ខេត្តបាត់ដំបង ៖ សមត្ថកិច្ចជំនាញគ្រប់ស្ថាប័ន កំពុងធ្វើការស្រាវជ្រាវលើករណីចោរកម្មមួយកន្លែង ដែលស្ត្រីមេតុងទីនម្នាក់អះអាងថា ត្រូវចោរបានគាស់ទ្វារផ្ទះចូលលួចលុយអស់ជិត៤០លានរៀល កាលពីយប់ថ្ងៃទី២០ ឧសភា នៅក្បែរផ្សារជ្រៃ ស្ថិតក្នុងភូមិពពាលខែ…
ខេត្តបាត់ដំបង ៖ សមត្ថកិច្ចជំនាញគ្រប់ស្ថាប័ន កំពុងធ្វើការស្រាវជ្រាវលើករណីចោរកម្មមួយកន្លែង ដែលស្ត្រីមេតុងទីនម្នាក់អះអាងថា ត្រូវចោរបានគាស់ទ្វារផ្ទះចូលលួចលុយអស់ជិត៤០លានរៀល កាលពីយប់ថ្ងៃទី២០ ឧសភា នៅក្បែរផ្សារជ្រៃ ស្ថិតក្នុងភូមិពពាលខែ ឃុំជ្រៃ ស្រុកថ្មគោល ដែលមជ្ឈដ្ឋាននានាសង្ស័យថា ជារឿងមិនពិត ។
សមត្ថកិច្ចបានប្រាប់ថា ស្ត្រីដែលអះអាងថា ខ្លួនជាជនរងគ្រោះដែលត្រូវចោរគាស់ផ្ទះចូលលួចលុយនោះឈ្មោះចាន់ ដារ៉ា អាយុ៥៧ឆ្នាំ ជាអាជីវករដូរលុយនិងចងការប្រាក់ រស់នៅចំណុចកើតហេតុខាងលើ ហើយបើតាមប្រភពនានាបានប្រាប់ថា ស្ត្រីរូបនេះក៏ជាមេតុងទីនដ៏ធំម្នាក់ដែរប្រចាំផ្សារជ្រៃ ។ សមត្ថកិច្ចបានឲ្យដឹងទៀតថា គាត់បានប្ដឹងសមត្ថកិច្ចថា មានជនមិនស្គាល់មុខបានគាស់ទ្វារដែកផ្ទះគាត់ខាងមុខចូលលួចលុយអស់គ្មានសល់ពីក្នុងទូ ហើយគាត់បានដឹងនៅព្រឹកឡើងថ្ងៃទី២១ ឧសភា ទើបមានការភ្ញាក់ផ្អើលតែម្ដង។ ប៉ុន្តែសមត្ថកិច្ចជំនាញបានចុះពិនិត្យទីកន្លែងកើតហេតុ ហាក់មិនមានស្លាកស្នាម ឬមានវត្ថុតាងអ្វីដែលគួរឱ្យសង្ស័យថា មានការគាស់ទម្លុះទម្លាយទ្រវាផ្ទះគាត់នោះទេ ។
ប៉ុន្តែបើតាមការស្រង់សំដីស្ត្រីម្ចាស់ផ្ទះឈ្មោះចាន់ ដារ៉ា បាននិយាយប្រាប់សមត្ថកិច្ចថា ភាគច្រើនកូនរបស់គាត់នៅចាំផ្ទះ រីឯរូបគាត់នៅតែតូបក្នុងផ្សារ ។ គាត់មិនដឹងថា ចោរបានគាស់ទ្វារផ្ទះគាត់ចូលលួចលុយនៅម៉ោងប៉ុន្មានទេនៅយប់នោះ លុះនៅព្រឹកថ្ងៃទី២១ ឧសភា ទើបគាត់ដឹង ហើយក៏ផ្អើលឆោឡោតែម្ដង។ ស្ត្រីរូបនេះបានប្រាប់ថា ចោរបានបាត់បង់លុយខ្មែរអស់ចំនួន៣៩,៧លានរៀល , លុយដុល្លាអស់ចំនួន២,២៧០ដុល្លា , លុយថៃអស់ចំនួន៤,០០០បាត ដែលលុយទាំងនេះគាត់ទុកនៅក្នុងថតតុនៅខាងក្នុងផ្ទះ។
