រាជធានីភ្នំពេញ ៖ ប្រទេសជប៉ុននៅថ្ងៃទី២២ ខែឧសភា ឆ្នាំ២០១៨នេះបានផ្តល់ប្រាក់ ៣,២២លានដុល្លារអាមេរិក ជួយឥតសំណងដល់រាជរដ្ឋាភិបាលកម្ពុជាសម្រាប់ប្រើប្រាស់លើវិស័យអភិវឌ្ឍធនធានមនុស្ស មាននិស្សិត អនុបណ្ឌិត និងបណ្ឌិតចំនួន២៦នាក់ដែលត្រូវទៅសិក្សានៅប្រទេសជប៉ុន ។ ពិធីចុះហត្ថលេខាប្រគល់ និងទទួលដោយលោកហូរីណូជី ហ៊ីដូហ៊ីសា ឯកអគ្គរាជទូតជប៉ុនប្រចាំនៅកម្ពុជា និងលោកទេសរដ្ឋមន្ត្រីប្រាក់ សុខុនរដ្ឋមន្ត្រីក្រសួងការបរទេស ។
លោកហូរីណូជី ហ៊ីដូហ៊ីសា ឯកអគ្គរាជទូតជប៉ុនប្រចាំកម្ពុជាបានថ្លែងថា«ពិធីចុះហត្ថលេខា
លើកលិខិតប្តូរសារនេះ សម្រាប់កម្មវិធីអាហារូបករណ៍សម្រាប់ការអភិវឌ្ឍធនធានមនុស្ស(JDS) ដែលជាជំនួយឥតសំណងរបស់ជប៉ុន » ។ លោកថា រដ្ឋាភិបាលជប៉ុនបានផ្តល់ទឹកប្រាក់៣៤០លានយ៉េន ឬប្រមាណជាង៣លានដុល្លារអាមេរិកដល់រាជរដ្ឋាភិបាលកម្ពុជា ដើម្បីផ្តល់ឱការសិក្សាថ្នាក់បណ្ឌិត និងអនុបណ្ឌិតនៅប្រទេសជប៉ុនដល់មន្ត្រីវ័យក្មេងឆ្នើមចំនួន២៦នាក់ ។
លោកឯកអគ្គរដ្ឋទូតបានលើកឡើងថា ៖ ចាប់តាំងពីឆ្នាំ២០០១ រហូតដល់បច្ចុប្បន្នកម្មវិធី JDS បានបញ្ជូនមន្ត្រីកម្ពុជាប្រមាណ៤០០នាក់ទៅសិក្សានៅប្រទេសជប៉ុន ។ លោកថ្លែងថា ៖ «ខ្ញុំសង្ឃឹមថា កម្មវិធី JDSនេះ និងចូលរួមចំណែកដ៏ធំដល់អនាគតកម្ពុជាតាមរយៈការបណ្តុះបណ្តាលធនធានមនុស្ស» ។ លោកឯកអគ្គរដ្ឋទូតបានលើកឡើងថា ៖ និស្សិតអាហារូបករណ៍ដែលបានត្រឡប់មកប្រទេសវិញកំពុងដើរតួនាទីសំខាន់ៗក្នុងស្ថាប័នជាច្រើនរបស់រាជរដ្ឋាភិបាលកម្ពុជា ។ លោកបញ្ជាក់ថា ៖«ខ្ញុំមានសេចក្តីរីករាយណាស់ដែលចំណេះដឹង និងបទពិសោធន៍ដែលទទួលបានតាមរយៈកាលសិក្សានៅជប៉ុនបាន និងកំពុងរួមចំណែកដល់ការអភិវឌ្ឍន៍របស់ប្រទេស» ។
