រាជធានីភ្នំពេញ ៖ តាមសេចក្តីរាយការណ៍បឋមបានឲ្យដឹងថា នៅវេលាម៉ោង៧និង៥០នាទីព្រឹកថ្ងៃទី២២ ខែឧសភា ឆ្នាំ២០១៨នេះ មានករណីទុស្សេចរន្តអគ្គិសនីលើបង្គោលភ្លើងធំមួយដើម លាយលំជាមួយផ្សែង និងអណ្តាតភ្លើង ដែលបង្កការភ្ញាក់ផ្អើលជាខ្លាំងនៅជាប់នឹងមន្ទីរពេទ្យសម្ភពខេមរៈបុត្រ…
រាជធានីភ្នំពេញ ៖ តាមសេចក្តីរាយការណ៍បឋមបានឲ្យដឹងថា នៅវេលាម៉ោង៧និង៥០នាទីព្រឹកថ្ងៃទី២២ ខែឧសភា ឆ្នាំ២០១៨នេះ មានករណីទុស្សេចរន្តអគ្គិសនីលើបង្គោលភ្លើងធំមួយដើម លាយលំជាមួយផ្សែង និងអណ្តាតភ្លើង ដែលបង្កការភ្ញាក់ផ្អើលជាខ្លាំងនៅជាប់នឹងមន្ទីរពេទ្យសម្ភពខេមរៈបុត្រ ស្ថិតតាមបណ្តោយផ្លូវលេខ២៧១ ស្ថិតក្នុងសង្កាត់បឹងទំពុនទី១ ខណ្ឌមានជ័យ ។
សេចក្តីរាយការណ៍ពីសាក្សីឲ្យដឹងថា មុនកើតហេតុគេសង្កេតឃើញមានផ្សែងចេញហ៊ុយ ចេញពីសំណុំខ្សែភ្លើងនៃបង្គោលខាងលើ លុះមិនបានប៉ុន្មាននាទីផង ស្រាប់តែមានជាអណ្តាតភ្លើងឆាបឆេះឡើងតែម្តង ។
ភ្លាមៗនោះកម្លាំងអាជ្ញាធរមូលដ្ឋានរួមជាមួយរថយន្តពន្លត់អគ្គិភ័យចំនួន២គ្រឿងបានចុះអន្តរាគមន៍ផងដែរ ប៉ុន្តែយ៉ាងណាមិញរថយន្តទាំង២គ្រឿងនេះពុំបានធ្វើការបាញ់ទឹកពន្លត់ ព្រោះមុនពេលដែលរថយន្តទៅដល់ពលរដ្ឋដែលនៅក្បែរនោះបាននាំគ្នាយកបំពង់ពន្លត់អគ្គភ័យបាញ់ពន្លត់អណ្តាតភ្លើងឲ្យរលត់សូន្យសុងទៅហើយ ហើយក្រោយពន្លត់រួច អាជ្ញាធរក៏បានទំនាក់ទំនងទៅខាងអគ្គិសនីឲ្យបិទចរន្តភ្លើងផងដែរ ។
សូមបញ្ជាក់ថា ក្នុងហេតុការណ៍នេះបានធ្វើឲ្យចរាចរណ៍នៅលើផ្លូវ២៧១ ទាំងទៅនឹងមកត្រូវកកកុញផងដែរ ព្រោះកំឡុងពេលកើតហេតុកម្លាំងនគរបាលបានបិទផ្លូវមួយសន្ទុះធំ ដើម្បីអន្តរាគមន៍ពន្លត់អណ្តាតភ្លើង ក្នុងករណីឆេះខាងលើនេះមិនទាន់ដឹងថា ទុស្សេចរន្តមកពីមូលហេតុអ្វីនោះដែរ ៕
ចែករំលែកព័តមាននេះ