ក្នុងករណីនេះ បើតាមមន្ត្រីបច្ចេកទេសបាននិយាយថា កន្លែងនៃការគាស់ទម្លុះទម្លាយនោះ ហាក់មិនសមហេតុផលដែលអាចមនុស្សលូកដៃចូលទាញកន្លឹះ ឬសោដែលថ្ពក់ពីខាងក្នុងបានទេ ។ ព្រោះប្រហោងតូចចង្អៀត ហើយក៏គ្មានបន្សល់ទុកស្លាកស្នាមគួរឱ្យសង្ស័យដែរ។ ប៉ុន្តែគេក៏មិនទាន់ហ៊ានវាយតម្លៃថា យ៉ាងណាដែរ ព្រោះពេលនេះ មន្ត្រីជំនាញកំពុងស៊ើបអង្កេតរកការពិតនៅឡើយ។
ប៉ុន្តែពេលដែលគេកំពុងភ្ញាក់ផ្អើលរឿង ស្ត្រីមេតុងទីនរូបនេះត្រូវចោរគាស់ផ្ទះចូលលួចលុយអស់រាប់ពាន់ដុល្លានិងជិត៤០លានរៀល ស្រាប់តែស្របពេលជាមួយគ្នានោះ ក៏មានព័ត៌មានពីប្រភពនានាថា មុនពេលកើតហេតុប៉ុន្មានថ្ងៃ មានកូនតុងទីនមួយចំនួនតែងទៅរកទាលុយពីមេតុងទីនរូបនេះជាបន្តបន្ទាប់ តែមិនដែលជួបមេតុងទីននេះឡើយ(ស្ត្រីម្ចាស់ផ្ទះ)។ មិនតែប៉ុណ្ណោះមានកូនតុងទីនម្នាក់ត្រូវដល់ថ្ងៃកើបលុយតុងទីនចំនួនជាង៤២លានរៀល ពីស្ត្រីមេតុងទីនរូបនេះទៀតផង។ ប៉ុន្តែអកុសលស្រាប់តែនៅព្រឹកថ្ងៃទី២១ឧសភា ស្ត្រីមេតុងទីនមានរឿងចោរគាស់ផ្ទះលួចលុយអស់ធ្វើឲ្យកូនៗងងិតមុខឈឹងរកនិយាយមិនចេញ។ ប៉ុន្តែគេក៏មិនហ៊ានសន្និដ្ឋានថា ករណីមេតុងទីនបាត់លុយនេះ អាចជាប់ពាក់ព័ន្ធនឹងបំណុលតុងទីននេះដែរឬយ៉ាងណានោះទេ តែវាហាក់ដូចជាគាប់ជូនគ្នាពេក។
គេមិនទាន់មានការបំភ្លឺបែបណាពីស្ត្រីម្ចាស់ផ្ទះនៅឡើយទេ ពាក់ព័ន្ធនឹងលុយតុងទីននេះ។ ដោយឡែកលោកឧត្តមសេនីយត្រី ជេត វណ្ណនី ស្នងការរងខេត្តដែលបានចុះទៅពិនិត្យទីតាំងកើតហេតុផ្ទាល់ក៏មិនទាន់ហ៊ានសន្និដ្ឋានឲ្យជ្រះស្រឡះដែរជុំវិញការអះអាងរបស់ម្ចាស់ផ្ទះដែលថា មានចោរគាស់ផ្ទះចូលលួចលុយរាបសិបលានរៀលខាងលើនេះ។ ប៉ុន្តែលោកស្នងការរងបានវាយតម្លៃដោយយោងលើភាពមន្ទិលនៅកន្លែងកើតហេតុ និងយោងលើមុខរបរបស់ស្ត្រីម្ចាស់ផ្ទះ រួមទាំងរឿងរ៉ាវដែលបានបំភ្លឺពីប្រភពនានាផង លោកសង្ស័យទៅលើករណីនេះថា «ទំនងជារឿងមិនពិត» តែយ៉ាងណាលោកស្នងការខេត្ត នៅតែជម្រុញឲ្យមន្ត្រីជំនាញធ្វើការស៊ើបអង្កេ្តលើករណីនេះបន្តទៀត ដើម្បីស្វែងរកការពិត ។
ចែករំលែកព័តមាននេះ