រាជធានីភ្នំពេញ ៖ កម្ពុជាបានចាប់អនុវត្តការចុះបញ្ជីកម្មសិទ្ធិបញ្ញា ដើម្បីការពារម៉ាកសញ្ញា និងផលិតផលតាំងពីឆ្នាំ១៩៩១មកម្ល៉េះ ដែលគ្រានោះ គឺក្រសួងពាណិជ្ជកម្មជាអ្នកសម្រេចជាឯកច្ឆន្ទ ក៏ប៉ុន្តែក្រោយមក ក៏បានធ្វើឡើងដោយមានការចូលរួមជាអន្តរក្រសួង ដូចជា ពីក្រសួងឧស្សាហកម្ម និងសិប្បកម្ម ជាដើម ។
បើតាមមន្ត្រីទទួលខុសត្រូវលើការចុះបញ្ជីបានបញ្ជាក់ថា គិតរហូតមកដល់បច្ចុប្បន្ន ការចុះបញ្ជីកម្មសិទ្ធិបញ្ញានៅក្នុងក្រសួងពាណិជ្ជកម្មបានប្រមាណជាង៧ម៉ឺនម៉ាកហើយ ក្នុងនោះកាលពីឆ្នាំ២០១៧កន្លងទៅ ក្រសួងយល់ព្រមចុះបញ្ជីបានចំនួន៤.៧០០ម៉ាក ។
លោក អប់ រ៉ាឌី ប្រធាននាយកដ្ឋានកម្មសិទិ្ធបញ្ញា បានឲ្យដឹងថា ការចុះបញ្ជីកម្មសិទ្ធិបញ្ញាសម្រាប់ក្រសួងពាណិជ្ជកម្ម បានធ្វើឡើងតាំងពីឆ្នាំ១៩៩១ ហើយរហូតមកដល់ពេលនេះ ក្រសួងបានទទួលការចុះបញ្ជីសរុបមានចំនួនជាង៧ម៉ឺនម៉ាករួចហើយ និងកំពុងបន្តជំរុញបន្ថែមទៀតនូវបណ្ដាផលិតផលនានាដែលទទួលបានការគាំទ្រពីប្រជាពលរដ្ឋក្នុង និងក្រៅស្រុក ។
លោកបន្តថា ៖« បច្ចុប្បន្ននេះ ក្រសួងពាណិជ្ជកម្មបានធ្វើការជាមួយបណ្ដាស្ថាប័នពាក់ព័ន្ធនានា ដើម្បីជំរុញឲ្យការចុះបញ្ជីកម្មសិទ្ធិបញ្ញាកាន់តែច្រើន ។ ជាក់ស្ដែងដូចជា ផ្កាអំបិលរបស់កម្ពុជា ដែលកំពុងទទួលស្គាល់ពីអន្តរជាតិ និងគុយទាវភ្នំពេញ ជាដើម » ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានមានប្រសាសន៍ថា កម្មសិទ្ធិបញ្ញាជាចលករមួយដ៏សំខាន់សម្រាប់ជំរុញការអភិវឌ្ឍប្រទេសជាតិ ហើយបើគ្មានការគោរពកម្មសិទ្ធិបញ្ញាទេ វិនិយោគិនមកពីបណ្ដាប្រទេសផ្សេងៗនឹងខ្លាចរអាក្នុងការវិនិយោគនៅកម្ពុជា ។
លោកថា ៖« កម្មសិទ្ធិបញ្ញានេះ ក៏ជាការលើកទឹកចិត្តដល់អ្នកផលិត ឬអ្នកបង្កើតនូវម៉ាកសញ្ញាផលិតផល និងអ្នកតែងនិពន្ធ ជាដើម » ។
លោករដ្ឋមន្ត្រីបានបន្តថា ក្នុងឆ្នាំ២០១៧កន្លងទៅនេះពិនិត្យឃើញថា ក្រសួងទទួលបាននូវលទ្ធផលសំខាន់ៗមួយចំនួនគួរជាទីមោទនៈ ដូចជា ការចូលជាសមាជិកនៃច្បាប់ទីក្រុងហ្សឺណែវ ស្តីពីកិច្ចព្រមព្រៀងលីស្បោន អំពីឈ្មោះប្រភពដើមទំនិញ និងម៉ាកសម្គាល់ភូមិសាស្ត្រទំនិញ, ការកសាងច្បាប់, ការពង្រីកកិច្ចការពារម៉ាកសម្គាល់ភូមិសាស្ត្រទំនិញ, ការដាក់ឱ្យប្រើប្រាស់ជាផ្លូវការនូវប្រព័ន្ធស្នើសុំចុះបញ្ជីម៉ាកតាមប្រព័ន្ធអេឡិចត្រូនិក, កិច្ចសហប្រតិបត្តិការអន្តរជាតិ គម្រោងកម្មសិទ្ធិបញ្ញា, ការលើកកម្ពស់ការយល់ដឹងផ្នែកកម្មសិទ្ធិបញ្ញា, ការកសាងសមត្ថភាពរបស់មន្ត្រីជំនាញ និងមន្ត្រីអនុវត្តច្បាប់កម្មសិទ្ធិបញ្ញា, ការបង្ក្រាបបទល្មើសកម្មសិទ្ធិបញ្ញា ក៏ដូចជាការផ្តល់សេវាសាធារណៈផ្នែកកម្មសិទ្ធិបញ្ញា ដូចមានក្នុងសេចក្តីព្រាងរបាយការណ៍រួម ។
លោករដ្ឋមន្ត្រីបញ្ជាក់ថា ៖« ការចុះបញ្ជីកម្មសិទ្ធិបញ្ញាលើអ្វីមួយ ក៏ដើម្បីធានាការពារម៉ាកទាំងនោះ មិនឲ្យមានការរំលោភពីអ្នកជំនួញដទៃ ហើយម្យ៉ាងទៀត ក៏ដើម្បីទាក់ទាញវិនិយោគិនបរទេសផ្សេងទៀត ដែលចង់បង្កើតម៉ាកអ្វីមួយនៅក្នុងប្រទេសកម្ពុជា និងចង់វិនិយោគនៅក្នុងប្រទេសកម្ពុជា » ។
លោកបន្ថែមថា ៖« ការចុះបញ្ជីម៉ាកត្រឹមត្រូវនៅក្នុងក្រសួង ក៏អាចឲ្យមានតម្លៃបន្ថែម ដែលជួយលើកកម្ពស់កម្រិតជីវភាពប្រជាពលរដ្ឋផងដែរ ។ ជាក់ស្ដែង យើងមានម៉ាកសមូហភាពមួយចំនួនដែលទទួលបានជោគជ័យ ដូចជា ម្រេចកំពត ផ្កាអំបិល និងគុយទាវភ្នំពេញ ជាដើម » ៕
ចែករំលែកព័តមាននេះ