រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា លោក ខាន់យ៉ា ប្រាជ្ញ អតីតកីឡាករមួយរូប ដែលបានក្លាយខ្លួនជាគ្រូបង្វឹកក្បាច់គុនខ្មែរនៅលើទឹកដីសហរដ្ឋអាមេរិក ក្រោយពីផ្ញើខ្លួនរស់នៅទីនោះ ហើយបោះបង់ដីកំណើតអស់ប្រមាណ៤០ឆ្នាំនោះ បានមកដល់កម្ពុជាគួរឱ្យភ្ញាក់ផ្អើល កាលពីថ្ងៃទី២២ ឧសភា ដោយមានវត្តមានកីឡាករ កីឡាការិនីពីកម្ពុជាមួយចំនួនចូលរួមទទួលដំណើរនៃការមកដល់នៅព្រលានយន្តហោះ។
អ្វីដែលគេគេកត់សម្គាល់នោះ គឺលោកប្រកាសថា នឹងរួមចំណែកជួយដល់វិស័យកីឡានៅកម្ពុជាឱ្យរីកចំរើន ដោយគំរោងនឹងជួយឱ្យកម្ពុជាមានមុខក្នុងព្រឹត្តិការណ៍កីឡាអូឡាំពិកពិភពលោកឱ្យកាន់តែច្រើនក្នុងពេលដ៏ខ្លីផងដែរ។ ហើយដំណើរមកដល់លើកនេះ លោក ខាន់យ៉ា ប្រាជ្ញ អះអាងថា ដើម្បីបើកកិច្ចពិភាក្សាជាមួយមន្ត្រីគណៈកម្មាធិការជាតិអូឡាំពិកកម្ពុជា ក្នុងបំណងស្វែងរកប្រយោជន៍ឱ្យកីឡាកម្ពុជា ពោលគឺដើម្បីធ្វើការពិភាក្សាស្វែងរកគន្លឹះសំខាន់ៗមួយចំនួនជួយឲ្យកីឡាករកម្ពុជាមានមុខលើព្រឹត្តិការណ៍ប្រកួតកីឡាអូឡាំពិកពិភពលោក ដែលក្នុងពេលនេះនៅមានកីឡាករតិចប្រភេទនៅឡើយ មានសំណាងបានចូលប្រកួតនៅអូឡាំពិក ដោយសារតែការប្រកួតជម្រុះកីឡាប្រភេទផ្សេងៗមានតែតៃក្វាន់ដូមួយ ដែលមានសិទ្ធិប្រកួតដោយបានជាប់កាលពីលើកមុន ហើយប្រភេទផ្សេងៗទៀតគឺស្ថិតក្នុងការអនុញ្ញាតិពីគណៈកម្មការរៀបចំនៅឡើយ។
លោកបានថ្លែងនៅចំពោះមុខអ្នកសារព័ត៌មានក្រោយពីចុះមកដល់ដីកំណើតថា លោកនឹងស្វែងរកគន្លឹះបើកផ្លូវឱ្យកម្ពុជាកាន់តែច្រើន ដើម្បីអាចបញ្ជូនកីឡាករ កីឡាការិនីច្រើនប្រភេទខុសពីពេលកន្លងទៅបានបង្ហាញខ្លួននៅក្នុងព្រឹត្តិការណ៍អូឡាំពិក។ ហើយលើសពីនេះទៀតនោះ លោកក៏បានលត់ជង្គង់ឱនក្រាបសំពះទឹកដីកំណើតរបស់ខ្លួនដោយក្តីនឹករលឹកផងដែរ ដើម្បីបង្ហាញថា លោកមានកំណើតចេញពីទឹកដីមួយនេះ បើទោះបីជាមានកិត្តិយស និងការទទួលស្គាល់នៅលើទឹកដីប្រទេសទំនើបក៏ដោយ ក៏លោកនៅតែជាខ្មែរ និងរកឱកាសមកជួយកីឡាករខ្មែរឱ្យមានឱកាសបង្អួតខ្លួនលើឆាកអន្តរជាតិ។
យ៉ាងណាមិញ គេនៅមិនទាន់ដឹងថា តើការជជែកពិភាក្សារបស់លោក ទទួលបានផ្លែផ្កាកម្រិតណាពីគណៈកម្មការជាតិនៅអូឡាំពិកនៅឡើយទេ ខណៈដែលជំហានបឋម គឺលោកនឹងស្វែងរកគន្លឹះពង្រឹងសមត្ថភាពកីឡាករ កីឡាការិនីលើវិស័យសំខាន់ៗមួយចំនួនតាមរយៈជួយដូចជាការបង្វឹក និងជួយឱ្យមានការទទួលកីឡាករកម្ពុជាទៅហ្វឹកហាត់នៅក្រៅប្រទេសជាដើម ជាពិសេសនៅលើទឹកដីអាមេរិក។
ចែករំលែកព័តមាននេះ