រាជធានីភ្នំពេញ ៖ លោក សម រង្ស៊ី អតីតប្រធានគណបក្សសង្គ្រោះជាតិបានលើកឡើងថា លោកកំពុងរងចាំលទ្ធផលនៃការបោះឆ្នោតជ្រើសតាំងអ្នកតំណាងរាស្ត្រអាណត្តិទី៦នៅពេលខាងមុខនេះទោះបីជាគណបក្សប្រឆាំងមិនបានចូលរួមប្រកួតប្រជែងការបោះឆ្នោតក៏ដោយ ។ ថ្លែងនៅចំពោះអ្នកគាំទ្រនៅក្នុងទីក្រុង…
រាជធានីភ្នំពេញ ៖ លោក សម រង្ស៊ី អតីតប្រធានគណបក្សសង្គ្រោះជាតិបានលើកឡើងថា លោកកំពុងរងចាំលទ្ធផលនៃការបោះឆ្នោតជ្រើសតាំងអ្នកតំណាងរាស្ត្រអាណត្តិទី៦នៅពេលខាងមុខនេះទោះបីជាគណបក្សប្រឆាំងមិនបានចូលរួមប្រកួតប្រជែងការបោះឆ្នោតក៏ដោយ ។
ថ្លែងនៅចំពោះអ្នកគាំទ្រនៅក្នុងទីក្រុង វែនឃូវើ ប្រទេសកានណាដា លោក សម រង្ស៊ី បានបញ្ជាក់ថា «សម្រាប់អ្នកស្នេហាជាតិ ដែលបានធ្វើដំណើរមកដល់ផ្លូវបំបែកគឺត្រូវបត់ស្តាំតាមផ្លូវសង្គ្រោះជាតិដើម្បីសុវត្ថិភាពខ្លួនឯង ក្រុមគ្រួសារ និងសង្គមជាតិ ! កុំបត់ឆ្វេងតាមសម្តេចតេជោ ហ៊ុន សែន ចង់បានត្រូវបត់ស្តាំវិញគឺបត់ចូលផ្ទះយើងវិញ ដោយមិនទៅបោះឆ្នោតក្លែងក្លាយ នៅថ្ងៃទី២៩ ខែកក្កដា ខាងមុខនេះ» ។
លោក សម រង្ស៊ី ក៏បានលើកឡើងទៀតថា លោកនឹងរងចាំលទ្ធផលនៃការបោះឆ្នោតនៅពេលខាងមុខនេះទោះបីជាគណបក្សប្រឆាំងចូលរួមបោះឆ្នោតក៏ដោយព្រោះថាប្រសិនអ្នកដែលទៅបោះឆ្នោតគឺគាំទ្រគណបក្សប្រជាជនកម្ពុជា ចំណែកអ្នកមិនទៅបោះឆ្នោតគឺគណបក្សសង្គ្រោះជាតិ ។
លោកបានគូសបញ្ជាក់ថា «អ្នកដែលទៅបោះឆ្នោតគឺអ្នកគាំទ្រគណបក្សប្រជាជនកម្ពុជា ចំណែកអ្នកមិនទៅគឺគាំទ្រគណបក្សសង្គ្រោះជាតិ ។ ដូច្នេះបើអ្នកមិនទៅបោះឆ្នោតមានចំនួនច្រើនជាងអ្នកទៅមានន័យគណបក្សសង្គ្រោះជាតិឈ្នះឆ្នោតជាងមុន» ។
យ៉ាងណាក្តីអតីតមេបក្សប្រឆាំងនៅតែប្រកាន់ជំហរអំពាវនាវដល់ពលរដ្ឋកុំឲ្យទៅបោះឆ្នោតដែលនឹងប្រព្រឹត្តិទៅនៅថ្ងៃទី២៩ ខែកក្កដា ឆ្នាំ២០១៨ ខាងមុខនេះផងដែរ ដោយលោកអះអាងជាការបោះឆ្នោយក្លែងក្លាយព្រោះគ្មានគណបក្សប្រឆាំងរបស់លោកចូលរួម ។
ទាក់ទិននឹងការលើកឡើងរបស់លោក សម រង្ស៊ី នេះត្រូវបានលោក សុខ ឥសាន អ្នកនាំពាក្យគណបក្សប្រជាជនកម្ពុជាសរសេរតាមប្រព័ន្ធតេឡេក្រាមឆ្លើយតបថា អ្នកដែលប្រកាសឲ្យប្រជាជនទៅបោះឆ្នោតគឺត្រឹមត្រូវតាមច្បាប់ ហើយពួកអ្នកប្រកាសបំផ្លាញការបោះឆ្នោតទេដែលខុសច្បាប់ ។
ចំណែកលោក គឹម សន្តិភាព អ្នកនាំពាក្យក្រសួងយុត្តិធម៌លើកឡើងថា ខ្លឹមសារក្នុងរដ្ឋធម្មនុញ្ញនៃព្រះរាជាណាចក្រកម្ពុជា ដែលជាច្បាប់កំពូលនៃកម្ពុជាបានចែងថា ប្រជាពលរដ្ឋខ្មែរគ្រប់រូបត្រូវគោរពរដ្ឋធម្មនុញ្ញ និងគោរពច្បាប់ ។ ប្រជាពលរដ្ឋខ្មែរទាំងពីរភេទមានសិទ្ធិបោះឆ្នោត ។ ប្រជាពលរដ្ឋខ្មែរគ្រប់រូបមានកាតព្វកិច្ចរួមចំណែកកសាងប្រទេស និងការពារមាតុភូមិ ។ ហេតុនេះសូមបងប្អូនទៅចូលរួមបោះឆ្នោតនាថ្ងៃទី២៩ ខែកក្កដា ឆ្នាំ២០១៨ ដើម្បីគោរពអនុវត្តតាមស្មារតីនៃរដ្ឋធម្មនុញ្ញ ៕
ចែករំលែកព័តមាននេះ