រាជធានីភ្នំពេញ ៖ ជនមិនស្គាល់មុខ១ក្រុមបានជិះម៉ូតូដឹកស្ត្រីម្នាក់យកទៅទម្លាក់ចោលនៅតាមផ្លូវមួយកន្លែង រួចបាននាំគ្នាជិះម៉ូតូចេញគេចខ្លួនបាត់ស្រមោលអស់ ចំណែកស្ត្រីរងគ្រោះបានដេកស្ដូកស្ដឹងក្នុងស្ថានភាពទន់ដៃទន់ល្ហិតល្ហៃ ។ ហេតុការណ៍នោះបានបង្កឲ្យមានការភ្ញាក់ផ្អើលកាលពីវេលាម៉ោង២និង៤០នាទីរសៀល ថ្ងៃទី២១ ខែឧសភា ឆ្នាំ២០១៨…
រាជធានីភ្នំពេញ ៖ ជនមិនស្គាល់មុខ១ក្រុមបានជិះម៉ូតូដឹកស្ត្រីម្នាក់យកទៅទម្លាក់ចោលនៅតាមផ្លូវមួយកន្លែង រួចបាននាំគ្នាជិះម៉ូតូចេញគេចខ្លួនបាត់ស្រមោលអស់ ចំណែកស្ត្រីរងគ្រោះបានដេកស្ដូកស្ដឹងក្នុងស្ថានភាពទន់ដៃទន់ល្ហិតល្ហៃ ។ ហេតុការណ៍នោះបានបង្កឲ្យមានការភ្ញាក់ផ្អើលកាលពីវេលាម៉ោង២និង៤០នាទីរសៀល ថ្ងៃទី២១ ខែឧសភា ឆ្នាំ២០១៨ នៅក្នុងភូមិព្រៃព្រីងខាងជើង សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
ស្ត្រីរងគ្រោះខាងលើនោះមិនត្រូវបានស្គាល់អត្តសញ្ញាណនោះឡើយ គាត់មានអាយុប្រហែលជាង៤០ឆ្នាំ និងត្រូវបានប្រជាពលរដ្ឋលើកដាក់ម៉ូតូរ៉ឺម៉កកង់បីដឹកយកទៅសង្គ្រោះនៅមន្ទីពេទ្យភ្លាមៗដែរ ។
ប្រជាពលរដ្ឋបាននិយាយថា នៅមុនពេលកើតហេតុពួកគាត់បានឃើញមានមនុស្ស១ក្រុមបានជិះម៉ូតូដឹកស្ត្រីខាងលើ ទៅកាន់ចំណុចកើតហេតុ បន្ទាប់មកបានទម្លាក់ស្ត្រីរងគ្រោះចោល ហើយជនទាំងនោះបាននាំគ្នាជិះម៉ូតូគេចខ្លួនបាត់អស់ ។ ខណៈនោះស្ត្រីរងគ្រោះបានដេកដួលនៅ និងលើផ្លូវម្នាក់ឯង ដែលជាហេតុបង្កឲ្យមានការភ្ញាក់ផ្អើលយ៉ាងខ្លាំង ហើយអ្នកភូមិបាននាំគ្នាជួយសង្គ្រោះបឋម និងសួរនាំពីមូលហេតុ ។
ប្រភពដដែលបានបន្តទៀតថា ពេលនោះស្ត្រីរងគ្រោះមិនទាន់សន្លប់នៅឡើយ គឺស្ថិតនៅក្នុងស្ថានភាពល្ហិត ល្ហៃប៉ុណ្ណោះ ហើយបាននិយាយបានខ្លះៗថា «គាត់ត្រូវចោរដាក់ថ្នាំសណ្ដំយកគ្រឿងអលង្ការ និងទ្រព្យសម្បត្តិអស់ពីខ្លួនហើយ»ប៉ុន្តែគេមិនបានដឹងថា តើអស់អ្វីខ្លះ និងគិតជាប្រាក់ប៉ុន្មានឡើយ ព្រោះបន្ទាប់ពីនិយាយបានតែប៉ុណ្ណឹងគាត់ក៏សន្លប់បាត់ស្មារតីតែម្ដង ។ ពេលនោះអ្នកភូមិបានសន្មត់ថា ក្រុមជនដែលដឹកគាត់យកទៅទម្លាក់ចោលនោះ គឺជាចោរដែលដាក់ថ្នាំយកគ្រឿងអលង្ការ និងទ្រព្យសម្បត្តិពីស្ត្រីរងគ្រោះម្នាក់នេះ ។ បន្ទាប់មកក៏បាននាំគ្នាលើកស្ត្រីរងគ្រោះដាក់ម៉ូតូរ៉ឺម៉កកង់បីនាំទៅកាន់មន្ទីរពេទ្យភ្លាមៗដែរ ។
ដោយឡែកប្រភពផ្សេងមួយទៀតបានសង្ស័យថា ស្ត្រីរូបនោះចាញ់ល្បិចក្រុមចោរទម្លាក់ចោលអស់គ្រឿងអលង្ការច្រើន ហើយមានការសោកស្ដាយរបស់ទ្រព្យ និងតក់ខ្លាំងពេក ទើបមានអាការទន់ដៃជើងបែបនេះ ។ មិនមែនត្រូវថ្នាំសណ្ដំឡើយ ការសន្លប់បណ្ដាលមកពីអារម្មណ៍សោកស្ដាយ និងរន្ធត់ តក់ស្លុតនេះឯង ព្រោះរឿងរ៉ាវបែបនេះពុំមែនទើបតែកើតឡើងជាលើកទី១ប៉ុណ្ណោះទេ បានកើតឡើងជាបន្តបន្ទាប់រាប់មិនអស់មកហើយ ៕
ចែករំលែកព័តមាននេះ