ខេត្តព្រៃវែង ៖ មន្ត្រីជំនាញកាំកុងត្រូលសាខាខេត្តព្រៃវែង កាលពីព្រឹកថ្ងៃទី២១ ឧសភា បានចុះត្រួតពិនិត្យគុណភាពទំនិញ នៅក្នុងផ្សារកំពង់ពពិល ស្រុកពារាំង ដើម្បីស្វែងរកទំនិញខូចគុណភាព និងទំនិញទាំងឡាយណាដែលមានដាក់លាយសារធាតុគីមីដែលច្បាប់ហាមឃាត់…
ខេត្តព្រៃវែង ៖ មន្ត្រីជំនាញកាំកុងត្រូលសាខាខេត្តព្រៃវែង កាលពីព្រឹកថ្ងៃទី២១ ឧសភា បានចុះត្រួតពិនិត្យគុណភាពទំនិញ នៅក្នុងផ្សារកំពង់ពពិល ស្រុកពារាំង ដើម្បីស្វែងរកទំនិញខូចគុណភាព និងទំនិញទាំងឡាយណាដែលមានដាក់លាយសារធាតុគីមីដែលច្បាប់ហាមឃាត់ ដើម្បីដកហូតយកទៅបំផ្លាញចោល ការពារកុំអោយបង្កផលប៉ះពាល់ដល់សុខភាពអ្នកប្រើប្រាស់។
សកម្មភាពចុះត្រួតពិនិត្យនេះ គឺទទួលបានការគាំទ្រយ៉ាងខ្លាំងពីប្រជាពលរដ្ឋ រីឯក្រុមអាជីវករវិញក៏បានបង្ហាញនូវការត្រេកអរផងដែរ ព្រោះពួកគាត់យល់ថា ការចុះត្រួតពិនិត្យនេះផ្តល់នូវអត្ថប្រយោជន៌ជាច្រើនដល់ពួកគាត់ជាអាជីវករ ហើយពួកគាត់ក៏ចង់អោយមន្ត្រីជំនាញចុះត្រួតពិនិត្យបែបនេះអោយបានញឹកញាប់ផងដែរ។
ក្រុមអាជីវករនៅផ្សារកំពង់ពពិលនេះបាននិយាយថា ទំនិញទាំងអស់ដែលពួកគាត់ទទួលទិញពីអ្នកផលិតយកមកលក់បន្តរាល់ថ្ងៃនេះ មានច្រើនមុខណាស់ ប៉ុន្តែសំរាប់ទំនិញប្រភេទគ្រឿងភេសជ្ជៈ គ្រឿងកំប៉ុង គឺពួកគាត់អាចពិនិត្យមើលគុណភាពរបស់វាបានដោយខ្លួនឯង ប៉ុន្តែសំរាប់ប្រភេទបន្លែ ផ្លែឈើវិញ គឺពួកគាត់មិនអាចមើលដឹងនោះទេ មិនដឹងបន្លែឬផ្លែឈើណាមានសារធាតុគីមីឬអត់នោះទេ ព្រោះគ្មានឧបករណ៍ពិសោធន៍ ហើយបើមានក៏មិនចេះមើលដែរ ដូច្នេះរាល់ថ្ងៃនេះពួកគាត់ក៏មានការបារម្ភដែរ ខ្លាចអតិថិជនទិញទំនិញពីពួកគាត់យកទៅបរិភោគ រួចហើយប៉ះពាល់ដល់សុខភាព ម្យ៉ាងគឺខ្លាចត្រូវប្រឈមមុខចំពោះបញ្ហាផ្លូវច្បាប់ថែមទៀតផង ដូច្នេះហើយទើបពេលមានមន្ត្រីជំនាញកាំកុងត្រូលចុះពិនិត្យ ធ្វើអោយពួកគាត់សប្បាយចិត្ត។
សូមបញ្ជាក់ផងដែរថា នៅក្នុងសកម្មភាពចុះត្រួតពិនិត្យនេះ មន្ត្រីជំនាញកាំកុងត្រូលបានធ្វើតេស្តបឋមរកសារធាតុគីមីទៅលើចំណីអាហារប្រភេទណែមត្រី ជ្រក់ត្រសក់ និងគ្រឿងសមុទ្រហើយបានរកឃើញសារធាតុគីមីប្រភេទមេទឹកខ្មេះ នៅលើជ្រក់ត្រសក់ ហើយមន្ត្រីជំនាញក៏បានហាមឃាត់មិនអោយអាជីវករដាក់លក់តទៅទៀត និងបានណែនាំអាជីវករជាអ្នកផលិតអោយឈប់ប្រើមេទឹកខ្មេះធ្វើជ្រក់បែបនេះទៀត ព្រោះវាប៉ះពាល់ដល់សុខភាពអ្នកបរិភោគ ក្រៅពីនេះក៏បានរកឃើញ និងដកហូតបានទំនិញខូចគុណភាពចំនួន១៥,៥គីឡូក្រាមផងដែរ៕
ចែករំលែកព័តមាននេះ