រុកបានឱ្យដឹងថា មុនកើតហេតុស្ត្រីរងគ្រោះបានជិះម៉ូតូចេញមកពីផ្សារត្រពាំងប្រាសាទហើយត្រឡប់មកផ្ទះវិញ ដោយទុកម៉ូតូនៅមុខផ្ទះ រួចក៏ដើចូលទៅក្នុងផ្ទះរបស់ខ្លួន ស្រាប់តែក្រុមចោរទាំង២នាក់នេះលួចកាច់សោ.កម៉ូតូ ហើយជិះចេញទៅបាត់ភ្លាមៗនោះ ។ ក្រោយកើតហេតុម្ចាស់ម៉ូតូបានរត់មកប្តឹងប៉ូលិស ហើយសមត្ថកិច្ចបានចេញពួនស្ទាក់ ក៏ជួបប្រទះឃើញ ហើយចាប់ឃាត់ខ្លួននាំមកអធិការស្រុកធ្វើការសាកសួចម្លើយតែម្តង។
យោងទៅលើចម្លើយជនសង្ស័យទាំង២នាក់សារភាពថា ខ្លួនពិតជាបានធ្វើសកម្មភាពលួចកាច់សោ.កម៉ូតូពីស្ត្រីរងគ្រោះពិតប្រាកដមែន ។ ក្រោយមកសមត្ថកិច្ចបានកសាងសំណុំរឿងបញ្ជូនជនសង្ស័យទាំង២នាក់ទៅតុលាការអមសាលាដំបូងខេត្តចាត់ការតាមនីតិវិធីច្បាប់៕
ចែករំលែកព័តមាននេះ