លោកទេសរដ្ឋមន្ត្រីប្រាក់ សុខុន បានថ្លែងថា ៖ ថ្ងៃនេះខ្ញុំមានសេចក្ដីរីករាយដែលបានចុះហត្ថលេខាជាមួយលោក HORINOUCHI លើលិខិតប្តូរសារ និងកំណត់ហេតុនៃការពិភាក្សាស្ដីពីហិរញ្ញប្បទានឥតសំណងរបស់ជប៉ុនចំនួន៣៤២លានយ៉េន (ប្រមាណ៣,២២ លានដុល្លារអាមេរិក) សម្រាប់អនុវត្តគម្រោងអាហារូបករណ៍អភិវឌ្ឍន៍ធនធានមនុស្ស សម្រាប់ឆ្នាំសិក្សា ២០១៨ ។ លោកថ្លែងថា ៖ អាហារូបករណ៍នេះនឹងផ្ដល់ជូននិស្សិត ដែលជាមន្ត្រីរាជការវ័យក្មេងកម្ពុជាចំនួន២៦រូប សម្រាប់ថ្នាក់បរិញាប័ត្រជាន់ខ្ពស់២៤រូប សិក្សារយៈពេល០២ឆ្នាំ និងថ្នាក់បណ្ឌិតចំនួន០២រូប សិក្សារយៈពេល០៣ឆ្នាំ ។ និស្សិតចំនួន២៤នាក់ (ស្ត្រី១៣នាក់) នឹងចេញដំណើរទៅសិក្សានៅជប៉ុនក្នុងខែសីហា ឆ្នាំ២០១៨ ។
លោកបានថ្លែងថា«ខ្ញុំសូមរំលឹកថា រដ្ឋាភិបាលជប៉ុនបានផ្តល់ហិរញ្ញប្បទានឥតសំណងសម្រាប់អភិវឌ្ឍធនធានមនុស្សនៅកម្ពុជា មានរយៈពេល១៨ឆ្នាំមកហើយ គឺចាប់ពីឆ្នាំ២០០០ ដែលមានចំនួនសរុបចំនួន៥.៨៥៧ លានយ៉េន (ប្រមាណ៥៨,៧៧ លានដុល្លារអាមេរិក) ។
លោកថា ៖តាមរយៈជំនួយនេះមន្ត្រីរាជការវ័យក្មេងកម្ពុជាចំនួន៤១៦នាក់ (ក្នុងនោះមានស្ត្រី ៩៣នាក់) ទៅបន្តការសិក្សាថ្នាក់ Master នៅប្រទេសជប៉ុន លើមុខវិជ្ជាពាក់ព័ន្ធនឹងសេដ្ឋកិច្ច ការលើកកំពស់ការអភិវឌ្ឍសង្គម និងការលើកកំពស់អភិបាលកិច្ច ។ លោកទេសរដ្ឋមន្ត្រីបានបញ្ជាក់ទៀតថា ៖« គិតមកដល់បច្ចុប្បន្ននិស្សិតដែលបានបញ្ចប់ការសិក្សានៅប្រទេសជប៉ុន តាមរយៈជំនួយខាងលើនេះមានចំនួន៣៤៤នាក់ (ស្ត្រី ៦៨នាក់) ហើយកំពុងបម្រើការងារនៅតាមក្រសួង-ស្ថាប័នសំខាន់ៗ និងកំពុងចូលរួមចំណែកយ៉ាងសកម្មក្នុងការអភិវឌ្ឍនៅកម្ពុជា ។
លោកទេសរដ្ឋមន្ត្រីថ្លែងថា ៖ តាងនាមរាជរដ្ឋាភិបាលកម្ពុជាលោកសូមសម្តែងអំណរគុណដ៏ជ្រាលជ្រៅ ចំពោះរដ្ឋាភិបាល និងប្រជាជនជប៉ុនក្នុងការបន្តគាំទ្រ និងតែងតែជួយជម្រុញការអភិវឌ្ឍធនធានមនុស្ស ដែលជាវិស័យអាទិភាពមួយរបស់រាជរដ្ឋាភិបាល ។ លិខិតប្ដូរសារដែលបានចុះហត្ថលេខាថ្ងៃនេះនឹងចូលរួមចំណែកថែមទៀតដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការបន្ថយគម្លាតអភិវឌ្ឍរបស់ខ្លួន ទាំងនៅក្នុងប្រទេស និងក្នុងតំបន់ និងសបញ្ជាក់អំពីទំនាក់ទំនងមិត្តភាពដ៏រឹងមាំរវាងប្រទេសយើងទាំងពីរ ៕
ចែករំលែកព័តមាននេះ