រាជធានីភ្នំពេញ ៖ បុរសម្នាក់មិនដឹងជាមានវិបត្តិស្នេហា ឬវិបត្តិក្នុងគ្រួសារបានជាសម្រេចចិត្តជិះម៉ូតូស្តុបពីមួយគ្រឿង ទៅលោតទឹកសម្លាប់ខ្លួននៅលើស្ពានជ្រោយចង្វារថ្មីបាត់ស្រមោល បន្សល់ទុកតែម៉ូតូមួយគ្រឿងនៅលើស្ពានបង្កឲ្យមានការភ្ញាក់ផ្អើលចោមរោមមើលទាំងយប់កាលពីវេលាម៉ោង៧នឹង៣០នាទីយប់ថ្ងៃទី២១ ខែឧសភា ឆ្នាំ២០១៨ នៅចំណុចលើស្ពានជ្រោយចង្វារថ្មី ស្ថិតនៅក្នុងសង្កាត់ជ្រោយចង្វារ ខណ្ឌជ្រោយចង្វារ ។ 
តាមប្រភពព័ត៌មានពីសមត្ថកិច្ចអន្តរាគមន៍ខណ្ឌជ្រោយចង្វារបានអោយដឹងថា មុនពេលកើតហេតុ គេបានឃើញបុរសម្នាក់មិនស្គាល់អត្តសញ្ញាណ វ័យប្រមាណ៣០ឆ្នាំ ពាក់អាវដៃខ្លីពណ៌ខ្មៅ ជិះម៉ូតូមួយគ្រឿងម៉ាកហុងដាស្តុបពី ពណ៌ស ពាក់ស្លាកលេខ ភ្នំពេញ ១CZ-៧១៣២ បើកបរតាមបណ្តោយផ្លូវពីរង្វង់មូលកួចកាណុង បើកឡើងស្ពានជ្រោយចង្វារថ្មី ខណៈពេលបើកមកដល់លើស្ពានមិនដឹងថា គាត់មានវិបត្តិផ្លូវចិត្តរឿងអីនោះទេ បានឈប់ម៉ូតូ រួចដកសោម៉ូតូទុកក្នុងខ្លុបម៉ូតូ ហើយឡើងលើបង្កាន់ដៃស្ពានលោតទឹកសម្លាប់ខ្លួនតែម្តង បង្កអោយមានការភ្ញាក់ផ្អើលដល់សមត្ថកិច្ចអន្តរាគមន៍ខណ្ឌជ្រោយចង្វារ និងប្រជាពលរដ្ឋដែលធ្វើដំណើរឆ្លងកាត់នាំគ្នាឈប់ចោមរោមមើលរហូតដល់ស្ទះចរាចរណ៍ ។
ក្រោយពេលកើតហេតុ សមត្ថកិច្ចក៏បានយកម៉ូតូស្តុបពីរបស់ជនរងគ្រោះទៅរក្សាទុកនៅនគរបាលប៉ុស្តិ៍ជ្រោយចង្វារដើម្បីស្រាវជ្រាវរកសាច់ញាតិមកទទួលយកម៉ូតូត្រឡប់ទៅវិញ ៕
ចែករំលែកព័តមាននេះ